من قيمة يومين كدة كنت بقلب فى الفيس كالعادة حوالى الساعة 12 بالليل وسط هدوء تام فى اوضتى الضلمة ، ووشى باين من أثر اضاءة الموبايل ، لفت انتباهى صورة لشخص مرسوم باحترافية على هيئة كاريكاتير ، بالرغم ان كان ليا فى الرسم وبفهم فيه والمفروض ان الموضوع يكون طبيعى خالص ومااشغلش بالى بس للأسف محصلش دة ، الرسمة كانت نازلة فى جروب مشهور شوية وتقريباً صاحبة الرسمة ليها رسومات كتير فى الجروب دة ، واكتشفت دة لما تعمّقت ف الجروب أكتر ، المهم عجبنى اوى الطريقة اللى بترسم بيها وحسيتها مختلفة عن الرسم العادى ، دخلت البروفايل عندها ع الفيس كان اسمها "مروة وحيد" لقيت رسومات أروع بكتييير وحاجات تانية يتقال عليها "فن" فعلاً ، فضولى تغلّب عليا وفتحت الماسنجر بعتلها رسالة ..
- رسمك جميل جداً ، ممكن ترسمينى بالطريقة اللى بترسمى بيها دى !!
(بعد حوالى 3 ساعات ردت عليا وقالتلى) ..
= ميرسى دة من ذوقك ، يشرفنى انى ارسمك.
- ربنا يخليكى ويوفقك يارب.
= تسلم يارب.
- هتخلصيها امتى كدة !
= ممكن بكرة او بعده ، هحاول مأخرش فيها.
- لا عادى خدى راحتك.
= تمام ماشى.
- انا كدة كدة مش مستعجل عليها يعنى.
= خلاص تمام.
- تمام.
= اول مااخلصها هبعتهالك.
- تمام هستناكى.
قفلت معاها كلام وكان وقتها الفجر بيأذن ، قومت اتوضيت وقولت انزل اصلى فى الجامع بالمرة ، اتوضيت وطلعت خلاص وهنزل وطبعاً البيت عندى كلهم نايمين ، فتحت الباب وخرجت وقفلت الباب ورايا بالمفتاح ، لفيت وشى ناحية السلّم ولقيت المنظر اللى مكنتش اتوقعه ، السلم قدامى كله طين وكميات كبيرة ، رجعت لورا شوية بحيث انى اطلع اجرى و انط من فوق المكان اللى فيه طين بس لما رجعت وطلعت قدام وانا بجرى اتفزعت لما سمعت صوت صريخ قطة ، و اتضح انها كانت نايمة ع السلم وانا دوست عليها وانا بحاول انط الطين ، بصراحة خوفت جداً من صوتها لأن أول مرة اسمع صوت صريخ قطة بالشكل دة ، اترعبت اكتر وجريت ولسة هنط من فوق الطين لقيت رجلى اتزحلقت ووقعت فى الطين ، بس نزلت على رجلى وانا واقف تقريبا غرزت فيه ، اللى رعبنى اكتر ان رجلى لزقت فى الطين دة وكنت حاسس انى بتسحب لتحت و رجلى بتنزل فى الطين تدريجياً لتحت ، ساعتها حسيت ان صوتى راح لما حاولت اصرخ او استنجد بأى حد ، بس مفيش فايدة ورجلى بتتسحب اكتر لتحت فى الطين والسلم كله ضلمة والعمارة كلها نايمة ، بشكل سريع لقيت القطة اللى دوست عليها جاية من ورايا بسرعة و نطت على وشى وخربشتنى وكأنها بتنتقم مني عشان دوست عليها ، طلعت اقوى صوت عندى ولقيت أبواب من العمارة بتتفتح وجايين عليا جرى ، كنت انا وقتها استسلمت ووقعت بطولى فى الطين ، جم شالونى ودخلونى الشقة وحاولوا يهدونى ، حكيتلهم اللى حصل وهما استغربوا وفكرونى بكدب لأن هدومى مفيهاش طين تماماً ، و لا وشى فيه خرابيش من القطة ولما سألتهم قالولى ان مفيش طين برا أصلااً !!
اليوم اللى بعده الساعة 12 الضهر ..
صحيت على صوت رسالة ماسنجر ، فتحتها وفرحت جداً لمّا لقيت فيها الرسمة إللى طلبتها من مروة ، وعجبتنى جداً وحطيتها Profile Picture فى نفس الوقت ، مرت الأيام ومروة ما زالت بترسم اصحابها وتنزل رسوماتها كل يوم ، لحد ما فى يوم من الأيام لقيت رسالة منها على ماسنجر بتقولى ..
- إزيك !
= الحمدلله يافنانة انتى أخبارك ايه !
- تمام الحمدلله ، احمد أنت كويس؟
= ايه دة فيه ايه؟
- مفيش بسأل بس !
= لا قولى فيه ايه ؟؟
- مفيش داعى خلاص مفيش حاجة.
= مروة قوولى ايه اللى حصل؟!
- بص انا من ساعة ما رسمتك وانا بيحصلى حاجات غريبة.
= غريبة ازاى و ايه الحاجات دى !
- انا لما برسم بحط رسوماتى كلها فى المرسم بتاعى ، بس فى الفترة الأخيرة دى بقيت بحط الرسومات الجديدة جنب سريري لأن مفيش وقت اروح المرسم بتاعى ، وكان من ضمنهم الرسمة بتاعتك ، كانت الأيام بتعدى عليا طبيعية جداً ، رغم انى كنت قلقانة من موضوع إنك بتكتب قصص رعب وكنت خايفة ، بس إمبارح بالليل كنت بحس ان فيه حاجات بتتحرك ف اوضتى ، وبالرغم من انى مثبتة كل الرسومات بس رسمتك انت بالأخص وقعت وكانت مقلوبة على وشها ، فاا قلقت وكلمتك أعرف سبب دة لأن مابستحملش الرعب دة ولو لثانية.
= طيب انا معنديش فكرة عن الكلام دة انا مش ملبوس عشان عفاريتى يوصلولك.
- اومال اللى بيحصلى دة تسميه ايه؟
= والله ما اعرف انا مستغرب جدا من كلامك رغم انى مش أول مرة اترسم يعنى.
- خلاص مش مشكلة هحاول أجمد قلبى اكتر.
= لو حصل حاجة تانى كلمينى.
- تمام ، مع السلامة.
استغربت كلامها جداً وتفكيرى ابتدا يشتغل فى الموضوع دة وهل فعلاً القصص اللى بكتبها دى ليها تأثير بالشكل دة ! طب إشمعنى صورتى اللى اتقلبت ؟
أنت تقرأ
مجموعه قصص رعب(عالم أحمد طارق)
Horrorكل خميس من كل إسبوع الساعه 12 بعد منتصف الليل في قصه جديده💛🌼 قصص رعب يتضمنها الواقع☠ الأكونت الشخصي للكاتب💛 https://www.facebook.com/profile.php?id=100005698563137
