قدوم الماضي (مكتملة)

البارت الخامس

الكاتبة : سارة الشمري🖤

في بعض الأحيان يعمل الشعور بالوحدة على إصدار ضوضاء عالية حنيناً للماضي. "أرون بين"

شفت باب مسدود وبصف الباب الخارجي ..
تقدمت بهدوء وفتحت الباب ..

استغربت ليش الغرفة ضلمة ؟؟؟...
مديت ايدي تلمست الحايط وفتحت الدكم مال الضوة ..

فتحت عيوني ولا اراديا شهكت بصوت عالي ....

بسم الله الرحمن الرحيم ..
شنو ذولة ...
بس فتحت الضوة شفت فراشات وناس نايمة بيهة او بالاحرى شباب ..
بس شهكت اكو بيهم كمزو واكو رفعو روسهم ..

والله لو ما متحركين جان كلت جثث ...
من الصدمة بقيت جامدة بمكاني ما تحركت ..

الي كعدو من شافوني فتحو حلكهم ..
يباوعون علية واشكالهم تضحك .. شعرهم مخلبص وعيونهم منفخة من النوم وفاتحينهة علية ..

فجأة انفتح الباب الخارجي الي بنفس هاي الغرفة الي شكلهة ديوانية رجال لان بيهة قنفات وباب للخارج ..

انفتح الباب ودخل شخص لابس زي عسكري لونة نيلي ولازم بيدة الطاقية العسكرية ..
شكلة ما انتبه لوجودي ..

تقدم عالشباب وصار يضرب بيهم ويكعدهم : كووم انتة وياه راح يجي جدي .. واذا شافكم تبدي الاسطوانة مثل كل مرة وتاكلون طن رزايل .. كوووم ..

يرفس بيهم ويشيل البطانيات عنهم .. واني فاتحة حلكي ..
٣ منهم كاعدين على حيلهم ويباوعون علية ..

واحد منهم حجة وية الي لابس عسكري ..: غياث انت تشوف الي احنة نشوفة لو جاي نحلم نفس الحلم ..

غياث طبك حواجبة مستغرب ورفع راسة بأتجاهي ..
بس شافني كعد بصف الي حجة بسرعة وهو يباوعلي .. : رياض منو هاي ..
رياض هز اكتافة وعيونة علية : مادري .. طبت علينة فجأة ..

غياث وهو يضرب الي نايم وراه : انس كوم .. شوف هاي منين ..
كام واحد وشكلة يضحك لان شعرة واكف ..

انس حجة بأنزعاج وهو مغمض : خيير انت وهو ما تخلون الواحد يعرف ينام ..
غياث ضربة على رگبتة : انس هاي منين ..

انس فتح عيونة ومن شافني فتحهن بالزايد ..
اني لهسة واكفة بمكاني واراقب حركاتهم ومصدومة ..

رياض : شنو هاي جني ..
انس : لا الجني ما يسبح .. شوف شعرهة مبلل ..
غياث : والجني يلبس تراك ..

حجيت لا اراديا : اعوذ بالله من الشيطان الرجيم ..
انس حجة بسرعة : انتي الي اعوذ بالله من الشيطان الرجيم .. منو انتي ..

حجيت بسرعة : انتو الي منو .. شتسوون هنا ..
انس وهو يتخوصر : يسلام .. هذا بيتنة .. انتي شتسوين هنا ..

حجيت واني طابكة حواجبي : اني ميس ..
همة واحد باوع بوجه الثاني .. : هاااااه ..

غياث : يعني انتي خالتي الجديدة ..
انس : وعمتي الجديدة ..