✴ رهــينــة حـب ...💚(كرونيك باللهجة التونسية )

💠الحلقة الواحدة والثلاثون 💠

                 🌾❄❄❄❄❄🌾

ملي صارت العركة مع ابراهيم وهو موش منجم يحكي مع آمنة ، ما جبدش الموضوع معاها جملة، حستو متغشش عليها و قاعد يحاسب فيها خاطر خبات عليه ، بالنسبة ليه مرتو غلطت غلطة كبيرة وما عملتلوش قيمة ومشات وقابلت راجل في نهار من النهارات حب يخطف بنتو،جات وقعدت بجنبو بعين مكسورة و قلب يعلم بيه ربي

"لسعد...ماحبيتش هذا يصير...حبيت نحل المشكل بلا ما تدخل الاومور بعضها...حبيتش نراك توسخ ايديك بيه"

"انت عندك راجل ...هو المسؤول عليك و هو ايلي يخاف عليك موش انت....اما انت شنوة عملت ...قابلتو مرة واثنين وسكتت و الثالثة كنت ناوية تخبيها زادا...لو انا ماريتش بعيني كنت تخبي...بعد ها السنين والعشرة تخبي عليا"

"كنت مجبورة باش حد فيكم ما يتضرش "

"ربما كنت ناوية تعاود تخمم فيه...وعجبتك حالتو والفلوس و القوة متاعو "

حلت فمها ما تخيلتش توصل بيه الحكاية انو يشك فيها هكا

"انا بعمري لا كنت طماعة...ولا قالبة عيني ع الفلوس ...انت تعرفو الشي هذا الكل الكلام ايلي قلتو توا كبير بارشا ويوجع اكثر ...وطالما انت حاط في مخك هكا و ماكش حاب تفهمني ...انا ماعاد عندي مانعمل ...حاولت نبررلك ونفهمك ونخليك ترى علاش انا تصرفت هكا اما انت عندك راي اخر "
قامت وخلاتو ، هي في حد.روحها ماهيش مقتنعة ايلي عملتو غالط...كان عندها حسابات اخرى و حاولت تبعدو هو بالذات ع المشاكل اما لقات روحها هي ايلي تتحاسب .

           ❄💠💠💠❄

خذات كاس الماء بين يديها ايلي ترعش وشربت ، حاسة بروحها مخنوقة ع الاخير وكلام لسعد زاد علي بيها، حطت الكاس ع الطاولة وعينيها على السكينة متاع قصان اللحم ، قعدت تثبت فيها لحظات قبل ما تمشيلها وتاخذها بين يديها ، عدات صوابعها عليها وتلمست تقول تتفقد فيها ، دخلت مريم ودوب ماشافتها استغربت " ماما...شتعمل بالسكينة "

تربثت و رجعتها لبلاصتها وحاولت تخلق تبسيمة "كنت نرجع فيها لبلاصتها، حبيت نراها مازالت ماضية والا لازم نهز نمضيها "

"وفاش قام تمضي فيها...انا بيدي قصيتو اللحم البارح ...ريڨلت كل شي"

شاورتلها براسها ايه ، قربت من بنتها و مسحت على شعرها "
انت وميسون اغلى ماعندي في ها الدنيا...ايلي يخبشكم برك عبارة جرحني انا في اللحمة الحية "

تبسمت لامها " نعرفو الشي هذا...الله لا يحرمنا منك"

"انت ماكش متغششة خاطر انا قابلت ابراهيم و ماقلتلكمش"

"انا نفهم علاش عملت هكا...حبيتناش نخافو وحاولت انت تبعدو وحدك وحدك"

"انا على جالكم مستعدة نعمل اي حاجة...المهم انتوما تعيشو مرتاحين متهنين "