قدوم الماضي (مكتملة)

البارت السادس عشر

الكاتبة : سارة الشمري🖤

لا أصعب من هذه الكلمة..لا أصعب من هذه اللحظة..لا أصعب من أن تحاول وصف ما لا يمكن وصفه..بأى شكل!!
منى المرشود ..

باوع ابوي لوافي .. وافي هز راسة ب أي لابوي بأبتسامة ..

حجة ابوي : نتشرف بيكم ابو سامي .. وين نلكى احسن من مناسبتكم .. بس منو كال عندي بنية ؟..

حجة ابو سامي : شلون منو كالي .. هي صديقة بتي ودرسن سوة ..

اباوع لابوي اريدة ينهي هالمهزلة .. بلا هالزواج بلا بطيخ .. شلون يفكرون ذولة .. يطلب من عدنة بنية واحنة بنص ديوانة ..

ابوي رد علي بأبتسامة : لا انة مو قصدي ما عندي بنية .. قصدي منو كال عندي بنية للزواج ..
ابو سامي باوع لابوي وهو مبين عقلة مشوش .. :ابو خالد اني احجي لان اعرف البنية وهي متربية وية بتي والادري بي هي ما متزوجة ..

سامي حجة بسرعة : اي اني متأكد من هالشي ..
ابوي رد علي بنفس الابتسامة : اعذرني اكلك فكرك غلط ابو سامي .. بس بتي الزغيرة والي هي صديقة بتك متزوجة ..

فتحت عيوني بصدمة وباوعت لابوي ولاخواني اريد افتهم الموضوع .. بس همة ما جانو اقل صدمة مني ..

سامي حجة بعصبية : شلون متزوجة .. اني ادري بيهة ما متزوجة واعرف هالشي زين .. يمتة تزوجت بيوم وليلة ..

ابوي باوعلة برفعة حاجب بمعنى تشكك بكلامي عن بنتي ..
سامي حجة : عمي لا تباوعلي هيج فدوة .. يمتة تزوجت هي .. مستحيل تتزوج ..

ابوي حجة بحدة : ابو سامي الزم ابنك .. وهالحجي ما ينكال وتدرون كلش زين هذا مو موضوعنة .. وانت طلبت واني كتلك فاهم الموضوع غلط .. البنية متزوجة ..

التفت على وافي ذب القنبلة الموقوتة الي فجرهة علينة كلنة : وهذا زوجهة كدامك .. وافي مساعدي وايدي اليمين ونسيبي رجل بتي ..

نفسي صار يصعد وينزل .. اريد استوعب ابوي شجاي يحجي .. شنو وافي رجل ميس .. على اي اساس يكول هالشي ..

احس اصابعي راح تتكسر من كثر ما ضغطت عليهن ..
اباوع لوافي الي جان مبتسم ببرود وولا عبالك صاير شي .. كوة لزمت اعصابي لا اهجم علي ..

ابو سامي لزم ايد ابنة الي العصبية واضحة بوجهة ..
حجة ابو سامي بأحراج : اعذرنة ابو خالد ما جان عدنة خبر عن زواج البنية .. الله يوفقهة انشالله .. وابني ما جان قصدة ..

حجة سامي بسرعة : لا يابة متقصد وهم متأكد من كلامي .. ميس ما متزوجة .. يمتة تزوجتة وهي ما صارلهة غير كم شهر من عرفتة ..

وافي حجة ببرود وهو راص سنونة : سامي اذا ما تكدر تلزم اعصابك .. اكدر اخليك تلزمهن .. ترة حاليا ساكت لان عمي ابو خالد يحجي ..

ابو سامي : يابة العنو الشيطان .. ابني وافي حقك ونعتذر منك ..
سحب ابنة سامي وطلع برة ..