Mystic (COMPLETED) (Published by PHR)

Ten

"Malupit ang nakagisnan kong ina-inahan," sagot ni Nerissa. "Ipinamumukha sa akin na utang-na-loob ko ang pagkakaampon nila sa akin. At dapat ay suklian ko ng katapatan at kasipagan. Kahit baon ko sa paaralan ay tipid na tipid. Bagaman si Papa Benito ay palihim na nag-aabot sa akin ng pera. Malimit kong itanong sa sarili kung bakit pa nila ako inampon.

"Naisip ko ring hindi naman talaga ako gustong ampunin ni Mama Carmen. Katunayan ay si Papa lang daw ang may gustong ampunin ako. Nagkataon lang na hindi raw magawang tanggihan ako ni Mama dahil sa bahay nila ako ipinanganak at doon din namatay ang aking ina.

"O marahil nagsimula ang kalupitan nang mapuna ni Mama Carmen nang makitang mas malapit ako kay Papa Benito." Sinulyapan siya nito sandali. "Ang sabi ng mga katulong sa malaking bahay ay hindi dating ganoon si Mama Carmen. Magmula na lang daw nang maging malapit kami ni Papa Benito sa isa't isa. Gusto kong isiping nagseselos siya sa atensiyon ni Papa Benito sa akin."

"Well, I don't want to meet a grandmother like that!" she said stomping her foot. "Ano ang nangyari?"

"Kahit paano ay mahal ko sila sa kabila ng lahat. Lalo na si Papa. Nang malaman nilang nagdalang-tao ako sa iyo ay pinalayas ako ni Mama. Hindi ko alam kung ano ang gagawin ko at kung saan ako patungo. Masama rin ang loob ko sa kinikilala kong ama dahil wala siyang magawa kahit sukal sa loob niya ang pagpapalayas sa akin ni Mama Carmen."

Tinitigan si Mavis ng ina. Kapagkuwa'y tumayo ito at ipinagpatuloy ang paglalagay ng mga gamit sa tokador sa isang bag. Iniisip niyang tinapos na nito ang pagsasalita subalit nagpatuloy si Nerissa.

"Ano man ang ibinabato mo sa aking kasalanan ko ay hindi ako naging masamang ina, Mavis. Kahit minsan ay hindi pumasok sa isip ko na ipalaglag ka. Sa puso at isip ko ay ikaw lang ang matatawag kong akin. Dugo ng aking dugo at laman ng aking laman." Her mother's voice was filled with passion. "Kung may ipinag-aalala man ako nang panahong iyon ay ang kawalan ng pera at nagdadalang-tao pa at walang patutunguhan."

"You had nothing? Not even money?"

Tumango si Nerissa. "Hindi ko man gustong gawin ay nagnakaw ako ng pera kay Mama. Tinangay ko rin ang ilang alahas niya. Natuklasan ko kung saan niya itinatago ang mga kahon ng alahas niya nang minsang nanubok ako. Nakita ko siyang hinahawakan ang kuwintas na iyan na puno ng pagkasuklam ang mga mata." Inginuso nito ang kuwintas na nasa leeg niya.

Unconsciously, her hand went to her chest and touched the pendant of her necklace through the fabric of her T-shirt.

"Nang itago niya uli ang jewelry box ay doon ko nakita ang taguan niya ng mga alahas. Nasa ilalim iyon ng drawer ng tokador niya. Kailangang alisin muna ang drawer at sa ilalim ay may isa pang lagayan doon."

Itinaas ni Mavis ang kuwintas. May isang maliit na parihabang pendant iyon na may nakaukit na "M" sa gitna.

"Ang kuwintas na iyan lang ang hindi ko nagawang ipagbili noong panahong iyon kahit nang maranasan kong magipit."

"And I thought you bought this for me."

"Benito ang pangalan ni Papa at Carmen naman si Mama. Hindi ko alam kung bakit M ang nakaukit diyan sa kuwintas. Ipinasya kong ang pangalan mo ay dapat angkop sa letrang nakaukit diyan sa pendant."

"Saan ka nagtungo, Mommy, nang lumayas ka?" Ibinalik niya ang usapan noong panahong umalis ito sa poder ng mga umampon.

"Nang una ay sa Pagudpud. Hindi kalayuan ang biyahe mula sa amin patungo roon. Sa isang resort ako naglagi at kunwa ay isang turista roon." A thoughtful smile hovered her mother's lips. "May nakilala akong pamilya na nagmamay-ari ng isang restaurant sa Maynila. Hindi ko sinabing naglayas ako kundi tagaroon lang at naghahanap ng trabaho sa resort.