لما كنت طفل صغير كنت بطلع مع عيلتى مصيف كتير وممكن يبقى مرتين فى السنة ، فى مرة من المرات إللي سافرنا فيها للعجمي فى اسكندرية مع قرايبي ، والعمارة اللى هنسكن فيها كانت اغلب الشقق فيها فاضية ، احنا كنا فى الدور الأخير ومفيش غير الشقة إللى احنا فيها وباقي الشقق فاضية وكانوا حوالي ٥ او ٦ شقق فى الدور ، اول يوم كنت سهران وواقف فى البلكونة عادى جدا ، بس فجأة سمعت صوت خشن بيقولي "ايه إللى جابك هنا ؟" جريت على ماما قولتلها إللى حصل قالتلي يمكن بيتهيألك ، وقتها لقيت الفجر بيأذن ..
تاني يوم نزلنا كلنا ماعدا بنت عمي فضلت موجودة علشان تعبانة ونايمة ، و أول ما رجعنا كانت بتقول مين البارد إللى كان قاعد معايا وكان بيعمل صوت ؟ وبعد ما اقنعناها ان مفيش حد قالت إنها سمعت صوت خبط فى المطبخ وخطوات فى الشقة ، كلنا كنا قلقانين و اليوم عدا ..
تالت يوم كنا نازلين البحر واحنا راجعين الكهربا قطعت ، طلعنا على السلم وانا واخويا كنا طالعين بعدهم علشان كنا بنجيب حاجات ، السلم كان ضلمة بس من وسط الضلمة دى سمعنا صوت بيقول "ازيك يا أحمد" بصينا على مصدر الصوت دة شوفنا ست لابسة اسود ووشها مش باين وكانت بتنادي علينا بس ، ولما قولنالها عرفتي اسمنا منين ، الكهربا اشتغلت فجأة والست اختفت وكأنها مكانتش موجودة ، نفس اليوم بالليل نزلنا نشترى حاجات بس واحنا راجعين لقينا الأسانسير مش شغال !! والبواب ومراته مش موجودين ، طلعنا على السلم وكان النور قاطع فيه برضو و أول ما وصلنا الكهربا اشتغلت ، كلمت صاحبى بقوله على إللى حصل فى ريكورد على الواتس وبعتهوله ، بعدها طلعت الشقة فتحت الريكورد لقيته مفيهوش اي حاجة غير صوت وش واخر كلمة قولتها ..
رابع يوم الساعة 12 بالليل كنا بنشوف خيال اسود دايما بيتحرك فى الشقة ، نمت فى أوضة جدتي إللي كانت رجعت البيت قبلنا وسابت اوضتها فاضية ، سمعت صوتها كأنها جنبي ، صحيت مخضوض وبترعش جامد بصيت جنبى لقيتها بتبص ليا و مبرقالي اوى ، قومت من سريرى بسرعة ولعت النور مالقيتش حاجة ، وباقى عيلتى حصل معاهم مواقف كتير لحد ما سبنا الشقة دى ورجعنا بيتنا ، بس من ساعة ما رجعنا وفيه مشاكل بتحصل فى بيتنا لحد ما بعناه واشترينا شقة فى مدينة نصر فى شارع عباس العقاد ، العمارة كانت 17 شقة بس احنا كنا فى الدور إللى قبل الاخير ، و اللى ساكن فى العمارة 3 شقق بس ، شقة وحدة مطلقة وعايشة لوحدها ، وشقتنا و شقة وحدة فوقينا ساكنة مع جوزها ، بس كانوا دايما فى مشاكل وخناق طول اليوم لدرجة اننا اتخنقنا من صوتهم العالى ، متفهمش فيه ايه بس هما مخلفوش حتى وحياتهم على طول فى مشاكل و زعيق ومحدش كان عارف لغز خناقاتهم ايه ، بس كل إللى نعرفه ان الراجل جوز الست دى كل يوم بالليل بيرجع سكران طينة ويخبط على ابواب شقق العمارة بطريقة بشعة و يرعب كل اللى فيها ، وكل يوم ع الحال دة لدرجة اننا بقينا عارفين مواعيده و امتى الباب هيخبط ..
كنت انا كبرت ساعتها وعندى 21 سنة ، سافرت اشتغلت فى الغردقة لمدة 4 شهور ونزلت أجازة لشقتنا ، بس الغريب ان مبقتش اسمع صوت خبط الباب بالليل وكمان فيه حاجة لفتت انتباهى جدا ، وهى ان كل ما انزل او اطلع من العمارة اشم ريحة غريبة جدا ، ريحة عفونة كأن فيه كلب ميت او قطة ، كبرت دماغى وعديت الموضوع وبعدها بأيام و كل ما ادخل عمارتنا بالليل احس حاجة بتمشي ورايا ، وقلبي بيدق بسرعة جدا ، و ابص مالاقيش حاجة ، وكمان لما كنت بطلع السطح بعدي جنب الشقة اللى فيها الست والراجل السكران ، بس كأن مفيش حد ساكن فيها معرفش حصلهم إيه ، بحس بالخوف جدا مش عارف السبب ايه بس بقيت كل ما اعدى من قدام الشقة دى بالليل اجري لحد ما اوصل السطح او شقتنا وافتح الباب وادخل وقلبي بيستريح لما اقفل الباب ، طيب الخوف ده سببه ايه ؟ يا ترى انا ليه بخاف واشمعنى من الشقة ؟ سلم العمارة ضيق شوية ضلمة من اوله خصوصا الشقة اللي فيها الست والراجل ، مش حاطين نور قدام الشقة دى ، في يوم من الأيام كنت قاعد بالليل على الفيس وسمعت اتنين في مدخل العمارة قاعدين بيتكلموا كانت واحدة بتقول انها كل ما بتعدي من قدام الشقة دى وتطلع السطح شعرها بيقف زي ما تكون بتتكهرب وهي معدية جنب الشقة دى بالليل ، عيني وسعت وقولت يعني دة مش بيحصل معايا انا بس ، واكيد في حاجة في الشقة دى او فيها لغز انا مش عارف معناه ، سألت كذا حد عن الشقة دى وهل حصل فيه حاجة قبل كدا ولا لا ؟ بس محدش قالي حاجة قعدت افكر كتيير وموصلتش لحاجة ، قولت ممكن بتخيل ولا حاجة من كتر قصص الرعب اللي بكتبها ..
اليوم اللي بعده صحيت علشان اصلي الفجر ، قولت هصليه في المسجد وقمت ومشيت السلم كان ضلمة ونور القمر كان باين في الارض في اليوم ده فكان منورلي الطريق شوية معرفتش اشغل كشاف الموبايل لأنه كان هيفصل واول ما وصلت عند مدخل العمارة من تحت ! سمعت صوت جاى من ناحية الشقة دى زي حد بيصرخ ، شخص بيصرخ كدا خدت الشارع كله جري لبرا قابلني حوالي ٧ كلاب في السكة وانا بجري راحوا جاريين ورايا لحد ماوصلت المسجد وصليت ، وانا راجع ووصلت اول الشارع وخايف ادخل العمارة ، جمعت شجاعتي ورحت داخل العمارة وعمال اقرأ قرآن ، بس اتخبطت في حاجة وانا طالع ع السلم والشبشب وقع قدام الشقة اللى تحتنا ! ياربي ايه الحظ دة ، وشي احمر فجأة لما سمعت صوت مرعب مش عارف اوصفه ، سبت الشبشب وطلعت شقتنا جري ومش شايف قدامي وحاسس ان حد ورايا بيجري ، دخلت وقفلت الأوضة بتاعتي وغطيت نفسي وكنت بتنفض وبترعش من الخوف ، سألت امي على الشقة دى وقولتلها حصل فيها ايه قالتلي ليه ؟ قولتلها بسأل بس ، قالتلي حصل حاجة معاك ؟ رحت حكيتلها اللي حصل ، ردت عليا وحكتلى اللغز اللى مستنيه من زمااان ..
(اغلب الأحداث حقيقية ، هكمل القصة بكرة لو لقيت تفاعل وفوت كويس). ♥
•مساعدوا أحداث القصة :
عبد الرحمن محمد عبدالتواب
Sara Magdy
•مصمم البوستر :
Mohaned Mostafa
أنت تقرأ
مجموعه قصص رعب(عالم أحمد طارق)
Horrorكل خميس من كل إسبوع الساعه 12 بعد منتصف الليل في قصه جديده💛🌼 قصص رعب يتضمنها الواقع☠ الأكونت الشخصي للكاتب💛 https://www.facebook.com/profile.php?id=100005698563137
