يوم الخميس عمر جا شايل لحمه وخضار قال لأمو اتصلت عزمت لؤي وسحر بكره يجو يقضو اليوم معانا وأصلا فضل ليهم إسبوع ويسافرو ✋ امو قالت ليهو احلى خبر وفعلا الجمعه قمنا بدري ودخلت مع عمتو ليلى المطبخ قلت ليها بصوت مكسور عمتو انتي عارفه انا ما بعرف اطبخ بس انتي وصفي لي وانا بشتغل معاك 😢 قالت لي تسلمي يا بتي وجودك جنبي براهو كفايه 😍 قلت ليها خلاص انا شاااطره في الحلويات قالت لي طيب اعمليها وفعلا بديت فيها عمر جا شايل أحمد يبكي قال لي أمسكي ولدك ده 😓 قلت ليهو لحظه قربت انتهي قال لي يعني فاكره روحك شغاله 😅 قلت ليهو وهسي بعمل في شنو 😒 قال يا حليلنا يا أحمد لو عايزين نستقل في بيت برانا يا ح نموت من الجوع يا ناكل حلويات عشان ماما ما بتعرف تطبخ 😅 نطت عمتو ليلى قالت ليهو اكييييد ح تتعلم مع الزمن قال ليها طيب لو انتي مافي وكنت عازم اصحابي 😊 قالت ليهو انا واثقه انها ح تبيض وشك جنبهم هسي ما شاء الله شوف البسبوسه والكٌنافه ديل فرقهم شنو من الـ في المحلات 😍 قال ليها طيب افرضي اني عازمهم غداء نقدم ليهم التحليه من غير الوجبه 😅 عمتو ليلى قالت ليهو في حاجه اسمها مطاعم اتناول الأكل وهي بتعمل التحليه قال ليها لو كده مافي داعي اعزمهم في البيت صح يا شجن وليييه ساكته 😅 قلت ليهو لانو عمتو ليلى كفت و وفت في الرد 😒 طبعا انا ساكته لانو كلامو ضربني في الوتر الحساس 😢 سحر ولؤي وصلو وكان أحلى يوم 😍 وبعد إسبوع ودعونا وسط سيل من الدموع وسافرو 😭 بعد يومين عمتو ليلى كانت مسافره لـ أختها تغير جو عشان سفر سحر مؤثر عليها شديييد قالت لي ح اطبخ ليكم كم صنف في التلاجه وانتو ما عليكم الأ تسخنو ✋ قلت ليها لااا ما في داعي نحن بنتصرف 😊 واصّريت عليها انها ما تطبخ لاني كنت بفكر في خطه للأكل وفعلا سافرت اليوم التاني عمر طلع الشغل وانا نومت أحمد بعد تعب دخلت المطبخ وقررت أعمل ملاح ويكه حبيت اعملو لـ عمر مفاجأه عشان بيحبو 😍 فتحت النت وكتبت أسهل طريقه لعمل ملاح الويكه 😅 المهم جهزت المكونات حضرتها وبديت أقطع البصله بنفس طريقة الشيف ختيت البصله في المسطبه وشلت السكين رفعتها وبدل تنزل في البصله نزلتها في يدي وجرحت أصبعي 😭 بدايه غير موفقه عملت ليها لصقه جروح ورجعت اشتغل واثناء ما بحمر في البصله أحمد صحى يبكي إضطريت أشيلو واشتغل بعد سكت نزلتو في الأرض ورجعت اشتغل وشعري كل مره يتفكا لبست طرحه وربطها بـ ورا زي الكنغوليه 😅 واتبعت نفس الخطوات من النت لحدي ما انتهيت بس ما ظبط معاي زي عمتو ليلى طلع قوامو تقيييل وملحو كتير أضفت ليهو مويه 😅 عمر إتصل قال لي اجيب معاي شنو للغداء قلت ليهو ولا حاجه قال لي كيف يعني ما عايزين حاجه طيب الغداء شنو 😳 ؟؟ قلت ليهو مفاجأه بعد تصل ح تعرف بعد قفلت الخط واصلت في الشغل وعملت التحليه كاستر ونضفت البيت وبخرتو وحممت أحمد وريحتو 😍 عمر جا داخل قبل ما انا اتحمم شافني اتخلع قال لي ده شنو البشوفك كده يقول جايه من حرب 😅 قلت ليهو اتحمم مسافة حضرت الغداء قال لي تمام بس سؤال قافله المطبخ ليييه 😳 قلت ليهو ساااي 😊 طبعا الحقيقه انو المطبخ حالتو بالبلا وجااايط 😅 عمر اتحمم وقال لي انا ما مستعجل على الغداء أول ادخلي اتحممي وفعلا دخلت اتحممت 😍 بعد انتهيت لقيت عمر فتح المطبخ نظمو ورجعو زي ما كان قلت ليهو أصلا كنت جايه انضفو بعد الغداء 😔 قال لي ما فيها حاجه لو ساعدتك والحياة شراكه صح بس بصراحه ما بعرف اغسل العده عشان كده لميتها ليك كلها في الحوض 😊 قلت ليهو ما مشكله وفعلا عملت الغداء عمر قال لي يا الله معقول ده عملتي انتي 😍 قلت ليهو اي والله والكسره اشتريتها من خالتو فاطمه قال لي واخيرا بقينا نعرف نطبخ ✋ طبعا أحمد من اللقمه الأولى لزاها بلسانو ما عايزها وانا من اول لقمه أكلتها عرفت انو عمر كان بيجامل فيني صاح الاسم والشكل ملاح ويكه بس الطعم ما مفهوم 😅 قلت ليهو عمر ما تكذب علي ما سمح وهسي ما تاكلو بنعمل حاجه غيرو قال لي والله بـ النسبه لانو اول مره حلو شديد 😍 بعد انتهينا من الغداء وقفت اغسل في العده عمر قال لي شجن امشي ارتاحي وبعدين تعالي غسليها قلت ليهو أحسن اخلصها مره واحده 😓 وبعد انتهيت منها رقدت في السرير منتهيه من التعب عمر قال لي انا طالع مشوار وح اسوق معاي أحمد تمام ✋ هزيت ليهو راسي طيب وانا متأكده عمل كده عشان أقدر أنوم وأحمد ما يزعجني وفعلا نومت من العصر صحيت المساء فتحت عيوني لقيت عمر شغال في ورق تبع الشغل رفع عينو قال لي صح النوم 😊 قلت ليهو الساعه كم ؟؟ قال لي الساعه 8 قلت ليهو ليييه ما صحيتني 😓 قال لي عشان ترتاحي اتلفت لقيت أحمد نايم عمر قال لي اطمني اكلتو بسكويت باللبن نزلت من السرير وانا لسه تعبانه عمر قال لي شجن جبت معاي اكل جاهز ما تعملي حاجه 😊 قلت ليهو نفسك اتسدت من أكلي صاح 😔 جا حضني قال لي والله ما كده بس كفايه التعب الشوفتو فيك 😢 عمر اتصل علي امو قال ليها ما شوفتي مرتي طلع عندها مواهب مدفونه وبتعرف تطبخ الليله ظبطت لي ويكه 😍 عمتو ليلي قالت ليهو بالجد قال ليها والله ولو ما مصدقاني اسأليها وناولني التلفون قلت ليها ما تصدقي يا عمتو والله كانت تجربه فاشله 😓 عمر عايز يشيل مني التلفون ضغط اصبعي المجروح من غير أشعر قلت اااي من قوة الالم عمر اتخلع اشر لي بكتفو في شنو 😳 قلت ليهو مافي حاجه قال لامو والله الملاح حلو بس شجن ما عندها ثقه في نفسها 😘 وبعد قفل الخط قال لي شجن يدك مالها قلت ليهو ما فيها حاجه 😊 قال لي لو ما فيها حاجه ما بتصرخي كده قلت ليهو جرحه صغيره عايز يولع النور قلت ليهو والله جرحه صغيره مسك يدي و ولع فلاش التلفون قال لي آآآآخ الجرحك كده شنو 😳 قلت ليهو السكين وانا مخصوص طلعت اللصقه عشان انت ما تشوفها باسني فيها قال لي نتفاهم بكره 😘 نومنا على كده الصباح عمر بيتجهز للشغل جا لابس القميص والزراير مفتوحه قلت ليهو ح تمشي الشغل كده 😓 قال لي منتظرك تتفرغي لي بس انتي ما شغاله بي ولأ امشي الشغل كده وتطلع موضه 😅 قلت ليهو ح يقولو عمر جن وقفت ازرر في القميص مسكني من خصري قال لي سنفورتي فكيت القميص قلت ليهو يلااا زررهم براك 😠 قال لي خلاااص خلااااص سحبت الكلمه قلبوشتي انا 😍 بعد انتهيت عايزه امشي قال لي حبيبي انا امس ما اتكلمت معاك عشان كنتي تعبانه بس تاني ما تعملي حاجه للغداء بجيبو معاي لحدي ما امي تجي راجعه ✋ قلت ليهو بصوت مكسور انا من الأول عارفه الطبيخ ما عجبك قاطعني قال لي والله بالعكس انا ما عشان الطبيخ بس المشكله في تنظيم الوقت 😊 يعني انتي اليوم كلو واقفه في المطبخ وما بتخلصي قطعت كلامو قلت ليهو فعلا المفروض اخلص قبل ما انت تجي بس والله أحمد اليوم كلو بيبكي فـ بضطره اني اشيلو أسكتو حتي اشتغل قال لي من قبيل ده الـ عايز اوصلو ليك انو المطبخ مع أحمد صعب عليك ✋ وانا ما بمنعك شغل المطبخ بس بعد أحمد يكبر شويه عشان تنظمي وقتك وانا عارفك دخلتي المطبخ عشان كلامي معاك يوم عازمين سحر ولؤي صح 😊 وانا ساكته مسح لي خدي بأصابع يدو وقال لي والله كنت بشغلها ليك ما اكتر حتى كنت بغمز لأمي بس ما افتكرتك ح تاخدي الموضوع جادي 😓 نن عيوني انتي والله لم اجي راجع من الشغل وتستقبليني دي عندي بالدنيا كلها وده قمة الإنجاز بالنسبه لي 😍 احسن من اجي راجع القاك بمنظر البنت الشغاله حبشيه وده كلو عشان الاكل واصلا ما فارق معاي بس انتي بتفرقي كتيييير اوك 😘 وبكرر واقول ليك ما تعملي حاجه فوق طاقتك عشان تراضينا انا واحد من الناس مقتنع بيك كده ومتيم فيك 😍 وكان بيتكلم وبمرر اصابع يدو في خدي قال لي اتفقنا هزيت ليهو راسي باسني في خدودي وراسي قال لي نن عيوني انتي 😘 وطلع الشغل بس ما سمعت كلامو وكنت مُصِره اني اكون زي اي ست بيت واقدر اسابق الزمن وفعلا اتصلت علي ماما شلت منها وصفة البطاطس باللحمه المفرومه وماما ما مصدقه اني ح ادخل المطبخ 😅 واول ما بديت اشتغل أحمد بدأ يبكي حبيبي الله يرضى عليك ساعدني بسكوتك عشان اخلص بسرعه غايتو مره يبكي ومره اشيلو لحدي ما نام 😓 عملت البطاطس ونضفت البيت بخرتو وحممت أحمد واتحممت واثناء ما بسرح في شعري عمر جا داخل شايل سجوك قال لي حمري السجك مسافة اتحمم قلت ليهو اوك 😊 وفعلا دخلت المطبخ جهزت الغدا بطاطس بلحمه مفرومه ومكرونه بالجبنه والخضار والتحليه جيلي بالبسكويت ودخلت السجوك التلاجه لم حضرت الصينيه عمر اتفاجأ قال لي الجاك منو 😳 قلت ليهو ولأ زول قال لي طيب العمل ده منو قلت ليهو انا ما عاجباك ولأ ما عاجباك 😏 في الاول ما كان مصدق قال لي يعني مٌصّره قلت ليهو بعمل البقدر عليهو قال لي تسلم ايدك طيب المره دي جرحتي يدك وين 😅 صّريت وشي قال لي ما ملاحظه الصّره عندك بقت عاده قلت ليهو من عاشر قوما 40 يوما 😅 قال لي طيب بما إنك مٌصّره تشتغلي وتتعبي إنتي حره بس لو حصل لـ طفلي حاجه لا قدر الله ح تتحملي المسؤوليه 😊 قلت ليهو والله أصلا مجنني شيلو معاك الشغل لأنو أنا ما مسؤوله عنو 😓 قال لي بس انا ما بتكلم عن أحمد بتكلم عن الـ في بطنك اهااا ح أشيلو معاي كيف 😊 ؟؟
#يتبــــع ⏪⏪⏪⏪#
