أنا وأختي👩‍👧‍👧

الحلقة ٧

: الحلقة السابعة
#انا_واختي
#بوسي_مصطفي

قضيت فترة حملي وانا بعيد عن محمود
مبيجيش البيت غير بالليل ينام ويصحي الصبح ينزل الشغل

مكونتش مستريحه بردو لانه كبر دماغه ومحاولش إنه يصالحني وكأنه مصدق

بس كان بيقضي طلبات البيت وبيدفع الإيجار وعندي شغاله يرجع البيت استريح

وهي بتاخد ياسمينه تأكلها وتلاعبها عرفت اني حامل في بنت فرحت اوي بس مقولتش لمحمود هو اصلا مبيسالش ع أي حاجه

قدرت احوش مبلغ كويس وكنت برسله اول ب اول لماما عشان معرفش الزمن مخبي ايه
ممكن محمود يغدر بيه في لحظه

عصام اخد شقتي بيعطي فيها دروس خصوصية عرفت من ماما بالصدفه
كانت فكراني اعرف وإن عصام استأذني لاني سيبت المفتاح معاه محبتش اعمل مشكلة وقولت لماما إني عارفه
ماهو اخويا برضو ومحتاج يزود دخله

وعدت فترة الحمل وجه ميعاد الولادة وجات فيروزه للدنيا
اخدتهم في حضني وكانوا معايا ف كل مكان م عدا الشغل طبعاً

محمود كان فرحان بالبنات وحاول يقرب مني وقتها
وفعلا اتصالحنا بس كان عشان مصلحة البنات

وكل سنه كنت بنزل مصر
اشتريت قطعة أرض وقولت احوش واعمل عليها مشروع

البنات كبروا وياسمينة بقي عندها 15 سنه وفيروزه 10 سنين

كنت لازم أضحى عشان مستقبلهم واوفق إنهم ينزلوا مصر يكملوا دراستهم هناك
ياسمينه أولي ثانوي
فيروزه  خامسة إبتدائي

في مصر
نادين/ مش قادرة اسيبهم ياماما

تهاني/ متخافيش عليهم يابنتي انا هربيهم زي م ربيتك بالظبط
نادين/ البنات أمانة عندك ياماما اوعى عينك تغيب عنهم

تهاني/ انا كان من رأيي تقعدي معاهم هنا يابنتي

نادين/ م انا قولتلك ياماما محمود قالي لو نزلت مصر هياخد البنات مني هنا هيعيشوا وسطكو وانا هكون مطمنه عليهم
تهاني/ طب قوليلي البتاع ده بيتصل منين

نادين/ اسمه موبايل ياماما
تهاني/ طيب يااختي شوفي الموبلي دا بيشتغل ازاي
نادين/هههههه موبلي ايه ياماما
موبايل. ...

تهاني/ بتضحكي عليه يانادين
هو مين اللي علمك تتكلمي مش انا بردو

نادين/ طبعاً ياست الكل متزعلييش بقي كنت بهرج معاكي
تهاني/ بقولك ايه قولى لعيالك دول ياكلوا وبلاش من البسكوت والكاراتية والحاجات دي

ياسمينه/ عيال ايه ي تيته
احنا كبرنا وبقينا أنسات اهو ولا ايه يافيروز
فيروز/ اه انا أنسه صغيرة وياسمينه أنسه كبيره

تهاني/ طيب مدمزيل انتي وهي يلا ادخلوا اغسلوا ايدكو وتعالوا عشان نتغدا أما اشوف الأكل دا هيتاكل ولا هتدلعوا زي مامتكو