✴ رهــينــة حـب ...💚(كرونيك باللهجة التونسية )

🌺الحلقة السابعة عشر 🌺

❄💥💥💥❄

وقت وصل كانت تطلب في حد ، وقف مقابلها من الاول ما راتهوش، عينيها مضببة بالدموع "آلو زاهر ...اهلا أنا مريم...الحمد الله وانت....يعيشك...انا طلبتك بخصوص الحكاية....اي...سي بون خممت انا..." جات عينها في عين يامن ، طول عرفها ، فهم شنوة باش تعمل ، قاعدة ترمي في روحها في النار ، شاورلها براسها لا ما تعملهاش" أنا موافقة ....اي متأكدة...باهي ان شاء الله تو نزيدو نحكاو ، لازم نسكر تو " علقت و الدموع ماخلاتش بلاصة ما غسلتهاش من وجها ، ثقلت ساقيه و قلبو وجعو لدرجة ماتخيلهاش" قاعدة تغلط يا مريم ...قاعدة تغلط...ماكش عارفة شنوة عملت كي وافقت " بلا حتى كلمة وقفت وهزت صاكها ومشات ، عرضها من قدام " مريم " صوتو كان يترجى فيها" ابعد يامن "

"نهاد غلطت ايه ...موش معناها تعاقبها ترمي روحك  مع حد مستحيل تحبو "

"وايلي حبيتو شنوة ربحت منو...قلي انت شنوة ربحت منو .....تذليت وسمعت ما نكره...لحد ليوم ...قلبي هو ايلي تمس ...وقلبي ايلي تجرم...ليوم كرامتي هي  ايلي تمست...هوني خط احمر امان يزي معادش تتصرف معايا هكا ...بلا ما يأنبك ضميرك و تسخفك حالتي " جرات خارجة خلط عليها "مريم...خليني نحكي  معاك  ماتعملش هكا "

"يااااامن " عيطت بكل غش ووجهها ولى احمر من الانفعال "يزي امااان "

وقف معادش منجم يحكي ، شافها تهبط وتحبس اول تاكسي و تمشي ، عينيها عيات من الدموع ، سكاكن تقطع فيها من داخل ...لاول مرة من سنين تحس ايلي ها الحب ذلها و مانفعها في شي .

الدنيا دوامة وهو في وسطها يدور ، مانجمش يمنعها ولا يقلها كلام يهديها ويقنعها، الطير اذا قصيتلو جناحو مافماش فايدة تحاول تركبو مرة خرى لا يزي يتعطب الجرح وزيد الجناح معادش ينفع ...بالضبط لا كلامو ينفع ولا الجرح باش يبرا .

❄💙💙💙❄

وصلت لبيتها وسكرت الباب رمات صاكها ع القاعدة ، النفس متاعها كان قوي، تمشي وتجي مخها موش منجم يخمم ، وقفت مقابلة المرايا وين وقفتها امها من مدة، خزرت لوجها وشعرها الطايح على اكتافها ، بعدتو على وجها مستانس خاتمها يلمع ، المرة هاذي مافماش لمعة ومافماش خاتم ،رجع الفيلم ايلي راتو من الاول ، كلامها مع مريم ، مع يامن ، نحالها الخاتم وطيشو ، طريقه للدار ، هبلت في راسها الشي مانجمتش تتحملو ، لقات دبوزة البرفان شراتها واختارتها باش كي يروح تعمل منها ، خطفت بغش وضربت بيها المرايا جابتها فلوس ، بدات تكسر فيلي يعرضها كل شي قلبتو ، من الصوت جات امها وبوها يدقدقو في الباب عليها ، وقت ايلي هي في عالم اخر ماهيش معاهم اصل ، جاب خوها المفتاح وحل الباب ،شدها بوها وضغط عليها بقوة ، حاولت امها تهديها وهي تمسح على شعرها وتحكي معاها كيف اي ام تدلل في بنتها ،لين بدات تهدى وتتنفس نرمال ، قعدت امها معاها لين رقدت واطمنت عليها ماتفيقش ، وقتها ظهرلها في مخها تعمل حاجة ...تواجه يامن ...ها الخطوة لازم منها ...مافيهاش هروب ...قصدت بيتو وهي معملة تواجهو بكل شي تحبسو عند حدو وتفهمو غلطو و تحلو عينو علي يعمل فيه مع بنتهم ، دقت الباب بقوة و ساقيها  موش منجمة تحبس ع الحركة ، بطل باش حل واخيرا بان ، حل الباب وحالتو حليلة ، شعرو رغم انو قصير داخل بعضو ، في عز البرد تريكوه كان نص وجهو مدخن تقول هاز هم الدنيا ، شاف امها غمض عينو وزم شفايفو.