✴ رهــينــة حـب ...💚(كرونيك باللهجة التونسية )

🍁❄الحلقة التاسعة عشر ❄🍁

                     💠✴✴💠

زاد مشى خطوات ناحيتها ، خزر لعينيها ايلي كي راتو لمعت "مريومة"
"اكيد موش صدفة انت وميسون خممت في ها الفازة "
"ماعنديش حل اخر باش نحكي معاك ...للدار امك ماتقبلنيش...تاليفون ماتهزش...انت موش قابلة تحكي كلمة وحدة معايا...لكن انا لازمني نحكي معاه"
"بخصوص شنية في بالي مافمة شي يتحكى"
"حياتك"
"حياتي وانا حرة فيها مايتدخل فيها حد...ويعيشك برا من هوني اذا استبطانا زاهر تو يجي وزيد يلقاني هوني يعمل مشكلة "
" زاهر!؟ تي شكون هو ..ومنين جاء ..عرفتو في نهارين وليت تقول يعمل ومايعملش ..ايه خليه يجي وخليه يراني ..بالكي انا مخبي حاجة ...مريم مستحيل نخليك تعرس بيه وانت موش راضية ..مستحيل نخليك تتعذب جرايري تفهم ماهو"
"علاش تعمل هكا ...فهمني شنوة حابني نعمل..نقعد انا نرى فيك تتمعشق مع صاحبتي ونسمع سبانها واهاناتها ونتحمل ...انا ضحيت بما فيه الكفاية يامن ...وتوا ماعادش باش نكون ضحيتكم "
"انا و صاحبتك ايلي تحكي عليها كل حد على روحو...وفى المكتوب بيناتنا "
قعدت تثبت فيه صحيح زعمة كلامو ، تفرح والا لا، ماعادش حاسة بشي وموش فاهمة شنوة لازمها تقول
" مريم ..قبل ما تدخل في رسميات معاه...قص كل شي منع روحك منو ...انت ماتحبوش ماحاجتكش بيه "
"باهي واذا انا قصيت معاه ...ومن بعد"
"من بعد كل شي يجي بطبيعتو "
"لا يامن ...خذيت قراري وساياي ومعادش نرجع فيه "
"انت تعرف شمعناها تعيش مع انسان ماتحبوش وتحب غيرو "
"لا اما نعرف شمعناها نحب انسان وهو يحب غيري ...قالو ناس بكري خوذ ايلي يحبك وماتاخوش ايلي تحبو ، ايلي يحبك يصونك وايلي تحبو يذلك...بالضبط كيف ماصارلي ، ميسووووون ...خلينا نمشاو .. ومن بعد عندي حساب معاك"
تعدات من جنبو ومشات من غير ماتتلفت ، خرجت ميسون ووجها حزين سمعت كل شي تقال ، هزت اكتافها بمعنى الله غالب خلطت على اختها و خلاتو وراها ، غمض عينو بحسرة وقلة حيلة ، مريم ضاعت ساياي من وجيعة راجل حبتو لوجيعة راجل ماتحبوش و هو السبب وايلي مأثر عليه اكثر انو مانجمش يعمل حتى حاجة باش يعاونها .
                           🌸💚💚🌸

تصب في القهوة ويدها ترڨل ، لين تنطر منها قطرات ع الطاولة ، مسحتهم بربثة ، لسعد كان شايف كل شي ومتبع كل شي وملاحظ ايلي هي ماهيش ولابد ، مدتلو الفنجان خذاه منها وشدلها يدها " آمنة ماكش طبيعية...شنوة صار شبيك متقلقة "
" لا شي ...شوية هكا متوترة ملي باش يصير نهار الخطبة، بصراحة مريم عزيزة وغالية عليا شفنا الدار قداش ظلمة في غيابها وتوا باش تسافر وتخلينا "
ضحك وهو يترشف من القهوة و باقي ما نحاش عليها عينيه " كيما قالت صاحبتك...بالاخير باش يمشو لديار رجالهم...ماشاء الله زوز عصيفرات كبرو وولو صبايا وتوا باش نعرسولهم...ايه الدنيا قداش تجري امس في الايام يتكعبرو هكا بين ساقينا...تحب الحق ..انا زادا قلبي واجعني على فراقها...مازلت ماشبعتش منها...و بيني وبينك نخمم نأجل الخطبة "
"لا ...فاش قام تأجل خليه تعرس خلي تمشي من ها البلاد وتنسى كل شي صار هوني"
"زعمة تكون متهنية...وجها شاحب..اصفر و ذابلة كي الوردة ...ياريت ماجاش زاهرهذا ...هي وافقت باش تنسى اما تنجم زعمة...تعذبت على خاطر يامن ...و ابراهيم زادا ..."
اسم ابراهيم خلاها تشرقفي قهوتها ، مدلها كاس ماء" اللطف شبيك ...باسم الله لاباس"
شربت ومسحت فمها " صفا...بربي اش مجبدك فيه سي وذني"
"قلبي ماهوش مرتاح ...حاس حاجة باش تصير ...خايف باش نكذب ...خايف ع الاخير ...لو ابراهيم يضر البنات والا يضرك"
"موش البوليسية قالو مراقبينو ...موش هو مستحيل يعمل حاجة توا...موش مشكلتو معايا ...البنات مادخلهم شي "
"اذا يقرب منك والا منهم والله نحرقو كيما حرقنا على مريم "
"بربي اقلب علينا الموضوع مانحبش نحكي عليه ايلي ريناه منو يكفي"
هي موش فاهمة اصلا لواه خبت عليه ، ممكن تخاف لسعد يعملش مصيبة لابراهيم وهكاكا تخسر كل شي ،خممت تعدي خطبة بنتها وتتهنى عليها مع زاهر و بعد تخمم كيفاش ترجعلو الصاع صاعين ، لازم عقلها يخدم وتخرج من ايلي هي.فيه بذكاء .