قدوم الماضي (مكتملة)

البارت الثاني عشر

الكاتبة : سارة الشمري🖤

الرحمة جوهر القانون، ولا يستخدم القانون بقسوة إلا للطغاة
ويليام شكسبير

غياث حجة بضيقة : دكتور رجلية شو ثكال ما احس بيهن ..
الدكتور عقد حواجبة ..

تقرب من غياث ورفع الغطا عن رجلي : غياث حاول تحركلي اصابعك ..
غياث : دكتور اكلك ماكدر .. خدرانات كلهن .. يمتة يروح تأثير المخدر ..

الدكتور : للأسف هذا الي ردت اتأكد منة بالفحوصات .. بس يبدو ماكو داعي للفحص ..
طبكت حواجبي : شنو يعني ؟..

الدكتور : استاذ غياث رجليك ما بيهن تخدير ..
انت من سويت الحادث انضربت برجليك .. وادت الى فقد القدرة على المشي ..

كلنة انصدمنة ..
اسامة لزمة من ياختة : انت شتحجي .. شلون غياث ما يكدر يمشي .. انت مستوعب شجاي تحجي .. وين الطب مالتكم ..

تقربت منهم ووخرت اسامة عن الدكتور ..
حجيت واني كوة لازم اعصابي : دكتور فهمنة الموضوع .. يعني غياث مالة علاج .. ما راح يكدر يمشي مرة ثانية .. اطينة حل علاج ..

الدكتور : اذا استمريتو بالعلاج الطبيعي .. يعني عسى يكدر يمشي .. وبنفس الوقت ما أكدلك هالشي لان ممكن جسمة ما يستجاب للعلاج ..

التفتنة كلنة لغياث لان تنفسة صار يصعد وينزل من العصبية .. وجهة صار احمر ..

تقربت منة وحطيت ايدي على جتفة : غياث اهدئ .. انشالله راح تتشافى ولا يهمك ..

غمض عيونة حيل وصاح وهو صاك سنونة : اطلللعو برة .. ماريد احد يمي ..

الدكتور اشرلنة وطلعنة حتى لا تتلف اعصابة اكثر من هيج ..

دخلنة بحالة صدمة بوقتهة ..
اتصلت علية ميس .. : الو شامل .. ليش ما ترد علية .. شلونة غياث .. شكال الدكتور ..

حجيت واني ايدية ترجف : ميس .. غياث بعد ما يمشي ..
ميس : ش شنو .. غياث لا تشاقة ..
حجيت بسخرية : تتوقعين اتشاقة بهيج موضوع ..

صرخت : شلووون .. يعني غياث انشل...
شامل : اي انشل .. وهسة من عرف طردنة من غرفتة ..

اجاني صوت رغد واللهفة والخوف مبين بصوتهة : عمو الله يخليك تعال اخذني الة ..
هزيت راسي : رغد وحودج ما راح يفيد بشي ..

رغد : فدوة لا ترفض وتعال اخذني خل اشوفة ..
تنهدت : انشالله .. حضري روحج اني جاي ..

غياث //

غمضت عيوني ورصيت على راسي واني اتذكر الحادث ..
جنت فرحان واني طالع من المركز ومباشرةً متوجه لبيت جدي حتى اشوف رغد ..

البارحة ما كدرت اشوفهة ..
مريت على محل حلويات واخذتلهة علبة ماكنتوش لان ادري بيهة تموت عالحلا ..