قدوم الماضي (مكتملة)

البارت الثلاثون

الكاتبة : سارة الشمري🖤

يكتبون ليُصفق لهم الآخرون ..
وأكتب لأن أحدهم صفّق على خدي بقوة ورحل ..
ندى ناصر ..

عزام //

فتحت عيوني واني احس بأنفاسي ضيقة ..
جفوفي ثكيلة وألم بأيدية ..
باوعت بالغرفة عرفت اني بالمستشفى ..

التفتت لجهة الدكتور الي حجة بأبتسامة : الحمدالله على سلامتك ابو خالد ..
هزيت راسي وماكدرت احجي لان حاطين الاوكسجين على خشمي ..

حط ايدة على كتفي : ماشالله رغم كبر سنك الا ان بنيتك قوية وكدرت تتحمل .. غيرك لو اصغر منك جان ممكن يموتون بالمي بسبب شدة برودتة والشد العضلي ..

حمدت ربي بداخلي .. معنى كلامة ان اني بخير وما بية شي ..
باوعتلة ووخرت الاوكسجين : وافي .. صيحلي وافي ..

هز راسة وطلع وورة شوية دخل ووياه وافي ..
الدكتور : لا تطول رجاءً .. المريض لازم يرتاح ..

طلع الدكتور ..
التفتت لوافي بسرعة : جيبلياهة وافي .. اريد اشوفهة ..
حط ايدة على كتفي : اول شي الحمدالله على سلامتك .. وثاني شي عمي انتة ارتاح هسة .. وانشالله بس تطلع من المستشفى اني اجيبهة الك ..

تنهدت واني اغمض عيوني : خفت ياوافي .. خفت اموت واني ما حضنتهة وما شميتهة .. شلون اواجه سمرا واكللهة خليت بتنا بحاجة ام واب رغم وجود ابوهة ..
شلون اكللهة متت واني بعدني ما سامع كلمة بابا منهة ..

وافي : لا تخاف ياعم .. عمرك طويل انشالله .. وراح تشوفهة وتسمعهة تكلك بابا .. تدري اني عفتهة تبجي تريد تجي تشوفك بس اني ما خليتهة لان تعرف كلهة زلم هنا وناس رايحة جاية ..

حسيت بشي من الامل شعشع بكلبي : تبجي علية ..
هز راسة وهوة يتنهد : اي عمي .. اعذرني ما كدرت اسكت وحجيتلهة الحقيقة كلهة من البداية .. بقت تلوم بروحهة ومتندمة ..

حطيت ايدية على عيوني واني امسح دموعي ..
حجيت بلهفة : يمتة يطلعوني من المستشفى ..
ابتسم : لا تستعجل عمي .. اهم شي صحتك والباقي يجي بعدين ..

دخل الدكتور وطلب من وافي يطلع ..
غمضت عيوني واني اتنهد ..

غدير //

باوعت للساعة صارت ١٠ .. حبوبتي وعماتي راحن للمستشفى شافن تطمنن على جدي ورجعن وما طولن حتى ساعة ..

كاعدين بهدوء .. كلساع واباوع لهديل الي منزلة راسهة وكل ما اتذكر سوايتهة بودي اكوم اكفشهة هسة ..

طلعت من الصالة باوعت من الشباك برة كلهة سيارات .. الناس جاي يجون لهنا لان ميكدرون يرحون للمستشفى بليل ..
جدو الكل يعرفة والة جاه وناس تحترمة وتقدرة ..

على هالهوسة اكيد ما اكدر اروح للبيت ..
مستحيل ابقى ابيت اهلي لان ما اضمن شنو ممكن اسوي بهديل وهم ما اطيق اشوفهة من بعد عملتهة ..