قدوم الماضي (مكتملة)

البارت الحادي عشر

الكاتبة : سارة الشمري🖤

أريدك أن تقول لي أحبك بالشكل الذي يشبهني فقلتها بالشكل الذي يشبهك ..
عفواً .. يشبهنا

دك تليفون شامل ..
رفعة بأبتسامة : يا هلا ب أيمن ..

فجأة وكف بخوف ..
باوعنالة مستغربين ..

حجة وايدي ترجف : غـ .. غياث ؟..

وفجأة صرخ : عووف البجي وكلي غياث عدل لو ميت ..
ام خالد عاطت : يمة تزين راسي ..

كمزنة اني ورغد ... اباوع لشامل ايدي ترجف ..
نزل التليفون وهو يباوعلة بصدمة ..

رغد حجت بخوف وايديهة ترجف ودموعهة نزلت : شبي غياث ..
حجيت بخوف : شامل احجي .. غياث شبي ..

شامل باوع على رغد ثواني وهي تنتضر جوابة ..
دار وجهة يريد يطلع ..
بس رغد سبقتة ووكفت كبال الباب : والله ما تطلع الا تكلي شبي .. فدوة لا تكلي مات ..

هز راسة : غياث مسوي حادث .. وحالتة خطرة ومايدرون يموت لو يعيش بس وخري خليني اروحلة ..
هزت راسهة ودموعهة تجري : اروح وياك .. فدوة اخذني الة ..

ما سمع منهة ووخرهة وطلع ..
رغد وكعت بالكاع تبجي ..: يمة غياث راح .. راح من ايدي .. شلون اعيش يمة ..

كلبي تكطع عليهة ودموعي تنزل ..
حضنتهة واني الزم ايديهة لان تضرب بنفسهة ..: رغد اهدي فدوة .. ادعيلة وانشالله ما بي شي ..

هزت راسهة وهي منهارة من البجي : شلون ما بي شي وهو ايكلي لو يموت لو يعيش .. والله اذا مات اني اموت وراه ..

مسحت دموعهة وحضنتهة : شششش سمالله يروحي انشالله الله راح يوكفلة ويحمي ويطلعة من هالشدة ..

رفعت ايديهة وحجت بصوت مبحوك ودموعهة تنزل : ياارب دخيلك احمي .. يارب كون وياه ولا يصيرلة شي .. والله مستعدة اسوي اي شي بس كون يبقى كدامي .. ربي والله ماكدر اعيش من غيرة ...

انس//

ملتمين كلنة بالمستشفى .. ايمن كاعد عالكرسي وحاط ايدي على راسة .. امجد واكف يم الباب ومدنك راسة ودموعة تنزل ويمسحهة ..

باوعت ل ابو غياث يفك بدكم دشداشتة من فوك ويفرك برگبتة ..
شهاب تقدملة وحط ايدة على رجلة : عمي بيك شي .. اخذلك غرفة ترتاح بيهة .. خاف ضغطك صاعد ..

رفع ايدة واشر براسة ب لا وهو يحاول يبين القوة كدامهم ..
دخل شامل يركض .. شاف وضعهم ..

حجة بلهفة : بشروني شلونة غياث ..
حجيت بتنهيدة : دخلو مباشرةً لغرفة العمليات وبعدة محد طلع منهم ..

شامل : شلون صار الحادث احد يفهمني .. غياث اكثر واحد بيكم يعرف يسوق ومنضم بسياقتة ..

امجد حجة بصوت مخنوك : طلعت كدامة شاحنة والي يسوقهة نايم .. ضربة من كدام ..