✴ رهــينــة حـب ...💚(كرونيك باللهجة التونسية )

💠❄الحلقة عشرون ❄💠

            ⛵❄❄❄⛵

كان يسوق وهو متوتر يديه ع الفولون كابسين بعصب ،كاول يكون نرمال وينسى ايلي سمعو ، اما فمة حاجة وسوستلو خلاتو يحبس الكرهبة ، خزرت للبلاصة " موش قلت ماشين باش ناخو الروبة ، وين!؟ هوني!!"

نفخ وهو يدورلها " مريم...قد ما حاولت نعمل روحي مافي بالي بشي مانجمتش"

" وشنوة ايلي في بالك بيه"

"الخطف...الاكتئاب...والراجل..ايلي...تحبو ".

" كل شي ولى في الماضي ...انت قلي شنوة يعنيك بالضبط ..ايلي مشى والا الجاي"

" بما انك باش تكون مرتي ...ايلي مشى يهمني بارشا... خاصة ماضيك انت وايلي صار معاك"

"ايه ..و شنوة تحب تقول بالضبط"

" نعرف الحكاية صعيبة عليك بارشا و تقلقك بارشا اما من حقي...من حقي نعرف مرتي شنوة "

" بمعنى"

" انجم نفهم انك حبيت راجل قبل ...وبارشا زادا لدرجة كنت شتقتل روحك عليه...كل واحد فينا عاش علاقة ومانجحش فيها...اما نحب قلبي يطمان...مانخبيش عليك...حكاية الخطف و الرجال مقلقتني"

اتبع فيه بعين شاردة طافية لمعتها" لذا ...ماذبيا ...تعمل تاست فرجينتاي ...باش نطمان لا اكثر لا اقل ...و هوكا اذا حد حل فمو عليك بكلمة نسكتو بيها..عيشك ماتفهمنيش بالغالط "

تالمون تصدمت واستانست بالصدمات و الكلام ايلي يوجع، معادش ترفلها عين، قعدت تخزرلو وشفايفها يرعشو ، قلبها يتقطع عرق عرق من داخل ، معادش عندها دموع باش تشكي همها بيهم ، هبطت راسها واستوت في بلاصتها" اوكي...نعمل تاست ..انت شوف جينيكولوڨ باهي وانا حاضرة "

تبسم براحة ع الاقل قبلت التاست ومافهمتوش بالغالط" باهي..فمة واحد قريب من هوني ، درج و نكونو حذاه "

شاورتلو براسها اي وشردت في الطريق ايلي قدامها.

"باش نستناك هوني"

خزرتلو لثواني ومن بعد دخلت للطبيب، اختار كرسي قريب من الشباك  بعيد على كل شي ، مافماش حتى باسيون ، السكريتار لاهية في فيشات و ساعات يجيها تاليفون تاخولو موعد وتعلمو بيه، مخو كان سارح و خايف تكون صارت حاجة في هاك الشهرين، مستحيل يقبل يعرس بمرا مسها راجل قبلو هذا حقو ، مريم  تبعتو ووافقتو ربما هذا دليل ايلي هي لاباس عليها... كان جات صارت حاجة راي رفضت وولات تبكي و تشكي ....وعد روحو اذا طلعت لاباس ينسى ايلي صار و يعطيها كل ايلي تتمناه و يعيشها احلى عيشة.

تحل الباب وبانت مريم وفي يدها ورقة ، خطوتها كانت ثقيلة ، وجها شاحب ، وفمها شايح ومقشر ، تقول وجه ميت ، وقف وقلبو قريب يوقف معاه ، منظرها مايطمنش ، قربت منو و مدتلو الورقة ، مافهم شي ، خط طبيب ،ركز طول  في النتيجة لقاها لاباس عليها مازالت فيارج ، نفخ براحة وغمض عينيه يحمد في ربي  والا كان شيقعد فضيحة ، حل عينو وخزر بفرحة كبيرة لمريم الواقفة قدامو ماتحركتلهاش شعرة "الحمد الله عزيزتي"