قدوم الماضي (مكتملة)

البارت الخامس والعشرون

الكاتبة : سارة الشمري🖤

إن الماضي تفسير, والمستقبل وهم. إن العالم لا يتحرك عبر الزمن وكأنه خط مستقيم, يمضي من الماضي إلى المستقبل. بل إن الزمن يتحرك من خلالنا وفي داخلنا ..
اليف شفق ..

طبك حواجبة وايدة ارتجفت : شـ ..شجاي تحجي خوية .. لـ...ليث بالمدرسة شلون دعمتة سيارة ..

كمنة كلنة بخوف ..
خالتي ضربت على خدهة : يمة ابني ..
سد التليفون عمي وهو يكوم : وافي امشي اخذني للمستفشى الـ.. .. هذا المدرس مالتة ايكلي ليث دعمتة سيارة ..

وافي حجة بلهفة خوف : اي بوية يلة ..
خالتي حجت ودموعهة تنزل : ويين رايحين فدوة غير تفهموني ابني شبي .. اخذوني وياكم ..

عمي عمر : ام وافي انشالله ما بي شي بس اهدي وروحتج ما الهة فايدة .. احنة نطمنكم انشالله ..

طلعو وافي وعمي .. خالتي انهارت بالكاع وكعدنة نحاول نهديهة ..
ورة نص ساعة اجت خالتي سامية وافنان وهم كامن يبجن ..

بيدي تليفون اروى واتصل على وافي وجهازة مغلق ..
اباوع لخالتي كاعدة وبجيهة يزيد من نتصل وما يردون ..
البنات هم يبجن بس يحاولن يخففن على امهن ..

مسحت دموعي واني احاول اكون اقوى من هيج ..
صح ما صارلي هواي من عرفت ليث بس بسوالفة وضحكتة وكلامة صرت احسة اخوي الزغير .. بدون مبالغة ليث هوة ضحكة هذا البيت ..

ورة ساعتين تقريباً احنة اعصاب ما بقت عدنة ..

دخل وافي وكال اطلعن من الصالة خل ندخل ليث جبناه من المستشفى وويانة عمامي وولد عمامي ..

كمنة بسرعة ونحمد الله ..
صح ما انطانة مجال وافي ان نعرف شبي بس المهم مادام طلع اليوم من المستشفى معناهة زين ..

دخلوه للصالة واحنة بقينة بالمطبخ ونسمع اصواتهم .. راحتلة خالتي و اروى وافنان بس اني بقيت لان استحي من عمامهم وما اعرفهم اصلاً ..

ورة نص ساعة مشو ورحت اني حتى اشوف ليث ..
دخلت للصالة وباوعت ل ليث ..
راسة ملفوف بشاش وايدة ورجلة مجبرينهة ..

بس شافني رفع ايدة الما بيهة شي وحجة بألم : يحلوة وينج انتي .. تعاي وشوفي شصار بية ..
رحت كعدت يمة على طرف القنفة ولزمت ايدة : حبيبي الحمدالله على سلامتك .. منين اجتك هاي ..

مد ايدة وحضني : ما اسولفلج شصار يحلوة ..
رفعت عيوني لوافي الي ادري بي يغار من ليث ..
حط ايدة على كتف ليث وحجة وهو راص سنونة : ليث حبيبي انتة تعبان عوف السوالف ..

رجع ضهرة عالقنفة ومد ايدة المابية شي لوافي بتعب : اي والله تعبان .. ايدي تحكني يمكن اكو بگ .. هاك حكها ..

حبست ضحكتي على شكل وافي المتفاجئ ..
اشر على نفسة وهوة رافع حواجبة : اني احك ايدك ؟؟؟