مجموعه قصص رعب(عالم أحمد طارق)

" The Dreaded Mask.. Part 2 "

لحد الآن انا مش فاهم ايه اللى حصلى وفين محمد إبراهيم ، بقيت عايش بالقناع على طول ومبقتش اقلعه نهائى ، جبت الموبايل بتاعى وكلمت المذيع اشرف علوانى وقلتله انى جاهز للحلقة ، بعدها ف يوم من الأيام جتلى رسالة غريبة جدا على موبايلى ، مكنتش اتوقعها تماماً ، رسالة من رقم مجهول
وكان مضمون الرسالة :
(أقرب حد ليك هو اللى عمل فيك كدة ، ارجع لشقة الدكتور وانت تتأكد) ..
عينى وسعت وقتها وحسيت بكهربا بجسمى وابتديت اترعش ، ف نفس اللحظة جالى تليفون من المذيع اشرف علوانى وكان بيأكد عليا إن الحلقة ميعادها بكرة ، قلتله تمام وقفلت معاه ، على مدار الفترة دى كلها بدور على رقم محمد إبراهيم ومش لاقيه نهائى ، فتحت فيس ابعتله رسايل مابيردش ، مفيش أمل ف انى اوصله تانى تقريباً ..
اليوم إللى بعده مر عليا وانا منمتش والساعة داخلة على 11 الضهر ، والمفروض اقوم اجهز لتصوير الحلقة ، وبالفعل عملت كدة ولبست الماسك ونزلت الشارع مشيت بيه وسط الناس وركبت تاكسى لحد ما وصلت الاستوديو ، اتصلت بالمذيع اشرف وقولتله انى وصلت الاستوديو قالى تمام خليك عندك وهبعتلك حد ياخدك ، قلتله تمام ، فضلت واقف مكانى لمدة دقيقة تقريباً ولقيت بنت جاية ناحيتى مبتسمة وبتقولى حضرتك أحمد طارق؟ قولتلها ايوة ، قالتلى تمام انا اسمى آية تبع استاذ اشرف علوانى ، خدتنى ومشيت ناحية باب الاستوديو ودخلنا جوة لقيت الاستوديو كبير جدا وكله إزاز حتى الارض ، وفيه مكان للضيف جنب المذيع وفيه قدامهم حوالى 50 كرسى لجمهور البرنامج ، دخلت وسلّمت على الاستاذ اشرف و رحب بيا جداً وقالى انا عارف كل اللى حصلك ، بس عشان وقت الحلقة قرب جدا هوريك الاسئلة إللى هقولهالك فى الحلقة ولو فيه سؤال مش عاجبك قولى ونلغيه خالص ، قلتله تمام وخدت منه الورقة بصيت فيها لقيت اسئلة عادية واسئلة صعبة شوية بس وافقت على اى حال وقولتله تمام يلا بينا ..
ثري .. توو .. وان .. أكشن
بسم الله الرحمن الرحيم سيداتى آنساتى سادتى ، أسعد الله مساءكم فى كل الأوقات و عودة جديدة و فريدة من نوعها من برنامجكم المفضل "أهلاً بيك" ، وضيف الحلقة معانا النهاردة هو ممكن يكون اغلبكم عارفينه لأن موضوعه الأخير كان قالب الصحف والمجلات وناس كتير اتكلمت على الحادثة الأخيرة اللى اتعرضلها ضيفنا النهاردة أحمد طارق ، أهلا بيك احمد نورتنا ..
-أهلا بحضرتك استاذ اشرف
=احمد مبدئياً كدة قبل ما ندخل فى اى تفاصيل عايزين نعرف ايه سبب الحادثة اللى حصلتلك عشان تلبس القناع دة ، و إشمعنى الشكل دة ؟
-إحم ، هو حرفياً أنا عشت بصعوبة بعد الحادثة دى والحمد لله انى قاعد قدام حضرتك دلوقتى واتكتبلى عمر جديد ، كان سببها سفر .. كنا مسافرين بعربية و اثناء السفر الكاوتش فرقع واللى كان بيسوق معرفش يتحكم بالعربية فاا اتقلبت بينا ، و ازاز العربية كله نزل على وشى و اتدمر خالص.
=اممم حمدلله على سلامتك والحمد لله انها عدت على خير.
-الحمد لله
=الاستهتار ياجماعة لازم يؤدى لنتايج سلبية زى دى وو.... إيه؟ معانا مداخلة تليفونية ؟؟ ايوة نعم تمام تمام معانا الاستاذ "صادق" حابب يشارك معانا فى الحلقة ، الوو اتفضل يا صادق ..
-الووو مساء الخير استاذ اشرف
=مساء الانوار صادق اتفضل سامعك
~انا بصراحة مستنى الحلقة دى من زمان جدا وبحب البرنامج بتاع حضرتك اوى وكمان الاستاذ احمد طارق انا من اقدم متابعينه وبحب قصصه جداً.
-تسلم يا صادق وشرف لينا انك متابعنا وبتتواصل معانا ..
~ربنا يخليك يا دكتور الرعب و الف سلامة عليك ، بس كان عندى موقف صغير كدة حصلى حقيقي كنت حابب اشارك بيه ..
=اكيد ينفع اتفضل اتكلم سامعينك
~ بص هو ف ليلة عادي قبل زي اي ليلة قبل ما انام كنت بكلم خطيبتى ، المهم بعد ما كلمتها كده وخلصت و نمت ع طول بس و انا ف نص الليل و كنت ف نص نومي يعني رايح ف النوم ، ف الاول سمعت صريخ واحدة جمبي ، صريخ فظيع اتفزعت و فتحت عيني كده بالراحة اللي هو لسة قايم م النوم فمش قادر افتح عيني ، لقيت واحدة واقفة جمب السرير و ماسكة الفون بتاعي و راحت رزعاه ف نص السرير و هي بتصرخ جامد ، للحظة سمعت خبطة التليفون ع الارض جامد اوي مع انها حدفته ف نص السرير ، ببص تحت السرير لقيته فعلا واقع ف نص السرير ، اخدته و انا مرعوووووب جدا و طلعت اجري بسرعة على بابا ..
=طب يا صادق الاول قبل ما تكمل هو موبايلك ممكن تكون انت اللي موقعه !
~حضرتك السرير بتاعي لازق ف الحيطة و التليفون كان ع طرف السرير لازق ف الحيطة يعني استحالة يوقع ولو نفترض افتراض ضعيف اوي انه وقع ، فاا السرير كبير لو وقع هيقع ف الطرف مش النص دا زائد اني الصبح ببص للفون لقيت 3 اثار عليه ، اثرين منهم حرق و الاثر التالت خبط ، فاا دا يفسر كلامي ..
=اه تمام كدة كمل ..
~المهم لما روحت لبابا جريت صحيته من النوم و انا بتكلم بطريقة غريبة جدا اللي هو زي الاطفال " بابا بابا في واحدة عندي ف الاوضة و خضتني و رمت التليفون بتاعي ع الارض " بتكلم كأني طفل بالظبط دا من الخضة طبعا ، ابويا شاف منظري و قالي وهو مستغرب "واحدة ايه" قلتله انا هنام معاك قالي لا تعالى ، و جه معايا الاوضة يشوف واحدة ايه و ايه اللي عمل فيا كدة ، المفاجأة الأكبر أنه ملقاش أي حاجة ، ابويا بطريقته قَلَب الموقف لهزار قام ضاحك و قايلي ابقى غطي *** وانت نايم بس اعتقد و الله اعلم ان حصل معايا كدة لاني كنت بكلم خطيبتى قبل ماانام و انا جمبي المكتب عليه المصحف بس انا ملمستش المصحف لكن كان واقف ع المكتب كدة و باين و الله اعلم ..
=تمام يا صادق و اشكرك لمداخلتك معانا ، احمد الناس قالتلى إنك بتكتب قصصك مرة كل اسبوع ، و دة الطبيعى ، لكن إللى مش طبيعى إنك بتسيب الأسبوع كله وبتكتبها فى اخر ساعتين فى يوم الخميس ، هل الكلام دة حقيقي؟ ولو حقيقي بتعمل كدة ازاى وبتجيب افكار منين؟
-الفكرة بتجيلى من مجرد كلمة اتقالت فى اى موقف ، الكلام دة حقيقي فعلاً ، وانا لازم اعمل كدة لأن لو كتبتها قبل يوم الخميس هبقا عاوز انزلها فى الوقت اللى خلصتها فيه ومش هستنى للخميس ، فاا انا بفضل انى اكتبها الخميس عشان أول ما اخلصها انزلها على طول.
=طيب احمد انا وكل الناس كنا مؤيدين للاتفاق اللى قلتلك عليه ، خصوصاً ان جمهورك بيزيد يوم عن التاني ، ونسبة كبيرة من الناس متعرفش شكلك لحد دلوقتى ، و كمان فيه ضغط مداخلات كبير جدا من الناس وانا معطله ، عايزين نشوف شكلك الحقيقي إللى مخبيه عن كل الناس طول الفترة دى.
(انا كنت رافض الفكرة دى تماما بس وافقت علشان اتفرج على الحلقة بعدين واشوف شكلى اللى مش عارف اشوفه).
-ماشى مفيش مشكلة بس مش هقدر اتحرك من مكانى لو شلت القناع من وشى ، وابتديت احط ايدى على وشى بحركة تردد والاستوديو هدوء تام وكله مستنى اللحظة دى ، حطيت ايدى على القناع وحوشته بطريقة بطيئة والدنيا اسودت قدامى ، مكنتش سامع غير صمت وهدوء تام ، مكملتش دقيقة ولبست القناع تانى وبصيت على الناس اللى قاعدين لقيتهم كلهم فى حالة ذهول وكأنهم كانوا باصين على حاجة غريبة جدا ، بصيت للمذيع لقيته نفس الكلام برضو ، بس بلع ريقه وعينيه بدون ما ترمش وقالى ..
=اتمنالك الشفاء العاجل إن شاء الله انا وكل اللى بيحبوك ، ومعانا مداخلة تليفونية تانية من "كريم" ونقول الوو مساء الخير .. !
~مساء النور ازيك يا استاذ اشرف ؟
=مساء الورد حبيبي ازيك انت اخبارك
~الحمدلله يا استاذ اشرف انا بحبك اوى ومن اشد جمهورك.
=يارب يخليك يا كريم تسلملى
~كنت عايز اسلم على دكتور احمد واحكي موقف كدة حصلى من فترة
-حبيبي يا كريم منورنى ، اتفضل سامعينك ..
~فى يوم من الايام كان فيه راجل اعرفه عايش معانا فى الشارع اللى جنبنا ، بس من قريب ساب المنطقة وراح أجر بيت في الغابة ، وكان البيت دا مفيهوش حد خالص من فتره كبيره جدا ، وصاحب البيت دا غيّر ديكور البيت عشان يأجره ، وجه راجل ومراته وعياله يأجروا البيت وراحوا البيت ونقلوا حاجتهم كلها ف البيت ، وكان اول يوم ليهم وكان يوم جميل بالنسبالهم ،وعدى كام يوم على الحال دا
وكنت مبسوط جدا ان البيت مطل على الغابة ، واطفالي كانوا مبسوطين جدا عشان البيت دا فيه حديقة اطفال وألعاب ..
وكنت دايما بروح شغلي الصبح وباجي الليل متأخر ، وكنت ع طول بنام بدري عشان الشغل ، بس مراتي كانت عكسي كانت بتحب تسهر قدام التلفزيون ع طول ومرت الايام ع الحال دا ، و ف يوم لقيت مراتي بتصوت وجاية بتجري عليا ووشها باين عليه الرعب والخوف وبتقولي في حاجة غريبة ف البيت دا ، البيت دا في حاجة مش مضبوطة ، ف قولتلها ف ايه اللي حصل ؟ لقيتها بتقولي انا كل يوم بسمع صوت ضجة وحاجات بتخبط وترزع ف المطبخ وساعات بكون قافلة نور الحمام ألاقي النور فتح لوحده ، وبسمع صوت اطفال بتصوت وصوت رجلين بتجري ف كل حتة ، ف انا طبعا دوري اني اهديها وحاولت اهديها وقولتلها تلاقيها اوهام من قلة النوم ، انتي بس اهم حاجه تصلي وتدعي ربنا وكل حاجة هتبقى تمام ، وفي اليوم اللي بعديه روّحت من الشغل وكنت تعبان اوي لقيت مراتي واقفة ف ركن من البيت ومصدومة وايديها بتترعش ومش على بعضها
قولتلها ف اي اللي حصل تااني؟؟
قالتلي وانا قاعدة ف الصالة لقيت ست قعدت قدامي وبتكلمني وبتقولي انا وعائلتي ساكنين ف البيت دا من زمان ولازم تمشوا من البيت عشان البيت مش هيكفي أسرتين ، وانا لسة مش مستوعب و مذهول من اللي مراتى بتقوله ، ولقيت راجل قصير قدامي وبيقولي مش عاوز اشوفك انت واسرتك هنا تاني عشان احنا سكان البيت الاصليين ، وجينا هنا قبل ما تيجي انت بسنوات كتيرة ، امشوا بدل ما نأذيكم .. ف مشينا انا وأسرتي عن البيت الغامض دا.
=كلام غريب والله يا كريم و احييك على شجاعتك وانك قدرت تحكى بقلب جامد لأن انا حاسس انى خوفت بصراحة وفيه حاجات حواليا هههههه ، رأيك ايه فى الكلام دة يا احمد ؟
-والله يا استاذ اشرف هو لو الكلام دة تأليف فا المؤلف محترف ومبدع ، لكن لو بجد فا انا حاسس ان فيه أفورة شوية فى الكلام.