✴ رهــينــة حـب ...💚(كرونيك باللهجة التونسية )

💚الحلقة الثامنة عشر 💚

              🍁💠💠🍁

حطو ع الطاولة و جبد يدها الباردة المثلجة،حس بخوفها ورعشتها ووجها تقلب قال أكيد   خاطر موش مستانسة بيه
"مريم...تخافش...انا معاك...اناوانت توا عبارة مخطوبين ...اخر الجمعة ان شاء الله نخطبك رسمي ..و من بعد نتفاهمو نكتبو الصداق باش نهزو لالمانيا ونريڨلك اومورك قبل ما تطلع معايا...لذا عيش الزين ماتكونش خايفة مني و هكا جابدة روحك...تعرف انا خفت من الاول قلت ماعجبتكش خزرتك كانت موش هي ، وماعلى بالك بيا اما توا عرفت ايلي كان ستراس اكاهاو ...من اول ماريتك ياسر دخلت للقلبي..اول طفلة وجها يجبدني و يخلينا نحطها في مخي"
لا كلامو ولا هو ولا البلاصة كانت تهمها..قداش صعيبة عليها انو حياتها تكمل مع زاهر ...قلبها ميت معاه رغم انو ماتجيش ربع ساعة ملي دخلو حست روحها قلقت و نفرت منو ، حل الكوفر وجبد منو خاتم صغير فينو لمع اول ماخرج للضو ، عينيها ركزت ع الخاتم، هو حلو اما ماعينهاش تلبسو ، جبد يدها مرة اخرى واختار صبعها باش يحطو فيه، عصر عليها قلبها و حست بضيق في صدرها ، كمشت يدها وحاولت تجبدها اما زاهر شدها "مريومة...عيش الزين ...سيب روحك علاه ها الكبسة...ارخف روحك "
غمضت عينها ، كلام نهاد و قسوتها الكبيرة خلاتها تحل يدها وترخف روحها...توا معادش فيها ومعادش فمة رجوع بدات في طريق عارفة شنوة باش يصيرلها فيه ، لذا لازم ترضى بالواقع وتكون اقوى واذا ماقويتش روحك بروحك حد ما يقويك و  مايسندك  كان ظهرك .
خزرت للخاتم ايلي زين يدها ، حستو لفعة دايرة بيدها وتعصر فيها وبدات تخنقها ، شدت دمعتها بالسيف "مرسي ...ياسر حلو "
انت تستاهل كل خير ...اقل حاجة انجم نعطيهالك ...قلي فاضية نهار الجمعة "
"علاه"
"شنختارو خاتم اخر...خاتم الخطبة الرسمي"
"هذا يكفي ويوفي"
"هذا هدية صغرونة لا اكثر لا اقل ...وزيد ماذبيا نزيد نبقى معاك اكثر ... اه شقلت "
لازمها تكمل ايلي بداتو " كيما تحب"

                ✴✴🍀🍀✴✴

صوت الموج يتكسر ع الحجر ، السحاب الاكحل مغطي زرقة السماء ،ريحة الملح الخارجة من البحر ، خلاتو يسهى بعيد، في عالم اخر ، لو يرجع الزمان و كان مع مريم ، توا كانت بجنبو ومعاه و تحكي وتضحك ، تجري هاربة منو ، خالقة حياة جديدة معاه ، حمزة قعد ساكت ، الكلام موش ديما يرتح يكفي يقعد حد معاك ويسكت ، وخلي البال يسرح وحدو ، ريح باردة ضربت وجهو فيقتو من عالمو ،تلفت لصاحبو ايلي يخزرلو بعين موش فاهمة اما متفهمة وضعو " خلينا نرجعو...يزي من الراحة "
وقف قدامو " يامن!..شبيك...فمة حاجة مقلقتك حاجة مخلية وضعك هكا..مريض؟ اذا مريض كلم سي عامر تعرفو مايردكش"
"مريض...ايه...بالحق مريض"
"لاباس!؟ ماتخلينيش مفجوع عليك "
"مريض والمرض هوني " حط يدو على قلبو وضرب البلاصة بقوة " هوني مرضي هوني دايا ، هوني سبب عذابي "
"خاطر بعدت على نهاد...والا فمة سبب اخر خلاك تعمل هكا "
"نهاد...موش نهاد...ماهيش هي...حكاية جات بطبيعتها ...حكايات تكشفت من بعد قضية مريم ...ايلي صار معاها فيقني على حاجات ماتخيلتش اني  شنولي في ها الحالة"
مالقى حتى كلام يواسيه بيه ، مايعرفش يناقش ويحلل مشاكل الحب والقلب ، هاكي علاه مالقى كان السكوت ،
"خلينا نرجعو "
نوقز تاليفونو اول ماشاف الاسم تبدل وجهو "ألو ميسون "
"هاني في الكرهبة " علمو حمزة و مشى ماحبش يتلفت وراه ولا يسمع شنوة الكلام ايلي شيتقال بيناتهم رغم انو حاب بارشا، ميسون تعحبو بارشا وتعلق بيها ، وقربها من يامن قلقو ع الاخير، وقت حكالو علي مقلقو ، على وجيعة قلبو ...زاد شكو و كي قال ايلي قضية مريم بدلت بارشا حاجات تأكد شكو ..يامن و ميسون يحبو بعضهم ، لازمو ينسى ايلي صاير معاه ، صاحبو قبل كل شي ، ماهيش مرا ايلي باش تفسد علاقتو بيامن ، كل شي يفوت ويتعدى اما الغدرة كي الوشام ماتتنحاش .
" اه ميسون شفمة
" يامن  مريم وافقت على زاهر"
" نعرف "
"تعرف ومازلت قاعد...انت السبب فيلي يصير معاها اتحمل مسؤوليتك، لو ريتها اك الليلة كيفاش تبكي ، قلبك يولي دم ، اختي تعاني وانت لازم اطلعها من ها البير ، غدوة باش يمشو يشرو الخاتم، تو نعطيك البلاصة انا شيهزوني معاهم تو نعطيك الصحيح من بعد"