قدوم الماضي (مكتملة)

البارت الثالث

الكاتبة : سارة الشمري 🖤

ما حيلتى وأنا المكبل بالهوى ناديته فأصر أن لا يسمعا
وعجبت من قلبي يرق لظالم ويطيق رغم إبائه أن يخضعا
فأجاب قلبي: لا تلمني فالهوى قدر وليس بأمر نا أن يرفعا
والظلم في شرع الحبيب عدالة مهما جفا كنت المحب المولعا

وكفت على حيلهة وحجت بلهفة : طمني شصار ..
ثواني وما اشوف غير التليفون وكع من ايدهة وطاح بالكاع ..

هي كعدت عالقنفة وحطت ايديهة على وجهة وكامت تبجي ..

كمت بسرعة بخوف ورحتلهة ..
كعدت يمهة ولزمت ايديهة : خالة شبيج .. شصاير .. منو هذا الي اتصل عليج ..

رفعت ربطتهة وتمسح بدموعهة وتبجي : راح .. راح بدون ما يشوفني ..
طبكت حواجبي بدهشة : منو هذا الي راح .. خالة اهدي ..
رفعت عيونهة الي ونضراتهة حاولت افهمهة ما كدرت .. رجعت نزلت دموعهة : اخوي ..

فتحت عيوني من الصدمة .. : اخوج ؟؟...
خالة سامية : اي اخوي .. اخوي بالرضاعة ..

حجيت بصدمة : بس انتي كلتي قبل ان ما عندج اهل او اقارب ..
حطت ايدهة على راسهة : عندي اهل .. بس الزمن بعدني عنهم ..
كامت تبجي واني حضنتهة واواسي بيهة ..

ورة شوية رفعت راسهة علية وحجت بأنكسار : سامحيني ميس .. سامحيني ..

كامت وعافتني بحيرتي .. شنو معنى هذا كلامهة .. هاي ثاني مرة تحجي هيج .. هي شسوت حتى اسامحهة ..

بقيت كاعدة وافكر .. كل شوي اريد اروحلهة بس اكول خاف تريد تبقى وحدة ..
خواتي كعدن من النوم يتريكن ويسولفن ..
اني كل تفكيري جان وية الخالة سامية ..

حسيت بخنكة من التفكير والضوجة ..
بدلت ملابسي ورحت لبيت انوار ..

دكيت الباب واستقبلتني امها وشكلهة تريد تطلع : هلو ميوسة حبيبتي ..
ابتسمتلهة : هلو خالة شلونج .. وين انوار ..
اشرت فوك : انوار نايمة لهسة .. كعديهة اذا تكدرين حتى لا تسهر بالليل ..
ميس : انشالله خالة ...

طلعت هي واني دخلت لبيتهم ..
بعدني ببداية الدرج وصار بوجهي سامي اخو انوار..

شافني وابتسم : هلو ميس .. شخبارج ..
رديتلة الابتسامة : اهلا سامي الحمدالله انت شخبارك ..
جاوبني بأبتسامة غريبة : الحمدالله هسة صرت احسن ..
ما افتهمت وما اهتميت : دوم .. يلة بالاذن اروح اشوف انوار ..
سامي وهو يفسحلي طريق : تفضلي اخذي راحتج ..

عفتة وصعدت فوك ودخلت لغرفة انوار مباشرةً لان متعودة عليهة ..
شغلت الضوة وفتحت الشبابيك وشغلت التلفزيون ..

انوار غطت راسهة باللحاف : ميييس يالمزعجة اطلعي برة ..
وخرت اللحاف عن وجهة : كومي اكو واحد ينام لهسة ..
كعدت على حيلهة وشكلهة مخبوص خبص : ياختي عطلة والله عطلة .. اني ما صدكت اخلص امتحانات حتى انام براحتي ومحد يزعجني ..