Mystic (COMPLETED) (Published by PHR)

Twenty - four

Wala pa silang isang oras sa groserya dahil kabisado na naman ni Mavis ang bibilhin. Mula roon ay dumeretso na sila pauwi sa Bangui. Tatlumpung minuto na siyang nagmamaneho. Nang lingunin niya sa likod si Benjo ay nakatulog ito matapos niyang sagutin ang walang katapusang mga tanong nito.

Alas-tres na ng hapon. Hindi siya nakatitiyak kung nasa Bangui si Rolf. They didn't get to the point of exchanging cell phone numbers. Hindi rin naman niya naitanong kay Anna ang numero ng telepono sa malaking bahay. Medyo kinakabahan siyang baka masamain nitong magkasama sila ni Benjo.

Nanatili si Rolf sa isip niya. Ilang beses na naglaro sa isip niya ang namagitan sa kanila sa parang. Hindi niya maiwasang makadama ng masarap na kilabot. Pero nalilito pa rin siya sa kung ano ang relasyon sa pagitan nina Rolf at Anna.

Nasa ganoong pag-iisip si Mavis nang hindi sinasadyang mapasulyap siya sa sideview mirror. Isang nagmamadaling sasakyan ang nasa likuran niya. She frowned. They were already at the zigzag. Kung gusto nitong mag-overtake ay ngayon na niya pagbibigyan. Nagmenor siya at bahagyang gumilid sa kanan. Maluwang ang kaliwa para maka-overtake ito kung iyon man ang nais nitong gawin.

Subalit sa pagtataka niya ay hindi kumabig pakaliwa ang nagmamaneho ng sasakyan. Nasa likuran niya ito at bumibilis ang takbo. May kung anong kabang bumundol sa dibdib niya nang mapuna ang sasakyan sa rearview mirror. Lumang modelo na ang sasakyan at may mga patse sa hood na tulad niyong nayupi at inayos at nakalaan para pinturahan.

Nakadama siya ng panlalamig. Gustong umikot ang paningin niya. "No. Not now, please." Ilang beses siyang humugot ng hininga. Inabot niya ang braso at mariing kinurot ang sarili upang mabaling sa sakit ang buong atensiyon niya at hindi magpadala sa muling pagbangon ng pangitain.

Muntik na siyang mapatili sa biglang pagbundol ng lumang sasakyan sa likuran ng bumper niya. At bagaman hindi naman gaanong kalakasan ang bundol dahil sumabay iyon sa pag-apak niya sa silinyador para bilisan ang pagpapatakbo, muntik na siyang mawalan ng kontrol. Her body moved forward but inertia-reel seat belt made her bounce back to her seat.

Her hands gripped the driving wheel to the point that she must have cut the flow of her blood. She swerved forward and to the left. Muntik na siyang mapasigaw dahil bangin ang tutunguhin niya. Subalit agad niyang nakabig ang manibela sa kanan at sinikap na huwag mag-panic sa kabila ng matinding takot na nararamdaman.

"I cannot have that accident the second time around!" she murmured to herself angrily. Sinulyapan sa rearview mirror si Benjo na umungol pero hindi tuluyang nagising sa kabila ng pagkakabundol sa bumper sa likuran.

Hindi mapapayagan ni Mavis na madamay ang bata sa kung sino mang walang magawang driver. Pinatulin niya ang takbo at muntik pa siyang madagil ng isang pasalubong na sasakyan mula sa kabilang lane kung hindi niya kaagad nakabig pakanan ang Wrangler.

"Oh, god! I'm sorry... I'm sorry..." natatarantang sabi niya nang marinig ang malakas na blast ng busina nang muntik na niyang madagil na sasakyan.

Muli siyang sumulyap sa sideview mirror. Hindi na niya kasunod ang lumang sasakyan. Sa halip ay magkasunod na dalawang magkaibang sasakyan ang nakita niya. Isang pampasaherong jeep at isang puting kotse.

Relief made her weak. Humihingal na nagmenor si Mavis. Malapit na siya sa deck at natitiyak niyang may mga tao roon na tumutunghay sa windmills. She uttered a silent prayer. Nag-overtake ang pampasaherong jeep sa kanya. Ang kasunod na isa pang kotse ay iyon din ang balak. Kinakabahan siyang kapag nawala ang kasunod niyang sasakyan ay baka ang lumang kotse ang makita niya.

Nang sumulyap siya sa rearview mirror ay napuna niya ang flashing ng headlight ng isang sasakyan. Muli siyang kinabahan. Subalit nakikita niyang hindi iyon ang sasakyang bumundol sa kanya. But headlights flashing could mean for her to stop. A police car? No. Or else she would have heard the siren. She ignored the signal. Ipinagpatuloy ang pagmamaneho.