قدوم الماضي (مكتملة)

البارت الرابع والعشرون

الكاتبة : سارة الشمري🖤

يا أنتِ.. يا سُلطانتي ومليكتي ‏يا كوكبي البحريَّ، يا عشتاري
‏إني أحبكِ دون أي تحفّظٍ
‏وأعيش فيكِ ولادتي ودماري ‏..

قاطعنة صوت من الباب الي جان مفتوح شوية : من غير فصلات الابتدائية ٢٢ مرة ..

فزيت من نومتي وباوعتلة ..
حاط ايدينة بجيوب البجامة مال النوم ومايك بجسمة وساند كتفة على حافة الباب وابتسامة هادئة مرسومة على شفايفة ..

سامية : حافضهن جم مرة ولك ..
وافي : مو انتي جنتي تتصلين علية وتكليلي اليوم ميس تعاركت وانفصلت ..
باوعت لخالتي سامية بنص عين ..
سامية : احم .. انتة عليمن جاي ومقتحم الغرفة .. شرايد ..

وافي رفع اكتافة ببساطة : اريد اخذ مرتي ..
كلبي دك بسرعة من كلمتة .. : احم .. اني اليوم ابقى يم ماما سامية .. مشتاقتلهة .. روح نام انتة ..

رفع حاجب ونزل الثاني : ومن منو اخذتي الاذن ..
ميس : ما يحتاج اخذ اذن احد حتى ابقى يم امي ..

شهكت من حسيت نفسي بالهوى وايدين وافي محاوطتني ..
تمسكت بي حيل وحجيت بخوف : وافي نزلني لا اطيح ..

باوع لخالتي بأبتسامة : تصبحين على خير خالة ..
حجت وابتسامتهة مالية وجهة : وانتة من اهلة حبيبي .. اخذو راحتكم ..

طلع من الغرفة واني لازمة ياخة التيشيرت مالتة بخوف : وافي خلص سويت الي براسك .. نزلني هسة اكدر امشي .. نزلني لا اطيح ..

وكف وقرب وجهة مني وخشمة صار ملاصق لخشمي : وتتوقعين تطيحين وانتي بيدي ؟؟..

كمزت على صوت كحة مصطنعة ..: احم احم ..
باوعت اتجاه الصوت شفتة ليث حاط ايدة على عيونة سادهن ..

وافي بشبه ابتسامة : خير ليث ..
ليث : ممكن توخرون اريد اعبر ..
وافي رجع لورى وهو شايلني وسوة طريق لليث ..: تفضل ..

مشى ليث وهو يدردم وجنة يريد يسمعنة : ناس لا خجل ولا مستحى .. عينك عينك وبنص البيت .. ما يكولون اكو عزابية ..

وافي حجة بصوت حاد بس بأبتسامة : اسمعك ترة ..
باوعلة ليث وحجة وهو طابك حواجبة : بعد احسن اسمعني .. بلكي تتعلم الادب والاخلاق وما تسوي اشياء 18+ خارج غرفتكم ..

من المستحى ضميت وجهي بصدر وافي ..
اما ليث ف شرد من بعد ما ذب حجايتة لان يدري بيهة مو قليلة واذا لزمة وافي مادري شنو ممكن يسوي بي ..

دخلني وافي للغرفة وسد الباب برجلة ..
نزلني بالكاع ..
باوعتلة وتخوصرت : ارتاحيت هسة .. تفشلت كدام ليث .. هسة شيكول ..

دار وجهة ومشة وحجة ببرود : معليج بي ..
طبكت حواجبي : ليش جبتني .. رايد شي ؟
باوعلي وحجة بأبتسامة وببساطة : لا .. طفي الضوة ونامي .. تصبحين على خير ..