✴ رهــينــة حـب ...💚(كرونيك باللهجة التونسية )

🌺الحلقة السادسة والعشرون 🌺

                💠❄❄❄❄❄❄💠

"باهي ماتبطاش وسلم على يمينة بارشا"

علقت التاليفون وقعدت حذى راجلها ، كيف العادة يتبع في ماتش،موش جوها جملة "اه مازالو ناوين يقعدو عند.يمينة "

"باش يوصلهم حمزة كيف العادة"

"حمزة ويامن ويمينة ...ماكش ملاحظة ايلي بناتنا تفكو "

"وي ملاحظة اما بربي قلي شنوة نعملو، يمينة هكا هكا بيهم يمكن خير مني انا، و حمزة وليد متربي عينو مايهزهاش من القاعة  وقداش حشام هاك طفل ، ع الاقل يامن لسانو طويل و كلمتو مارجعهاش لتالي عكس مريم "

"مريم ولات عبد اخر ، فرحانة رغم التعب متاعها ، ماكنتش  نتخيل انها تحبو لها الدرجة ، قربها منو خلاها طايرة بالفرحة ، ماريتهاش متفرهدة قد  المدة هاذي ، لو يطلبني فيها والله مانقلو لا و بالعكس نعطيهالو فرحان "

"انا من الاول كرهتو و بارشا زادا كي نتفكر  بنتي شنوة تعدى على راسها نزيد نكرهو ، اما حبيت والا كرهت بنتي معاه في الحفظ والصون و كيما قلت فرحانة ، ديما حاميها وراد بالو عليها...و من رايي هو زادا يحبها ويموت عليها "

"والله جيت باش نقولهالك ...شفت المكتوب ...عمناول يستنى في عرسو علل نهاد وتوا يرجع لاول قلب حبو "

"زعمة ...موش نفحة واطير "

"نفحة....هههه تي انا هاني معرس بيك اكثر من خمسة وعشرين عام و كان تجي كرهبة تجري ناحيتك  اول حاجة نعملها نڨطع"

"امااان امااان وانا لو نرى حد هاد عليك بسكينة الا ما نزيد نقلو اخلط عليه يستاااهل "

عقد حواجبو " بجدك...نهون عليك "

"مادام هنت عليك "

"يا للا انت بعمرد ماتهون، ها العوينات وها اليديات وها الڨد و الزين ايلي حسدوني فيه انا نخليه !....و انت راك ام نواراتي الزوز مانسلمش فيك "

"لسعد....عزيزي"

"ياروح لسعد "

"تره نشوف سخانة رويجلي يظهرلي طلعت .....لا والله عادية....مالا شبيك نزلت ع الكلام الحلو "

وقفت وخلتو يتبع فيها بعينيه وكي قريب تغيب عليه سمعتو يقول" نعرف روحي مانهونش عليك...من غير مانقلي عزيزتي "
                    
                        💠❄❄❄❄💠

حب يتحرك وحدو من غير ما يستعمل العكاز ، لقى روحو موش منجم ، اكثر حاجة يكرها انو يلقى روحو عاجز ، حاول مرة اخرى ياخا دخلت مريم و في يدها طبق الفطور متاعو "فاش تعمل انت " حطت الطبق و مدتلو العكاز