قدوم الماضي (مكتملة)

البارت الرابع عشر

الكاتبة : سارة الشمري🖤

ليس في العالم وِسَادَةٌ أنعم من حضن أمي
شكسبير

قاطعنة دك الباب ..
كامت نورهان فتحتة وسمعت صوت عمي : افتحي الباب خل ادخل غياث ..

كمت بسرعة وكفت .. حطيت شالي على راسي احتراماً لوجود عمي ..

دخل عمي ويدفع بالكرسي المتحرك مال غياث ..
نزلت نضراتي الغياث ..

بلعت ريكي .. ما تخيلت بيوم من الايام اشوفة بهالحالة وعلى هالكرسي .. ضعفان ووجهة شاحب .. والضيقة مبينة علي ..

حجة عمي وهو يباوع لغياث .. : اسمع غياث .. بت خالك هسة صارت امانة برگبتك .. دير بالك عليهة ولا تزعلهة ..

غياث هز راسة وهو يباوع بالفراغ وطابك حواجبة وبدون ما يحجي ..

طلع عمو من الغرفة ..
بقيت واكفة .. غياث حرك عجلات الكرسي وانطاني ضهرة ..

حجة بصوت حاد : ما راح اطول السالفة .. انتي بجهة واني بجهة .. ما تتدخلين بية .. ومثل ما كتلج من قبل ما جبتج برضاتي .. سامعة ؟؟

تنهدت ورحتلة .. صرت كدامة وكعدت على رگبي ..
حجيت واني اباوع لعيونة : شنو الي يزعجك من وجودي يمك .. ليش ما تريدني اكون قريبة منك ..

باوعلي وحجة بأنفعال : انتي ليش مصرة تخربين حياتج وية واحد مثلي .. بكل بساطة جنتي تكدرين تطلبين الطلاك وتخلصين مني وتعيشين حياتج مرتاحة .. ليش اصريتي الا تبقين وياي ..

حجيت بسرعة ودموعي نزلت : ماريدهة حياتي وانت مو بيهة .. غياث افهم والله احبك .. وادري بيك تحبني بس انت ..

قاطعني وهو يلزمني من زندي وحجة بحدة : لا تألفين حجي من يمج .. انتي ولا شي بالنسبة الي غير بت خال .. وكتلج وراح اعيدهة .. لا تقربين مني .. ما محتاج صدقة منج او شفقة من اي احد .. حتلو فقدت المشي بس اكدر اعين روحي ..

دفعني وطحت بالكاع ..
رفعت راسي وحجيت واني امسح دموعي : ماشي غياث .. سوي التريدة .. واني هم اسوي الي اريدة مثل ما كالي عمي ..

درت وجهي وعفتة .. شكد عنيد .. ما جا يفهم ان سبب وجودي هنا لان احبة مو لان مقهورة او اشفق علي .. بس ما اكدر اضغط علي .. اذا بقيت اعاملة بأهتمام واخاف علي اكيد راح يبقى يفكر بهالطريقة ..

طلعت من الغرفة لان الوقت جان بعدة عصر ..
نزلت وكعدت يم عمتي سارة والبنات ..

بقيت يمهم لحد ما صار وقت العشى .. ما صعدت للغرفة عمداً حتى لا يكول مهتمة بي .. لان اذا اهتميت بي راح يكول تشفق علية ..

اجة وقت العشى .. عمتي مسوية شوربة لغياث ..
حطيتلة عشا بصينية اني وياه حسب ما كالت عمتي وما كدرت اكللهة لا ..

دخلت ولكيتة بعدة بالكرسي مالتة ..
تذكرت كلام نورهان ان لازم يتمدد ويريح ضهرة ..

حطيت الصينية بالكاع ورحتلة بسرعة ..
سحبت الكرسي ومشيتة بأتجاه الجرباية ..