"ولقّد سهرتُ مع النّجوم لياليًا
أتراكَ مثلي قد عددتَ الانُجمَ ؟
وضحكتُ لمّا بالخيالِ تأملت
عينيّ ثغرك ضاحكًا مُتبّسِما
الحبُّ مرٌ و الحنينُ كـأنهُ..
جمرٌ على حرّ الشعورِ تردّمَ
لو كنتُ أعلمُ أنّ فيه مضاضةً
ما سرتُ فيهِ ولو فضائيَ أظلمَ"
كملت واخذت ميس ورحنه تغدينه ورجعت مالكيت احد فجأه واندك البابا ..
رحت نزلت فتحته شفت رأفت بلباب
_نعم ؟
_تنعم ضلوعج نعم شنو بعد اطرديني
_اعذرني مو اخلاقي ولا اصولي اطرد الضيف
_اني اريد احجي وياج ضروري ..
_بصفتك منو ؟
_بصفتي منوو !! اني منوو
_اي انت منو هاا رأفت حبيبي لو رأفت زميلي لو رأفت الي امنت بي ووثقت بي ويعرف اشياء محد يعرفهه وحتى مسألت شون ومين وفجأه يعايرني بضروفي الي مالي دخل بيها .. رأفت الي اتهمني بشرفي ؟ منوووو انت منووووووو احجي شبيك صافن بس تدري مو ذنبك ذنبي اني وثقت بيك كلت غير رأفت هوه اول حب واخر حب رأفت هوه حياتي رأفت فرحتي بعد افراح الماتت بس عرفت اني الوثقت بيك ثقه عميه طلعت عميه واطيت الثقه الشخص ميستاهلهه وصدك بعد افراح محد حيكون فرحتي كلهه حتكون انكساري ووجعي والمي
انهاريت فجأه حسيت كلبي من الوجع حيطلع من مكانه ودكاته زادت كعدت على الكاع رجلي مشالتني بقيت ابجي واتنفس سريع اشهك بلبجي
_رشااا رشاا حبيبتي شبيج رشا كومي وياي الله يخليج .. ياربي لتختبرني بيها ..
مد ايده الي باوعت صفح اله ودرت وجهي كمشت يده الباب وكمت مشيت شويه ورجع وجه راسي احس عيني حتنخلع والدنيا تفتر بيه اخذت نفس ومشيت شويه واكمش الحايط لحدما اجه كمش أيدي وايده الثانيه وره خصري وخرت ايده وكتله شكرا ممحتاجه رجع كمشني وخزرني كال ادري مامحتاجه امشي يلا ..
وخرت ايده الي على خصري وبقيت الثانيه الي كامشني بيها ورحت وياه للهول كعدت وراح هوه للمطبخ جابلي مي اخذته شربته وكعدت
_وين اهلج ؟
جاوبت ببرود .. بيت عمو وجدان
_خابريهم ييجون لا اكدر اضل وياج وحدنه ولا اكدر اعوفج
_ميحتاج اقلقهم اصلا اعرف شبيه تكدر تروح واني اخذ دوايه وانام هسه ..
_واذا تخربطتي ؟
_ادك عليك حخلي التلفون يمي
_اوكي يلا ديري بالج على نفسج شتحتاجين خابري خلي التلفون يمج راح ابقه اخابرج ونامي واكلي زين وها حطي مخده جوه رجلج خاف ضغطج .. زين اجيبلج خيار وملح قبل لاروح
_رأفت تمام اني تمام ومو ضغطي ارتاح ماكو شي
اجه يمي باس ايدي وكال اعتذر وراح
بقيت على القنفه اختنك فتجت الشال وصافنه ودموعي تنزل وحده وره الثانيه كمت توضيت وصليت ورحت فوك بدلت شفت تلفوني اخذته ورحت للفراش فتحته كعدت اقره المحادثات اني ورأفت وابجي كلش انهاريت تعبت ممن البجي حتى نفسي بلكوه اجره داسده وشفت يكتب الان ..
توقعت يسال عني ماشوف غير كاتب .. ويامن دتحجين ويه ياسر ؟
ضحكني بنص دموعي
كتله الحمدلله احسن شكراً
بكل صلافه كال اني مسالت عن حالج كتلج ويامن دتحجين ليش متصله بلنت
دزيت .. مو ويه احد هيج
_اني هم ..
اني هم جنت اقره بلمحادثه مالنه .. رشا شصاير احجيلي ليش هيج صار بينه
هذا صدك يحجي ؟ (سألت نفسي )
_رأفت بيك شي مريض ! مصخن !
_شنو هلحجي ؟ انتي صدك تحجين
_ياا هاي شبيك والله مدافهمك
_اي صعب اني مو مثل غيري مو صح ..
_اكلك من النهايه تحجي شتريد لو لا عليش هلتعب كله اشو اجيت دزيتلك كلام كرايبك شوف شسويت انت دكيت تصيح وانتي وانتي وانتي عبالك كاتلتلك احد ..
_لتسوين روحج غشيمه انتي نسيتي شدازه الفرح ..
_شدااازه لتخبلني
_اوكفي ثواني ..
شويه ودزلي صور محادثات وصوري بلبس كله مدلع ومادري شلونه وكروبات بلفيس بس مشفت شبيهه بديت بلسره
محادثات اول شي اقراها وكف شعر راسي نفس صورتي بلفايبر وياها محادثات باسماء طلاب القسم واستاذه ومحادثات كلهه كلام الموزينه متحجي ..
كملتهم بعد خدرت رجليه وايدي ماحس بيهه شفت صوري بس هاي مو اني اني عندي وحمه بايدي اليسره وغير هذا بشرتي مو هللون ..
كملت شفت كروبات كلهه ولد كروبات اسماء خادشه للحياء
بقيت صافنه والي صدكني اكثر رأفت شيكول هسسه عليه والمشكله مو اني هذا كله مو حجيي كمت بسرعه كتبتله
_رأفت هاي اني ؟ .. يعني انت مصدك اني هيج
_منووو لعد صور منو حجي منو منو اسمها رشا منو مو ذوله ويانه بلقسم احجيلي فهميني
_تكدر تجي هسه !!
_اوكي جاي ..
_مو للبيت خلي نروح للحديقه الي يمنه
كمت غسلت وجهي وايدي توضيت وصليت صلاة طلب حاجه دعيت تتوضح الامور ورحت لبست فستان مالحجاب وجنطه صغيره وحذاء رياضي وطلعت اكيد وصل هسه ..
رحت للحديقه ماهوه كعدت انتظره شويه ودك التلفون عبالي هوه بس طلع بابا ..
سألني ويني كتله يم فرح طالعه ورجعت ميس وهمه هم كالوا للمغرب ييجون فمشلت هم
توني سديته اجه رأفت ..
وكفت باوعت بوجهه عبالك اول مره اشوفه لان نظراته مو نفسهه نظرات العاشق لا نظرات لوم وخذلان متحملت نظراته دنكت وجهي واطيته تلفوني كتله شوف اذا شي واحد موجود بلتلفون دور بي ربع ساعه ورفع راسه كتله قبل لتحجي ..
اكيد حقك تكول يجوز ماسحتهم حشوفك شي ولو تحجبت وتحرم عليه بعد بس حتى ابري ذمتي لاخر لحظه ..
طلعت الصوره الدزهه وكبرت الايد صافيه وشوفته صوره ثانيه بلايد البيهه الوشم
كملت شوفته تصوير التلفون الي مبين مو نفس تلفوني من الشحن والارقام واخر شي شوفته الفيس الاسم بي اختلاف ملاحظه هوه بس اني شفته ..
بقه صافن ..
_هسه ذمتي مبريه وماعليه شي بعد الي لازم اسوي سويته ولاخر لحظه من عمري وياك وفيت بيها بس لهنا وكافي لك حتى البشره مو بشرتي ولا شعري بس الملامح الوحمه الاسم وفوك كل هذا انت مسألت اني دزولي او دزت كرايبك تهديد دزيته الك مباشراً قبل لااجاوب ليش لان اوثق بالي اختاريته ..
وهسه اني كلش تعبت وتعبتني وياك اكثر انسه شي اسمه رشا وبلعافيه عليك الحيه الي صدكتهه وثقت بيها بدالي ..
رافت .. رشاا رشاا بس لحظه بس انتي قدري موقفي والله مو قصدي اشك بيج بس شسوي واحد ثاني شيسوي
_يسأل ! يعاتب ! اني شنو اني حبيبتتك دتفهمني حبيبتك مو زميله وخلص ..
_زين اطيني فرصه احجيليج الصار الله يخليج بس فرصه وحده لتصيرين ضالمه مثلي ..
_احجي خل اشوف عذرك العظيم هذا
_شوفي بيوم ..
يتبع ..
