قدوم الماضي (مكتملة)

البارت الثالث والعشرون

الكاتبة : سارة الشمري🖤

كانت رقيقة في مظهرها لكن شخصيتها قوية وثابتة مثل رئحة الياسمين النفاذة والفريدة التي تبث إحساسا بالدفء لا تملكه الورود الأخرى
خولة حمدي

قاطعهة وافي بصرخة هزت البيت : كوووووثر .. ميس شريفة غصباً عليج .. والبارحة صارت مرتي بشرع الله ومو بس عالورق .. وهسة اكلك خالي اخذ مرتك وبيتي يتعذرك ..

هوة يحجي واني اباوعلة وفاتحة عيوني ..
ما اهتميت وحتى ما سمعت شكالو ونضراتي موجهة بس لهالانسان الي متمسك بأيدي وعبالك يريد يحميني من الكل ..

حسيت بأيد على كتفي فززتني من صفنتي ..
باوعتلهة وشفت الدموع مالية وجهة ..

ارتجف كلبي واني اشوفهة .. شكد مشتاقتلهة ..
نسيت كلشي .. ما يهمني بعد .. الي يهمني هسة هو ان محتاجتهة .. ومشتاقة لحضنهة ..

حتلو سوت اي شي بية بس هي ربتني .. ما عافتني مثل الباقين وحرمتني منهة .. شلون كدرت اقسى علية هالكد وابقى بدونهة .. شلون كدرت اقارنهة بقذارة ابو خالد ..

سحبت ايدي من وافي وبسرعة حضنتهة ونزلت دموعي .. لا ارادياً طلعت مني كلمة : يمة ..
حضنتني حيل وهي تشمني وتمسح على راسي : يعيون امج .. سامحيني يمة والله مو بيدي ..

تمسكت بيهة اكثر : اني الي اسفة يمة .. ماجان لازم اتصرف هيج بس الغضب عمى عيوني ..

وخرت عنهة ومسحت دموعي ..
التفتت لوافي الي سحبني من ايدي ومحد كدر يحجي شي ..

مشيت وياه طواعية واني كل تفكيري وية الي صار اليوم ..
صعبة عالبنت يتهمونهة بشرفهة .. واتهام باطل وهي ما تكدر ترد .. صح وافي ما سكت ..

بس ليش هالكد واثق بية وكال شي مو صحيح ..
الثقة الي جانت بكلامة مو شوية ..

دخلت للغرفة وراه ..
سد الباب والتفتلي ..: طلعي البكلبج .. ما يحتاج تسكتين اكثر ..

سمعتة وعبالك اطلق العنان الي وصارت دموعي تنزل لا ارادياً ..: ليش ماكدر ارتاح .. ليش كل يوم مصيبة لاحكتني .. شسويت بحياتي اني .. ليش محسسيني وكأني مجرمة او شي مو زين بنضراتهم .. تعبت والله يومية مشكلة تجيني منين مادري .. شسويتلهم حتى يتمنولي كل هالسوء .. لدرجة يتهموني بشرفي ..

سكتت متفاجأة من سحبني لحضنة وايدي حاوطتني .. ايدة الثانية تمسح على شعري بحنان ..
رفعت ايدي وتمسكت بي اكثر .. لاول مرة احس بحنانة .. لاول مرة ارتاح بحضن شخص لهالدرجة ..

وخرت عنة وباوعتلة مستغربة : ليش حجيت هيج كدام كوثر ..
تنهد وهو يباوعلي : ماجان عندي حل حتى اسكتهة .. واذا بقت تحجي راح تكسر كلبج ..

حط ايدة على خدي برقة وحجة بهدوء : عوفي كوثر هسة .. نسيتي اليوم زواج شهاب و بت اختج .. اذا تردين اوصلج تجهزي .. غيري جو..