✴ رهــينــة حـب ...💚(كرونيك باللهجة التونسية )

💚الحلقة الثامنة والعشرون 💚

              💙🌸🌸🌸🌸🌸💙

هبط وخلى الباب محلول ، التاليفون في يدو و راسو يلوج  عليها ، كيف المهبول يدور في الوسط ، ماشي ويقدم لين سمع صوت تنوقيزة تاليفونها طول جات عينيه عليها ، متكية ع الشجرة وقاعدة لوطة لامة ساقيها بيديها و مهبطة راسها عليهم وشعرها هابط ، فمة حاجة كيف الابرة دڨتو في لحمة حية ، كورون في بدنو الكل مشى، ثقلت ساقيه وبالسيف حركها ناحيتها ، كل مايقرب كل ماتبان الحالة اكثر ، صاكها المفرت ، بلاصة التراب المحير والحشيش المكسر ، يدل فمة برشا حركة صارت عليه ، فردة صباطها البعيدة عليها ، شوميزتها ايلي تقطعت من اكتافها

"ميسون "

هزت راسها ،عينيها منفخة بالبكاء و الكحل والماسكرا سايح على وجها فمة تخبيشات وين فمها ،لفت الشوميزة عليها وين حاولت تخبي  بدنها اما ما نجحتش تخبي الجروح ايلي في رقبتها ، هبط على ركايبو قدامها، و شدها من يديها الزوز "شكون عمل فيك هكا "

على كلمتو اطرشقت بالبكاء ، جبدها لصدرو و كبس عليها ،مسح على شعرها "اشششس...كل شي تعدى توا ...هدي روحك ...معادش تخمم في شي ....انا معاك وحذاكا"

بعدها علي شوية باش يشوف وجها" ميسون ...يزي من البكاء ..هيا نمشاو للكرهبة "

"لا لا لا..." زادت لفت روحها بالشوميزة ، كان لابس جيلاي نوار متاع ربيع وتحتها كان مريول نص نحاها و لفها بيها "هيا نمشاو "

مانجمتش تتحرك  بدنها كان مخدر و هي عاجزة تحركو ، لا ساقيها تنجم تهزها و لا يديها تسندها ، عدى يدو تحتها وايدو الاخرى وراء ظهرها و حملها ، هزها للكرهبة و حطها ع الكرسي "ارتاح ...نمشي ناخولك دبوزة ماء " شدتلو  يدو"لا ماتمشيش ماتخلينيش وحدي "

قعد يثبت فيها ومن بعد طلع بجنبها ،لوج يلقاش دبوزة ناساها لقى وحدة نص ايترا فيها شطر ، حلها ومسحلها فمها "خوذ اشرب شوية "

شربت شوية وماكثرتش ، خذى بابياي ومسحلها وجها ويديها ، ركحلها شعرها وسكرلها الجيلاي
"هوني من هوني امان ...بعدني "

"باهي ...هدي روحك هانا باش نخرجو "

                  💙🌸🌸🌸🌸💙

موش منجمة تشد بلاصة كي الزربوط تدور و هي ضربة اثنين تهز في شعرها من على عينيها، اما هو كان كيف عادتو كالم يتبع فيها بعينيه و صوابع يدو تضرب ع الكرسي

"علاه ماخليتهمش .....نحب نفهم انت كيفاش تخمم...من جهة تقلي نحب ندمر عايلة آمنة ومن جهة تعمل فيها بطل و تمشي تمنع بنتها...وقت ايلي ريتك ماشي ناحيتهم وضربتهم قلت هذا خج في مخو ...دخل وخرج في الحلة ...سكيزوفران انت "