قدوم الماضي (مكتملة)

البارت التاسع

الكاتبة : سارة الشمري✍🏻

من أين أبدأ هذا الألم وهذا الحزن الذي صار مثل الفيض يملأني ويقودني نحو يأسي الكبير ؟

رجع ضهرة عالكرسي ويباوع بوجهي وييفرك لحيتة بتفكير ..
دار وجهة وحجة ببرود : هالطلب مرفوض ..

طبكت حواجبي : شنو مرفوض .. ليش ؟..
حجة بحدة : كلت مرفوض .. وهالزواج ما يصير ..

حجيت بعصبية : حرام عليك ترة الولد يحبهة ..
رفع راسة بسرعة الي : روحي كليلة ما يصير يحبهة لان مستحيل تصير الة بيوم ..

باوعتلة بقهر : انت بكل مرة تثبت انك شخص متخلف وما عندك رحمة بكلبك .. يعني مو بس اني حرمتني من اهلي .. تريد تحرم حفيدك من الي يحبهة وتحرك كلبة .. بس حتى ترضي غرورك وكرامتك الي ما تسمحلك تناسب وحدة تشتغل يمكم .. تفكير همممجي ..

طلعت من الغرفة وضربت الباب وراي حيل ..
شكد اكره هالانسان يربي ..

طلعت واني افكر شنو ممكن اكول ل انس ..
دخلت للصالة وصار بوجهي انس وعيونة بكصتة من العصبية ووجهة احمر ..

طبكت حواجبي : انس شبيك ..
حجة بصياح : وخرررري من وجهي ..
باوعتلة بعصبية : شبيك تصيح ..

انس : ميس عوفيني لخاطر ربج .. ترة واصلة لكصتي مو لخشمي .. لا هسة اطلع حرگة كلبي بيج ..

تخوصرت بعصبية : شنو بكيفك هي تطلع حرگة كلبك بية .. وبعدين تايهة تجي تصيح علية واني كلشي ممسوية ..

ما حسيت غير دفعني حيل وطحت عالقنفة : دوووخررري ..
طلع من البيت كلة واني بمكاني ..

رفعت ايدي بألم لان انضربت بالحافة مال القنفة ..

باوعت ليدي بقهر وعصبية من تصرفة : هو هم مو صوجك .. صوج الي تنازلت عن كرامتهة علمودك وراحت حجت وية هالمتخلف ..

عصبت كلش وكمت رحت لغرفتي ..
مو من حقة يعصب علية .. اكبر غلط يسوي الانسان لما يعصب من شخص ويذب حرگتة بشخص ثاني ..

دخلت للحمام وحطيت ايدي جوة المي الحار بلكي ترتخي ويروح الالم ..

من قهري نمت الساعة ١٠ ..

اليوم الثاني كعدت من وقت ..
تريكت وية ام خالد وام عمار ( مرت خالد )

باوعتلي ام عمار وهي تطبك حواجبهة : ميس شبيهة ايدج ..
رفعت راسي : ما بيهة شي ..

ام عمار : جا ليش تاكلين ب ايد وحدة .. شو ارفعيهة خل اشوف ..
رفعت ايدي كدامهة : البارحة انضربت بطرف القنفة .. بسيطة متوجعني ..

ام عمار : شلون بسيطة .. ما تشوفينهة بيهة زراك ..
ام خالد باوعتلي بخوف وكامت واجتني : يمة سودة علية .. شبيهة ايدج .. خاف مكسورة ..

حجيت واني الزم ايدهة : لا يمة لا تخافين .. بس العصب متحرك شوية .. هسة تصير احسن ..
ام خالد : لا يمة خل اجيبلج مرهم والفهة الج .. خاف توجعج ..