قدوم الماضي (مكتملة)

البارت السابع

الكاتبة : سارة الشمري🖤

أنا رجل لا يريح ولا يستريح فلا تصحبيني على الطرق المعتمة.. فشِعري مدان ونثري مدان ودربي الطبيعي بين القصيدة والمحكمة.

ردت اطلع بس شفت ايد انمدت كدامي تمنعني من الطلعة ....
رفعت راسي شفتة نفسة الي اسمة وافي ..

رفعت حاجبي بأستنكار .. : خير ؟..
باوعلي ببرود قاتل : ممنوع الطلعة من غير حجاب ..

طبكت حواجبي بعصبية : نععععممم ...
البنات التفتن على صوتي ويباوعلي مستغربات ..

تخوصرت وباوعتلة بعصبية : ومنو انت حتى تمنعني بلة ..

باوعلي ببرود : الامر ما صدر مني .. هذا امر العم ابو خالد ..

هزيت ايدي بدون اهتمام واني اريد اطلع مرة ثانية : عمك يمشي اوامرة على غيري .. مو علية .. وخر من طريقي ...

وخر ايدة من كدامي وسحب الباب للنص واني جوة وهو برة ..
حجة وهو يباوعلي بنضرة باردة : هذا الشي تحلينة وية والدج .. واني علية انفذ اوامرة ..

طبك الباب واني بقيت جوة واباوع للباب مصدومة ..
عصرت ايدي حيل من عصبيتي .. هذا اشايف نفسة ويتصرف وياي هيج .. حيييوووان ..

دخلت للصالة واني اهبد بمشيتي من العصبية ..
باوعت الصالة ما لكيتة موجود ..

حاجيت ام خالد واني كوة لازمة اعصابي : وين راح ..
ام خالد : ياهو هذا يمة ..
ميس : ابو خالد يمة وين راح ..

ام خالد : هاا .. بغرفتة يمة راح يطلع ..
طلعت من الصالة بسرعة وتوجهت لغرفتة الي تصير بصف الدرج ...

فتحت الباب بكل قوة حتى ضرب بالحايط ..
جان واكف وبصفة شامل يحجي وياه ..

من شافني طبك حواجبة بعصبية وحجة بزجر : شنو هالقلة ادب .. شهالتصرفات هاي ..

قربت وحجيت بصياح : انت الي تعدل تصرفاتك وياي .. اذا عبالك راح تحكمني تكون غلطان .. انت ما الك سلطة علية حتى تتحكم بية ..

حجة بعصبية : حسسسج كصرري .. واحجي عدل خل افتهم شبيج ثايرة ..

رصيت سنوني : اسمعني زين سيد عزام .. انت ما جنت اي شي ولا مرة بحياتي .. وهسة ما صارلك غير اسبوع من عرفتني وتريد تتحكم بية وبلبسي وحجابي .. لا يكون عبالك تكدر تسيطر علية ..

غمض عيونة وسحب نفس بعصبية ..
اقترب مني ورص اسنانة .. : الحجاب اول وتالي راح تلبسينة .. البسي من هسة احسلج ..

هزيت راسي : انت شنو من بشر .. ما تفتهم .. تعرف شكد اكرهك .. ما عمري كرهت شخص بكد ما جاي اكرهك هسة .. يوم عن يوم تثبتلي انك جلمود وصخر وما تعرف شي اسمة عدالة ورحمة ..

انطاني ضهرة وحجة ببرود : اذا ما لبستي الحجاب ماكو طلعة ..
حجيت بعصبية واني اطلع : ماراح اطلع .. خلي الطلعة الك وتونسو بيهة ..