✴ رهــينــة حـب ...💚(كرونيك باللهجة التونسية )

❤ 💜الحلقة الاولى 💜 ❤

💚✴💚✴💚✴

الوقت كان العشرة متاع الصباح ، طقس ضباب ، ريح ، مطر تصب....بون  تنكت دوبلاش ، أما البرد يضرب طول في العظام ، يسوق في كرهبتو منظم روحو و ماخو وقتو الكل ، خزر للماشين والجايين  ، حاشين روسهم في الكبابط ، الساقين تزرب خايفة من تنفيخة المطر ,دور الفولون شيخطف الدورة لبيت  نهاد ، خطيبتو من عامين ، موضوع مهم لازم يحكو فيه  وكان ملزوم عليه يمشي،  هكا هو تخيل ، ع الدورة تقص عليه طفلة ،شعرها مبلول بكلو واصل حد أكتافها.... و في هاك النهار الشاتي ، بلا كبوط ، كان تريكو ازرق منفخ بالماء ، شد فران بالوقت ،وهي غطت وجها محضرة روحها للاكسيدون ، قلبو طاح في بلاصتو من الطاف الله حبس اخر ثانية ، حل باب الكرهبة و هبط ماشيلها ، ترعش من راسها لساقها

"أختي لاباس!؟ "

سألها مفجوع و هو يحاول يشوف وجها ويطمنها وينحي عليها الخوف

"صاحبي "

خزر للصوت ، جاي من راجل جنش يڨحرلو بعين فيها الف تنبيه وتهديد...كيما ماتقربهاش  ،شافو يشدها من ذراعها و يجبدها معاه ، قعد مبهم ، هاذم باز زوز متعاركين والاومور متأزمة بيناتهم والطفلة خلاتو و مشات وهو خلط يرضي فيها ، تبعهم الزوز و هوما ماشين تحت المطر ، كان يجبد فيها وهي مطاوعتو ، حس بروحو بدا يتبل لازم يرجع لكرهبتو ، قبل ما يتنفخ ، في اخر لحظة تلفتتلو ، شعرها مغطي وجها والماء يقطر و دبشها لاصق عليها ، خزرة عينها فيها الف حكاية، عقد حواجبوو حاول يتفكر   ، ها الوجه  وين راه .
💜💚💜💚

حلت الباب ، اول ماشافتو عنقتو و سرقت بوسة من خدو " الجماعة من بكري يستناو ، تي هاك مبلول"

تبسم وهو يدخل " المطر خيرات لبرا موش كيفك خانسة "

دست يدها في مرفقو و رجعت شعرها وراء وذنها " باش يموتو ويعرفو علاش لميناهم

"ظاهرة الحكاية علاش"

دخلو للصالة ، وقفو الكل وسلمو عليه ، امها وبوها وخوها ومرتو و ولدو الصغير ،

امها " كان هكا بدل حوايجك وخوذ قطعة من عند نسيبك "

هو " لا لا صفا ، ديجا مانيش باش نقعد "

عقدت نهاد حواجبها " ياخا ماكش باش تقعد تفطر حذانا "

هو" تعرف عندي خدمة وبالسيف خذيت ساعة "

لوات فمها موش عاجبها

هو " بون خليني نقلكم علاه لميناكم ، أنا و نهاد قررنا نعرسو و زيد حددنا دات العرس ، ان شاء الله في مارس يعني شهرين اخرين ، حبيتكم تسمعوها مني "

نهاد " لقيناه وقت مناسب لينا باش نتلمو في دار وحدة "

امها" و تنجمو تڨدو رواحكم ، هذا عرس ولازمو بارشا تحضير ، ايلي قصدتو شهرين يكفيكم باش تحضرو "