✴ رهــينــة حـب ...💚(كرونيك باللهجة التونسية )

🍀❄الحلقة السابعة ❄🍀

❄🌺🌺❄

حبس كرهبتو بالضبط وين قريب يضرب مريم بالكرهبة ، رجعت لبالو تصويرتها وهي مغطية وجها ، هبط وعينو شردت طول لوين مشات مع الصحبي ، مافمة شي يدل على بلاصة تنجم تكون مخبى لوحدة مخطوفة ، عاود سركيلا في الانهج وين يلقى خرابة والا دار مهجورة يدخل يلوج و في الاخير مالقى شي ،نوقز تاليفونو كان حمزة هو ايلي طالبو " اه حمزة"

"كيما توقعنا ...الفار شدو المنداف "

"شنوة فمة "

"كيما قلتلنا نحطو دار ابراهيم تحت المراقبة وخاصة التاليفونات ايلي تجي وايلي تخرج ...بعد ماخرجنا بساعة ...فمة واحد من الفيلا طلب نومرو اخر ، الكلام كان مشفر بارشا لكن نجمنا نفهمو الا هو يلمح لمريم "

"والنومرو لاخر شكون...اكيد الصحبي"

"خلينا نقولو تسعين بالمية "

"حددتو البلاصة "

"حددنا وتوا نستنى في الاذن باش نتحركو "

"ابعثلي البلاصة"

"يامن ...يمكن يكونو مسلحين من الاحسن تستنانا ونداهمو مع بعضنا "

"حمزة ...ابعثلي البلاصة "

🍁💚🍁

عجاجة مشى طول للبلاصة ، بنية متاع ياجور فيها إقامة قاعدين يبنو فيها وبجنبها تيرانات مسيبة و اخرين دوب ما مطلعين فيهم البني ، اكبر بني فيهم هي الاقامة ايلي وصلت للطاق الرابع و مازالت بسيمانها وياجورها واشغال كبيرة ، حتى من حبال الخدامة وايلي يطلعو ويهبطو فيها في السلعة مازالت موجودة ، بعين عارفة فاش تعمل قرى شنوة قاعد يصير ، لا حس مطرقة ولا زنجير ، لا خدام يخدم ولا برويطة ، حتى كلب شارع مايدورش...بلاصة بعيدة ع العينين و ماتجي لباب حد ، مشى خطوات ماخو حذرو بلڨدا لين وصل لمدخل الاقامة حط وذنو يسمع فماش حس ، ماوصلو شي ، طلع الدروج خطوة خطوة ، لين وصل للطاق الاول ، باقي مافمة حتى حس ولا حركة ، كيف كيف الطاق الثاني ،بدا يخاف لا تكون لعبة من الخاطف ، جاه صوت راجل ...وكي زاد ركز سمعو جاه صوت راجل ثاني ، طلع درجين اخرين وقتها ظهرولو الزوز الرجال ، اول ما راووه طول هدو ناحيتو ، الاول جاء شيضربو ببونية لكن يامن عرف كيفاش يبعد و زيد كمل ضربو بمشطة خلاه يتكركب في بقية الدرجات ، الراجل الاخر فهم اللعبة وجبد سكينة ، حب يضربو بيها لكن يامن كان اخف ماخلاهوش ينجح في حتى ضربة و بخفة اخرى شدلو يدو وضربها بقوة على ركبتو لين طاحت السكينة ، نزل على كتفو لين كسرهولو وشدو من دبشو سطعو في الحيط وخلاه يخلط على صاحبو ، هكا ولى متأكد ايلي الف في المائة مريم موجودة فم ، فيسع جرى لفوق وطلع للطاق الثالث يلقى واحد اخر هابط من الطاق الاخراني ، كان موش فاهم شيعمل ببونية وحدة وراس خلاه يدوخ و خشمو مفلوق بالدم ، طلع للطاق الرابع وايلي هو اخر طاق ، بارشا شكاير سمان فارغة ، و حديد مطيش ، غبرة و بارشا حكك دبابز متاع شراب وباكوات دخان ، ريحة ناتنة تفوح من البلاصة ، على اربعة والا خمسة خطوات منو ، شافها.....مريم ....الطفلة ايلي حبتو.