قدوم الماضي (مكتملة)

البارت الثامن عشر

الكاتبة : سارة الشمري🖤

تأملتها برهة عن قرب... ثم وقفت وأعدت تأملها من زاوية أبعد... ومهما تبعد المسافات... إنها إلى قلبي وكياني أقرب...وأقرب...
منى المرشود,

حجت بعصبية : لا تستغبون .. صدك وافي جايب بت سمرا ومتزوجهة وهسة هي بالبيت ..

ليث وكف على حيلة بصدمة وباوعلهة متفاجئ : بوووووية دهررر .. ولج شني من اذاعة عندج .. كبببل وصلتج الاخبار والموجز .. هو انة توني دريت ..

حجت هي بعصبية : معليك بهالسالفة .. ومعناهة الحجي صحيح .. امج شلون تدخلهة للبيت هي ما تعرف عنهة شي ..

طلعت امي من المطبخ وشكلهة سمعت كلام مرت خالي : هاي تكون بنت اختي يا كوثر .. ولا تخافين كلشي اعرف عنهة ..

طبكت حواجبهة بغيض : وانتي شمعرفج بيهة .. وحتلو تعرفينهة ماجان لام ترضين بيهة مرة لابنج .. انتي نسيتي هي بت منو ..

امي عاطت بيهة : كووووثر .. كلت هاي تصير بت اختي .. معلية بالباقي .. ويكون احسن اذا انتي ما تدخلتي .. واذا حجيتي وياهة راح تلكيني بوجهج ..

كعدت هي عالقنفة بغيض : خل نشوف .. ننتضرهة تشرف ونشوفهة ..
امي هزت راسهة .. كلنة نعرف طبع مرت خالي .. تحب تخرب وتفتن .. والوحيد ليث الي ما يكدر يضب لسانة ويذب الحجاية بوجهة ..

امي التفتت علينة وحجت وية ليث : وانتة شعندك واكف .. ليش لهسة ما رحت للمدرسة ..
ليث تقرب من امي ولزم ايدهة بترجي : يممة فدوة خل اضرب اليوم وما اداوم ..

خزرتة امي بعصبية : ليييث .. بدون حجي زايد ويلة روح للدوام .. تأخرت ترة ..
تأفف ليث بقهر وسحب جنطتة وطلع للدوام ..

اباوع لمرت خالي كاعدة وتهز برجلهة ..
حجت امي وياي : اروى تعاي وياي وخل ننضف البيت لان ابوج اليوم يجي ..
فرحت لان اشتاقيت لبابا مع ان ماصارلة غير كم يوم من راح لاربيل ..

رحت وية امي وكعدنة انضف بالبيت ..
والخانوم كاعدة بمكانهة وولا كلفت نفسهة تساعدنة بشي .. اعوذ بالله شلون يوم هذا تصابحت بي بوجهة ..

صارت الساعة ١٠ خلصنا تنضيف البيت ..
امي دخلت للمطبخ تبدي بتحضير الغدة ..
حجت وياي وهي مستغربة : وافي بعدة نايم ..

هزيت راسي : اووهوو وافي طلع من الساعة ٧ ..نسيتي عندة شغل بالمعرض واليوم خميس ..

هزت راسهة بتفكر : جا روحي لميس .. اني نسيت البارحة ما عدهة ملابس تنام بيهن .. اخذيلهة من ملابسج شي نضيف وحلو وروحي كعديهة .. واذا تبقن كاعدات بالغرفة احسن .. بلكي كوثر تمل وتروح ..

كملت امي كلامهة واني بسرعة رحت لغرفتي بحماس .. طلعتلهة فستان مال بيت طويل بنفسجي .. وطلعتلهة جينز ووياه قميص ..حتى هي تختار الي تريدة ..
ولكيت عندي بجامة نوم ما مفتوحة بعدهة جديدة هم حطيتة ..