✴ رهــينــة حـب ...💚(كرونيك باللهجة التونسية )

💜✴الحلقة الثالثة ✴💜

✴❤💗✴❤✴💗❤✴

خذى التصويرة المرسومة بالرصاص وايلي ترسمت حسب الاوصاف ايلي قال عليها ، كيف ماشافو رسمو ، و يعطيه الصحة ايلي رسمها كيف ماقالو بالضبط ، لين تسخايلها هو بيدو
"حمزة لازمك تعرفلي شكون هذا، و شنوة علاقتو بمريم ، كل شي لازم تعرفو على ها الشخص وفي اقل من اربعة وعشرين ساعة "
"باهي سي يامن ، انا شنحاول نجيب المعلومات هاذي في اقل وقت ممكن "
"يااامن " استغرب من الصوت ايلي يناديلو ، تلفت هو وحمزة ، شاف ميسون جاية تلهث ،وقت وصلتهم كان وجها اصفر و تنفس بالقوي " اكيد مريم ما ماتتش ، مريم حية "
يامن " شبيك تلهث ...شفمة "
ميسون " انا ايلي لازم نسألك ، أنت كيفاش عرفت ايلي مريم لابسة تريكو ازرق"
"باهي هدي روحك ، تو انا نحكيلك علاش وكيفاش عرفت "
خذى الورقة من عند حمزة وورهالها " شوف ...هذا تعرفو ، ريتو مع مريم"
وساعت عينها وهي تثبت " ايه ...ايه ...هذا بيدو ايلي ضرب بابا "
عقد حواجبو " ضرب بوك "
"هذا هو ولد الحرام ايلي اختي كانت تاخو من عندو الحرابش ، وبابا مشالو ونبه عليه يبعد عليها ويقينها اما هو ضربو ولتوا بلاصة الجرح في جبين بابا كان شفتها "
صحيح ، لسعد كان في جبينو بلاصة جرح تفكر ايلي راها " اما بوك قال ماصار حتى شي بينو وبين المجرمة هاذم "
"علاش موش حاب تفهم الكل في الدار موش عارفين ولا فاهمين شنوة يعملو ، بابا لتوا لا ذاق النوم وامي كي المجنونة كل ماينوقز الباب تقول هاذي مريم رجعت ، عايشين في جحيم و الوقت يتعدى و هي غايبة ، ربي وحدو يعلم شنوة صاير معاها توا ، وشنوة تعاني"
"باهي ،قلي شنوة تعرف عليه، اسمو منين وكيفاش عرفتو "
"مانعرفش ..اسمو مانعرفش ، ظهر مانعرفوش عليه منين"
"ربما يكون هو الاكس متاعها "
"لالا ...موش هو "
"انت تعرفو الاكس موش هكا...تعرفو وهذا هو الشي ايلي مخبيتو "
سكتت و شفايفها رعشو ، شوافرها تحركو بطريقة متاع وحدة متوترة و ماعرفتش شنوة تعمل " ايه ...نعرفو ....مريم حكاتلي و انا ....."
قص على كلامها"كيفاش تخبي حاجة كي هكا نرمال انت ميسون "
"باهي صفااا...غدوة نحكيلك كل شي و نقلك هو شكون "
شدها من مرفقها"بين ليوم غدوة يمكن نخسرو مريم ولازم توا تقلي هو شكون "
نطرتلو يدو " ماتخافش الاكس متاعها ماعندو حتى دخل في غيابها ، ومانتصورش عندو يد في الحكاية ،اما كي تقول  هو ايلي حطملها حياتهانقلك اي عندو دخل  "
مااستنتوش يزيد كلمة وكملت " غدوة ، خليني نشوف ...ونحكيلك كل شي "
مشاات وخلاتو باهت ، حاير وموش فاهم ،  شي
حمزة" هاالطفلة تنجم تعاونا مليح"
" هوما لكل امها وبوها و هي ينجمو يعاونونا اما فمة خوف في الوسط ...خوف مسيطر على كل واحد فيهم " 

✴❤✴💜

تخزرلو وهو ياكل ، ماخو راحتو على الاخير ، فركت صوابعها و هي تلوي في فمها بقلق "والله تاكل تقول كاينو ماصار شي بيناتنا"
وهو يمضغ" ليوم ما فطرتش ، ميت بالجوع " فرغ فمو من الماكلة " وزيد  في بالي جونا احلى جو "
"خليتني يامن ، خليتني مطيشة و مشيت و كاينو انا حتى شي"
"عزيزتي ، وقتها وقت خدمة وانا مع الخدمة نتحول، نولي وحش يخوف"
"صحيح تخوف ...وانا توا خايفة منك بارشا"
"مالا رد بالك نڨدمك وخاصة ايلي انا ميت جوع " تبسمت وهي تحاول تشد روحها و ماتسامحهوش "يااامن ، سريو نحكي راو "
"يزي عاد اكاهاو ، باهي انا مهبول في راسي في وقت الخدمة ، باش نكونو عصيفرات مااحلانا ..ماتدورش بيا وقتها "
"المشكل خدمتك ماخذة كل وقتك "
"الله غالب ...لازمك تتحمل "
غمزها وهو يكمل ياكل ، وقت شافها تبسمت عرف ايلي سامحتو و طفت الضو " اه حقا ...صاحبتك ...مريم ويني ...من وقتاش ما سألتش عليها "
حمار وجها وبعد ولى شاحب و شفايفها بداو يرعشو " م..مريم "
"ايه...موش كانت صاحبتك "
بلعت ريقها بصعوبة " كانت وكيما قتلك ...بعد الفاك تقطع كل شي و معادش...يعني معادش نحكاو "
"وشنوة السبب"
"مافمة حتى سبب ، اكاهاو كل حد شاف طريقو في حياتو " حس في لهجتها شوية قلق عصبية ، ثبت فيها و حب يفهم شنوة خلاها تفد هكا .