اول موصلت للمطار مال هند داخذ الجنط و شفت ياسر
_ياسرر !! هاي شدسوي هنا شعجب يعني ؟
_اول شي هلاو .. ثاني شي انتي الي شجابج منو وياج ؟
_اني جايه ويه بابا علمود عمليته هنا لان ماكو اجهزة المطلوبه بالعراق ..
_وليش مكلتوا عنده عمليه مجان شفنه شفنه شيحتاج لوما شفتج جان محد كلي
_بابا مقبل محد يعرف بالقصه اصلا بس بلبيت لان نفسيته تتعب اذا شاف احد ودعه او شي فكلنه يصير زين ونكول للناس من يرجع عادي ..
_هاا اي زين تسوون .. اكلج رشا ااا رأفت يعرف ؟
_هاا اي يعرف
_وهذا ميودع الوالد لو شنو شمعنه يعني ؟
_يااسر !! صدك تحجي كلناله علمود ايه ميجيبهه والا ليش لحتى يعرف اصلا ميربطنه ببي شي غير ايوته
_ااي اوكي المهم يلا تعالوا وياي اني عندي شقه وين عمي خل اصيحه ؟..
_اا لا والله شكراً متقصر اني احجز بفندق انت اخذ راحتك
_حعتبر تفسي ماسمعت الغريب يساعد الغريب مو اني مااساعدكم .. بعدين شعندي الصبح اطلع شغل وارجع وانتوا بالمستشفى
_مادري والله خلي اشوف بابا وين يرتاح ..
_اوكي .
رحنه البابا حجه وياه ياسر مقبل بلبدايه بس بعد اصرار ياسر وافق .. اخذنه الجنط ورحنه للشقه ..
شقه مرتبه اول مدخلت ممر صغير فتت على استقبال بسيط تخم ابيض وبي كوشات الوان كاسرته .. ميز مدور جوزي بالنص وعلليه مزهريه بيها ورد بلون الكوشات .. لوحات اثنين وتيبلمات اكبار .. جانت كلش مرتبه حلو ذوقه بسيط كلش
حطينه الجنط وكعدنه كام ياسر جايب مي وعصير وكيك ..
الضاهر البيت جان بي احد مجان فارغ حتى نظيف كلش
ياسر : اني جايب شركه تنظيف قبل اسبوع اخليهم ينظفوا وامو مره عراقيه هنا اجيبها بين يوم ويوم تنظف وتشغل الغراض فموصيها على كيك وعصاير ومسواك كله ..
_شكراً ياسر ابني متقصر بس اذا متصير زحمه ولو جاي من طريق سفر وتعبان .. بس اريد فراش انام شويه
_لا عمي صدك تحجي تنام بالغرفه الشقه جبيره بيها غرفتين اني انام وياك وحلي رشا بالغرفه الثانيه .. هذا الحمام نهايه الشقه اذا تريد تسبح والغرفه القبله النه .. رشا انتي الغرفه القبلنه
_شكرا والله ياسر متقصر .. بابا تروح تسبح بينما احضرلك هدومك؟
_اي والله ياريت ..
راح سبح باابا كمت فتت لغرفته خليت الجنط شفتهه مثل غرف الفندق . تصميم ماليزي لونهة ابيض والجراجف ولوحات ميز كله سمائي هم تصميم بسيط حطيت الجنطه وطلعت هدوم حطيت البابا وديت الشامبو والليفه وصابون البابا ورحعت حطيت ملابس على الفراش وطلعت
_اا ياسر اليوم تباشر بالشغل ؟
_اي اليوم عندي كم اجتماع وارجع ساعه بال٢ اطلع وارجع ب ٨
_زين .. المره التشتغل ميحتاج تجيبها اني هنا اطلخ واشتغل واسويلكم اكل حتى على الاقل ارتاح هنا ..
_الشقه شقتج اخذي راحتج بيها بس ليش تتعبين نفسج وهم المستشفى وراج ..
_حتى لو مابيها تعب .
_اوكي اني وره عمي اسبح واطلع
_زين ترجع تلكيني مكمله الاكل نتعشه سوه
ابتسم وراح اني هم رحت شفت الغرفه تجنن الي اطانيها عبالك غير مكان .. غرفه جبيره حايط اصفر وسرير واثاث ابيض وبعدين تطلع الممر يمنه بابا ويسره بابا واحد بي حمام بي بانيو وشور وكله ابيض واصفر والثاني بي غرفه صغيره تخم اصفر واثاث بسيط وتلفزيون ويطلع البلكونه منه
_والله ذوقه حلو وكلش مرتب متوقعت هيج حتى استحيت شون ابقى هنا ..
جنت تعبانه حتى مفكرت رحت سبحت وطلعت نمت لل ٧ كعدت
بسرعه غسلت وجهي وفرجت اسناني وطلعت للمطبخ بابا نايم وياسر مواصل .. فتت شفت كله اشياء جاهزه .. طلعت معكرونه سويت وكليت بتيته وكبه وسويت زلاطه وببسي كملت كلشي جان يدخل ياسر
_ها كاعده صباح الخير
_صباح النور .. اي كعدت وسويت عشه بس بدل وتعال انت وبابا نتعشى
_اي اوكي
كمل واجه ويه بابا اتعشينه وكمت غسلت اماعين عدلت المطبخ وسويت جاي شربنه ورجع بابا نام كلش تعب ياسر بقى يشتغل على الحاسبه مالته واني بقيت على التلفون احجي ويه رأفت وحجيت ويه ماما وره ساعه كملت ياسر راح نام كمت اني حظرت لبس وتمددت اريد انام ماكو تكلبت قريت المعوذات وهم ماكدر سبحت طليت بالنص ساعه ونمت ..
كعدت الصبح بال ٦ سبحت ونشفت شعري ..
كمت سويت ريوك وكعدوا الجماعه اتريكنه بابا راح يبدل وياسر كذلك واني كملت المطبخ وبدلت ورحت شفت ياسر منتظر يوصلنه
رحنه اول يوم تحاليل كله جددوها وحددنه موعد ورجعنه مثل الروتين اسبوع واحنى نركض لحدما كملنه كلشي ورحنى بالمستشفى ياسر رجع عنده شغل حاول ايأجله مكدر وطبعاً رأفت معافنه لحظه كله تلفونات ويخابر كامرا ويه بابا وكل الليل يحجي وياي لحدماانعس وانام فرق التوقيت هم تعبنه بس خطيه كلشي ميحجي هوه .. من الخوف اني بديت اضعف بشكل بشرتي تعبت والجو عدهم رطوبه وشويه مطر شويه برد شويه حر جريت السفر كله فلاونزه .. لحد يوم العمليه خلصت كل الفلوس خابرت ابراهيم باع الارض العدنه ودزلي فلوس وكملت العمليه مرجع اضطر يبيع بعد من الاملاك العدنه ويدزلي فلوس وره شهر اريد فلوس الرجعه وخابرت اسمعه يكول جذابه وتريد تتونس مو حاله هاي خلصت الاملاك والفلوس مو كملت شعدهه اني بقيت صافنه كلشي محجيت بعت حصتي بالاملاك لان بابا حاط كل واحد حصه اله خاف كلشي يصير وصار واحتاجيت رجعت بابا صحته كلش زينه بس اني تعبانه بشكل السنه راحت عليه وصارفين ٤٠ مليون .. بس كلشي يهون الخاطر سلامته ذبحوا طلي يم رجليه وبدت الناس تجي رغد جنه كايلين الها مسافر سياحه بس ممصدكه وقلقه ومن عرفت بجت كومه بطنهه كبرانه كلش وسالناها كالت تؤم الحمدلله الله عوضها
كمل هلاسبوع نفس الموال خطار وتنظيف ونوم
لحدما خلص الاسبوع وبدوا يخفون الخطار بدينه نرتاح شويه ..
فبيوم خابر رأفت كال حييجون لان منتظر خطار يخفون وصار لازم ييجي هوه والدته وشون جيه جانت .. بدايه كابوس حياتي ..
يتبع ..
