قدوم الماضي (مكتملة)

البارت الثاني والعشرون

الكاتبة : سارة الشمري🖤

منذ صغرها توصيها أمها بألا تتحدث إلى الغرباء أو تأخذ منهم شيئا .. لكنها حين التقت ذلك الغريب رمت بكل وصاياها عرض الحائط
خولة حمدي,

فجأة طفرنة كلنة على صوت صرخة ميس من برة .. : لااا واااافي ...

كامت امي وهي تضرب على صدرهة : يممة ابني شبي ..

طلعنة برة نركض ..
شهكت من شفت سامر بالكاع ووافي كاعد فوكاه ويضرب بي بكل قوة ..

امي راحتلة وتحاول توخرة عنة : وافي يمة شجاك عوف الولد .. تخبلت شبيك ..
رحت لميس الي واكفة وترجف وتباوعلهم وخايفة ..

جنة تبجي وواكفة وية امي تريد تسحب وافي من فوك سامر الي وجهة جان كلة دم ..

وافي وجهة احمر وشرايين وجهة برزت من العصبية .. ويضرب بسامر بدون رحمة ..

قاطعنة صوت صرخة ابوي : وااافي .. كوووم عن الولد ..
وافي وكف ضرب من سمع صوت ابوي ..

كام على حيلة وسامر مغمي علي بالكاع ..
عدل نفض السترة مالتة ..
باوع لامي وحجة بصيغة امر : هذا ماريد اشوفة يعتب باب البيت مرة ثانية .. اذا شفتة تقرب من ميس ادفنة بمكانة ..

التفت لميس وحط ايدة بأيدهة واخذهة ومشة للسيارة ..
امي صاحت وراه بخوف : وين رايحين بهالليل ..

ابوي رد عليهة وهو يباوع لسامر : عوفي خل يروح ..
ابوي اشر ل ليث الي جان وياه وما انتبهت لوجودة اصلا : تعال شيلة وياي خل اودي للمستشفى ..

شالوه للسيارة مال ابوي واني بعدني مصدومة .. : شنو الي صار وهيج ضربة ..
حجت كوثر وهي تباوع لامي : شيصير يعني .. اكيد هاي بت اختج شو شعدهة وية سامر .. اكيد وافي كشفهة ما تشوفينه كضى بي التوبة .. ولو جا هي بت منو ..

عصبت من كلامهة : مرت خالي .. تردين اذكرج بكلام وافي .. ترة كال اليحجي عليهة بيتي يتعذرة .. لهالسبب انتبهي لكلامج قبل لا تكولينة ..

اخذت جنة الي ما وكفت بجي ودخلتهة للبيت ..

ميس //

صاعدة بالسيارة واباوعلة البرود طاغي بوجهة .. ولا عبالك هسة ضارب احد ..

رجعت بذاكرتي للي صار قبل شوية ..

رحت اشوف تليفوني بلكي بالسيارة ..
ما لكيت السيارة اصلا .. وين راح وافي ..

ردت ارجع للبيت .. صعدت اول ٣ درجات بس حسيت بأيد سحبتني ونزلتني ..
التفتت وانصدمت واني اشوف سامر كدامي ..

ردت اصرخ بس حط ايدة على حلكي ..
حاوط ايدة على خصري ورجعني لورى ..
ضهري انضرب بالحايط ..

صار حاصرني بينة وبين الحايط ..

يباوع بعيوني بنضرات غريبة .. بس اكدر اكول عنهة قرفتني ..
اريد ارفع رجلي واضربة مثل عادتي بس الفستان يعيق حركة رجلي ..