قدوم الماضي (مكتملة)

البارت العاشر

الكاتبة : سارة الشمري🖤

كم أتمني أن أعيش عزائي وأنساك دفعة واحدة ولكنني كلما حاولت أخفقت وازدادت وحدتي التصاقا بك .

العصر نزلت الدرج ..
سمعت صوت بالصالة ..

دخلت وبلعت ريكي ..
انصدمت وشفايفي صارت ترجف ..

رصيت على ايدي واني اباوعلهة واسمع كلام ام خالد : تعاي يمة ميس .. توهة خالتج سامية تسأل عليج تريد تشوفج ..

وكفت من شافتني .. وتقدمت مني ودموعهة نزلت ..
رفعت ايديهة تريد تحطهة على خدودي ..

تراجعت لورى قبل لا تلمسني ..: انتي بأي وجه جاية لهنا .. شلون الج عين تشوفيني وجهج ..

ام خالد : يمة برد الرحمن شني هالحجي .. تهدي يمة مو هيج تنحل .. هاي مثل امج وربتج وتعبت عليج ..

هزيت راسي : هاي جذابة .. عيشتني طول هالسنين بجذبة .. هي الي خلتني احس باليتم مو بس ابوي .. كرهتج بكد ما كرهت ابوي .. لا تشوفيني وجهج مرة ثانية ..

ردت اطلع وصار بوجهي ابو خالد ..
باوعتلة بقهر : تدري انتو اكثر ثنين اكرهكم بهالدنيا ..

عفتة ومشيت واني احس اريد ابجي وبنفس الوقت مختنكة من البيت ..
حطيت شال على راسي وطلعت اريد اروح لبيت واحد من اخواني ..

وصلت للباب الحديد الجبير وفتحتة ..
شفت وافي واكف بالباب ..

حجيت بعصبية : وانت ثالثهم على فكرة .. هم شيطان ..
رفع حاجبة : ومنو الثنين الباقين ..

باوعتلة بقهر : ومنو غيرهم .. عمك و سامية .. ولو يمكن ما تدري بسامية هنا .. روح يمهم حتى تكمل لمة الشياطين ..

باوعلي ببرود : ادري بسامية هنا .. اني جبتهة من بغداد ..
باوعتلة بحقد : عساكم بنار تحركم وتشويكم شوي ...

ابتسم بطرف شفتة وحجة ببرود : امين ..

ضربت رجلي بالكاع من القهر ومشيت ..
توجهت لبيت اخوي علاء ..

دخلت وصار بوجهي مصعب ..
نسيت سالفة سامية كلهة ..
اجة بسرعة : ها بشري شكو اخبار جديدة ..

حجيت بحماس : اي ولك جدك كال لرغد عالخطوبة وهي راح توفق اكيد ..

صفك بأيدي وكام يهوس : لك هلااا .. يعلك بي شارة ... حلوات اخبارة .. موش بسيارة زحوف اتعنة لدارة ...

كمت اهوس وياه واصفك ...
كمزنة على صوت غسان : شننني هاي ..

مصعب حط ايدة على كلبة : شبيك فززتني ..
حجة وهو طابك حواجبة : ليكول طاب كعدة نسوان .. شهالحالة هاي .. ما تملون حش بالعالم ..

حجيت واني ارفع ايدي : رجاءً لا تتهمنة بالباطل .. احنة نتطرق لأخبار العالم مو نحش بيهم ..
مصعب هز راسة : مثل ما كالت عمتي ..