رزان وقفت جنبنا بعربيتها ضربت بوري ورفعت يدها تسلم على عمر بس ما كلف نفسو ينزل يسلم عليها 😒 ضرب ليها بوري واتحرك رزان بعد نزلت من العربيه قالت لي ده منو الوصلك خجلت اقول ليها ده ود عمي عامل وشو الصّاري ده 😓 عشان كده اضطريت اقول ليها ده السواق حقنا قالت لي طيب انتي ليييه ما بتسوقي براك قلت ليها عشان بابا بخاف علي ومانعني السواقه 😍 كذابه يا انا بابا ما عايز يشتري لي عربيه الأ اشتغل معاهو في الشركه 😔 دخلنا الجامعه ونحن في القاعه جات سلمى قالت لي زولك مثبت ليهو وحده تحت قلت ليها قصدك شنو 😳 ؟؟ قالت لي زوجك المستقبلي خالط وانا من الاول حزرتك منو 😓 وقبل تتم كلامها نزلت الكافتريا وفعلا لقيت رامي قاعد مع بنت من بنات دفعتو واول ما قعدت معاهم البنت استأذنت ومن تعابير وشي فهمت انها غير مرغوب فيها رامي قال لي حبيبتي القمر 😍 قلت ليهو ما بتغشني بالكلام وبعدين دي بتعمل معاك شنو 😒 ؟؟ قال لي زعلانه عشان قعدت مع بنت داخل الجامعه وأصلا كنا بنشرح لبعض وانتي هسي نازله من العربيه مع واحد غريب وما سألتك ✋ قلت ليهو لو سألتني كان عرفت انو ده السواق 😒 قال لي ليييه يوصلك السواق وانا قاعد بصراحه بغير عليك 😍 قلت ليهو تغير من منو وده مجرد سواق لحدي ما يجي بابا من السفر ✋ بعد اتونسنا وحلينا سوء الفهم بينا رجعت القاعه سلمى قالت لي اهااا 😊 قلت ليها اهااا شنو وتاني اتأكدي من كلامك حتى تتهمي رامي ولأ عايزه تفرقينا من بعض بأي طريقه 😏 قالت لي غلطانه انا الخايفه عليك 😒 بعدها إعتزرت ليها عن اسلوبي وآخر الدوام رجعت البيت مع رامي ✋ المساء شيراز قالت لي شجن بكره طالعه الجامعه الساعه كم 😊 قلت ليها الساعه 7 ونص بس بتسألي لشنو ؟؟ قالت لي عشان عمر اتصل سألني ✋ قلت ليها ويسألك انتي ليييه انا ما عندي تلفون 😒 قالت لي ما بيسألك انتي عشان بتطولي معاهو لسانك 😓 بعد ساعه فتحت الواتس لقيت رساله من عمر ( بكره الساعه 7 ونص ح اضرب ليك بوري لو ما لقيتك جنب الباب ح اعتبرك ما ماشه الجامعه وللمره الاخيره 7 ونص جنب الباب ) حيوان خلااااص بس بنتقم منو ✋ طبعا اهم حاجه في حياتي الاستايل والموضه والميك اب بقضي اليوم كلو في اليوتيوب مافي فديو ميك اب بيعدي من غير ما احضرو ✋
اليوم التاني كـالعادا عمر جا عشان يوصلني الجامعه وانا جاهزه بس رفضت انزل ليهو بحجة انو لسه بتجهز وفي الحقيقه فاتحه اللاب توب وانا اصلا مخصوص عايزه إتأخر عشان تاني ما يهددني 😏 بعد ربع ساعه جاتني أنجلينا قالت لي سدن أومر كال ليك انا ها أمش أوسل سيراس هتي أرجع اوسلك ✋ نزلت بسرعه عشان احصلو بس لقيتو فعلا اتحرك 😔 وانفعلت في أنجلينا قلت ليها كيف يوصل شيراز واصلا هي عندها ترحيل كده انا ح اتأخر 😠 أنجلينا قالت لي أنا ما أعرف تهب أهمل ليك الـ ساي 😊 قلت ليها لا انتظري عمر يجي عشان ح اشرب في العربيه وانا عارفه انو عمر بتنرفز من شراب الشاي في العربيه وانا قاصده 😌 وفضلت منتظره ساعه كامله عمر ما جا في الآخر اتصلت عليهو قال لي بكل برود اركبي امجاد لإني انا وصلت الشركه ✋ قلت ليهو بحده كيف يعني في الشركه وانت عارف انك بتوصلني معاك الجامعه 😡 قال لي والله انا ما سواقك الخاص عشان تنزلي علي راحتك ومن أمس كلمتك بالمواعيد 😊 غلبني إتحمل قفلت الخط في وشو واتصلت علي بابا اشتكي ليهو واول ما إتصلتقال لي اي عمر كلمني بس انتي غلطانه اطلعي ليهو بدري ✋ يعني كمان سبقني وكلم بابا " طيب ما ح اعديها ليهو وفعلا طلعت الجامعه بس المحاضره الاولى فاتتني 😭 واليوم التاني اتجهزت بدري يا حليل بابا كان بنتظرني 😔 وشيراز شغاله تكاويني وتضحك فيني 😅 عمر وصل وضرب بوري وبرضو ماشه واتقدل قبل افتح الباب سمعتو دور العربيه عايز يتحرك فتحت الباب ركبت قال لي السلام سنه قلت ليهو ما بسلم وكنت عايز تفوتني للمره التانيه صح 😠 قال لي الساعه 7:33 يعني انتظرتك 3 دقايق إضافيه وده كرم مني والله 😊✋ قلت ليهو ميرسي علي كرمك الزائد اتحركنا فتحت الشنطه وبديت اكشكش في الكيس وآكل قال لي في زول بياكل شيبس من الصباح قلت ليهو انا عندك اعتراض 😊✋ وطبعا الشيبس داخل الشنطه ما طلعتو خفت يعمل لي زي البسكويت وهو اصلا متضايق من الصوت 😌 قال لي انا لو عندي حق فيك عشان اعترض كان اعترضت في لبسك ده 😒 انا مستغرب في عمي كيف بيسمح ليك تطلعي بالملابس دي 😓 قلت ليهو عشان بابا متفهم الموضه ما زيك قال لي باستخفاف يعني دي الموضه ههههه والله ملابسك دي لو لقيتها واقعه في الشارع ما بشيلها لـ سحر 😅 قلت ليهو الملابس البتستهزأ بيها دي تمنها بـ ماهيتك كلها 😏 قال لي وكمان فرحانه بتمنها وانها غاليه والله جنيه خساره فيها 😊 قلت ليهو عشان ما عندك ذوق بنتناقش كده لحدي ما وصلنا الجامعه اول ما نزلت لمحت سلمى و رزان ورهام واقفين جنب باب الجامعه استغربت قلت ليهم واقفين هنا ليييه 😳 قعدو يضحكو قالو لي عايزين نشوف السواق وبالجد زي ما قالت رزه قرض رهام قالت والله لو ما كان شغال سواق كان ظبطت إموري معاهو 😍 نطت رزه قالت لي لو بيوافق يتزوجني مستعده اشغلو عند بابا مدير سلمى قالت ليهم والله شغل السواقه ما عيب مدام شغل شريف انا مستعده ارتبط بيهو كده 😍 طبعا انا بسمع فيهم ومصدومه يا ربي شنو الميزه الشايفنها في عمر وانا ما شايفاها 😳 قلت ليهم دقيقه دقيقه انتو جادين في كلامكم ده وبعدين وين الوش البتتكلمو عنو ده والله 24 ساعه صّاري خلقتو 😒 قالو لي والله صرتو زاتها كسااااره 😍 قلت ليهم لم تدردقو اتدردقو في مكان نضيف عشان ما تتوسخو هسي عليكم الله رامي 😍 ولأ عمر 😏 قالو بصوووت وااااحد واااي اسمو عمر قلت ليهم لااا لااا اكييييد شربتو حاجه قبل ما انا اجي وبعدين امشو اكشفو النظر 😏✋ سلمى قالت لي والله نظرنا في الاشكال دي سته على سته 😂
وده الروتين اليومي بجي مع عمر وبرجع مع رامي وطبعا ماما خلال سفر بابا بتمشي الشغل بعربيتها قلت ليها كلمي بابا يشتري عربيه ويعين لي سواق 😓 قالت لي انتي عارفه طبع ابوك من زمان رافض انو يشتغل معانا راجل غريب عشان كده ما عندك حل غير تمشي مع عمر ✋ واستسلمت للواقع وفي يوم صحيت متأخره ولسه ما خلصت وعمر ضرب البوري وما كان بهمو لو فاتني عشان كده مضطره اطلع في الزمن المحدد 😔 وقلت ما مشكله شلت شنطتي وطلعت مستعجله وفي الطريق طلعت شنطة المكياج 😌 في الاول عمر ما كان عارف فيها شنو لحدي ما فتحتها وطلعت منها الروج ونزلت مرايه العربيه قال لي بحده شجن ده شنو 😠 قلت ليهو انت شايف شنو في البيت استعجلتني وما ح تنتظرني أخلص 😒 قاطعني بنهره دخلي الزفت ده في الشنطه بسرعه 😡 قلت ليهو ح ادخلو بعد ما اخلص 😊 قال لي شجن العربيه دي ما مظلله يعني كل الناس شايفاك 😠 قلت ليهو عااادي ما بهموني 😌✋ شال من يدي الروج وجدعو بالشباك اتخلعت قلت ليهو ده شنو 😱 قال لي حزرتك ترجعي الشنطه بس عامله عنيده وراكبه راس قلت ليهو عارف الروج الجدعتو ده بكم 😡 ده بتمن مرتبك حق شهر كاااامل قال لي ما بهمني والحركات البتعمليها لـ ابوك ما تعمليها لي ابوك مجبور يستحملك بس انا لااا ✋ راكبه معاي تتبعي قوانيني 😊 وصلنا الجامعه واليوم كلو كان قافله معاي بسبب النقاش ده ما حصل واحد اتجرأ وإستفزاني زي عمر 😒 وفي نفس اليوم المساء جات شيراز داخله وشايله في يدها كيس صغير قالت لي من متين انتي وعمر بقيتو انتيم لحدي ما يجيب ليك هدايا 😍 قلت ليها بإستهتار انا وعمر مع بعض دي ولا في المعجزات وبعدين الليله بالذات ما عايزه اسمع سيرتو 😠 شيراز ناولتني الكيس قالت لي وده تسمي شنو 😌 ؟؟ قلت ليها الكيس في يدك وتسأليني انا 😒 قالت لي وانا في الغرفه اتصل عمر عشان اقابلو جنب الباب ولم مشيت ناولني الكيس ده وطلب مني اوصلو ليك ✋ قلت ليها انتي متأكده قال ليك وصلي لـ شجن 😳 خلاص افتحي انتي الأول لأنو اكييييد ح يكون فيهو قنبله نوويه اصلا من زمان عايز يتخلص مني 😏 قالت لي حرام عليك وفعلا شيراز فتحت الكيس ونططت عيونه وقالت بخلعه 😳 ""
#يتبــــع ⏪⏪⏪⏪
