قدوم الماضي (مكتملة)

البارت الثامن العشرون

الكاتبة : سارة الشمري🖤

الحب لذيذٌ جداً ..
غير أننا نقترضه من صناديق الوهم الربوية
ونسدّده ألمًا مضاعفًا بعد حين !
ندى ناصر,

طبگت حواجبي واني اشوفة رايح لغير طريق البيت ..: وافي وين رايح .. هذا مو طريق البيت ..
حجة بهدوء : ادري .. هسة تعرفين وين رايحين ..

تنهدت وسكتت واني ارجع راسي عالكشن بتعب ..
حطيت ايدي على گلبي واني احس بخنگة ..
اباوع للطريق وللناس مادري ليش احسة بدون لون ..

التفتت لوافي الي لزم ايدي وضغط عليهة : ميس بيج شي .. تحتاجين تنزلين شوية ..

هزيت راسي بلا واني انزل الجامة واقرب وجهي منهة واخذ نفس واني مغمضة عيوني : كل الي احتاجة هسة الهوى .. احس بداخلي خنگة .. بوجود كل هالهوى والاوكسجين بس هم احس مخنوگة ..

شغل المسجل وصدى الصوت بكل السيارة بسورة البقرة ..
غمضت عيوني واني احس الكلمات تنزل بداخل روحي وتنشر الطمأنينة بداخلي ..

ورة نص ساعة وصلنة .. فتحت عيوني استغربت واني اشوف المكان .. : وافي ليش جايبني هنا ..
فتح الباب وهوة ينزل : انزلي وتعرفين ..

نزلت واني كلي فضول واستغراب اريد اعرف شنو السبب الي خلى وافي يجيبني لمعرض سيارات ..

وكفت يمة شبك اصابعة بأصابعي ..
مشيت وياه واني التلفت بكل مكان ..
المكان فخم وحلو وبداخلة كل اضوية وسيارات منوعة وملونة ..

اشوف الكل يباوعون علي .. اسمعهم يقدمون الة التحية بكل احترام : صباح الخير استاذ وافي ..
وافي يهز راسة الهم بأبتسامة : صباح النور ..

حجيت بهمس : وافي ليش جايبني هنا .. شكو بهالمكان .. شنو هالشي المهم الي خلاك تجيبني واني هستوني مخلصة امتحان وتعبانة ..

امشي وياه ووصلنة لغرفة وبصفهة مكتب ..
وافي اشر للي كاعد بالمكتب البرة : رضا لا تدخل احد للمكتب ..
رضا حجة وهوة واكف : حاضر استاذ وافي ..

دخلني للمكتب وسد الباب ..
التفتلي وحجة وهوة يشيل الجاكيت مالتة : عجبج المكان ..
ميس : اي حلو .. بس ما جاوبتني على سؤالي .. ليش جبتني هنا .. هذا مكانك وشغلك اني شسوي هنا ..

تقدم مني ولزم ايدي حجة وهو يباوع بعيوني ..: كلشي جاي تشوفينة هسة .. هالبناء والي بداخلة من سيارات هوة الج ..
طبگت حواجبي : شنو يعني الي .. شلون ..

وافي : يعني هالمكان بأسمج .. انتي صاحبة كلشي بهالمكان ..
قبل سنين من هسة جنت اديرهن بمكان للأيجار بس قبل اسبوع خلصنة بناء هالمعرض ..
جبنة السيارات و كل الي يشتغلون هنا ..

لزمت راسي بدوخة : وافي شجاي تحجي .. كلشي ما جاي افهم عليك ..
لزمني من ايدي وكعدني عالكرسي وكعد على رگبة كدامي : شوفي هذا البناء تسجل بأسمج .. كلشي هنا جاي يندار وكل ورقة تطلع منا يكون مكتوب عليهة اسمج انتي ..