✴ رهــينــة حـب ...💚(كرونيك باللهجة التونسية )

❄💙الحلقة الثلاثون 💙❄

                         💠💥💚💚💥💠

آمنة كان مبين عليها القلق ، متوترة و موش منجمة تخبي ايلي بيها ، يامن لاحظ الحكاية وحب يعرف شنوة صار بالضبط لانو عرف ايلي هي مخبية حاجة "مدام آمنة شنوة صار'"

"كيف ...ماقال ...لسعد ...ابراهيم جاء لهوني "

"ايه وشنوة يحب "

سكتت وحاولت تبدل الموضوع ايلي زاد اكدلو فمة حكاية في الوسط "مدام امنة ...اكيد صارت حاجة خلات لسعد و ابراهيم توصل بيناتهم لضرب البونيا "

كانت نيتها تحل المشكلة وحدها وتحاول تبعد لسعد ع المشاكل اما ما نجحتش، يامن ايلي واقف قدامها الوقت اكدلها تنجم تعمل عليه، جبدتو وحدو وحكاتلو كل شي، من فازة التاكسي للعركة

"ماكاركش سكتت، احنا نلوجو في حاجة ضدو و هذي اكبر فرصة "

"ابراهيم ينجم يدبر راسو ويلقى اي حد يهز عليه المشكلة ، وهذا ايلي مخوفني ...طالما هو مانطقش بلسانو و شهد بايلي عملو باش يقعد هكا ورانا...لازمنا نلقاو حل "

"انا قتلك...اي كونتاكت معاه اعلمني...وتوا هذا ايلي باش تعملو "

"يامن...مانحبش بناتي يعرفو شي ملي صار بيني وبين ابراهيم ...مانحبش انغص عليهم "

"باهي مدام آمنة ...خلي ااحكاية عليا "

جاء ماشي شدتو من يدو " قالي كلمة خوفني بيها ليوم "

"شنوة قالك "
قالي وصلك التنبيه متاعي ...يقصد بحاجة عملها ...والله وليت خايفة وعلى اعصابي وقتاش توفى ها الحكاية ."

"انت اعمل ايلي قتلك عليه وانا تو نتصرف ...خليني نشوف مريم قبل مانروح "
               💙❄❄❄💙

وصلتو للكرهبة كي جاء باش يدخل دارلها " مريومة ....تحط شي في بالك وماتخافش ابراهيم مستحيل يوصلك انت واختك "

"يامن...فمة حكاية لازمك تعرفها "

"تقليش كلمك والا دار بيك...اقسم بالله  مااندمو ع النهار ايلي تولد فيه"

"لا....ميسون...امس صارت معاها فازة خايبة ...فمة زوز رجال عرضوها و حبو ....يعني ..اما ما نجموش فمة شكون منعها هي توا مخبية على امي وبابا و زيد مشكلة ليوم ...من سابع مستحيل تحكيها"

"شكونهم..."

"ماقالتش وما حبتش تحكي زادا قد ما حاولت معاها ...انا قلت خليها ترتاح شوية "

قعد يخدم فيها في مخو ، ايلي صار مع ميسون و حديث ابراهيم لآمنة ، باز فمة حاجة تربط الحكايات الزوز
"و ايلي منعها شكونو "