💚❄💚❄💚❄💚
يتبع في ركنية معمل تتمركى اما الله غالب ضاعت ، وقيت عاد لقى روحو وحدو لازم يرجع لغرام للماتشوات مادام آمنة وبناتها خرجة ...قالولو طلعة متاع نساء صافي ...كل يوم هكا...يتفكروه كان في الويكاند....والا ايا هات حق اك الحاجة ...نوقز الباب زعمة هوما ...استنى يشوف الهجوم كيفاش باش يوفى زعمة ڨول ...الله غالب مرة اخرى تضيع ...ايا معادش فيها خلي يقوم يشوف شكون ع الباب ،كي الباب وشاف شكون عقد حواجبو واستغرب ...عندو سبعة شهور وامثر ماراهوش
"ياااامن "
"اهلا بيك ....سامحني يظهرلي جيت في وقت موش هو "
سلم عليه وعطاه بوستين " لا ياراجل....بالعكس ...انا وحدي....الجماعة يتفسحو قال المصري "
"اي باهي "
"إيه يا هراب ....تغربت وعجبتك البلاد الاخرى ...لاباس عليك "
"الحمد الله لاباس"
شاورلو باش يقعد " اي شنوة تشرب "
"لا خلي ماتعبش روحك ...انا مانيش باطي"
"والله ماصارها هكا تو ...ولو حتى قهوتي هايلة زادا ....شوية برك ونكون هوني"
"باهي يا سيدي"
قعد يتبع في الماتش لين حضرت القهوة ودخل بيها لسعد " أيا تفضل...ذوق وانسى القهاوي ايلي شربتها قبل " صحيح القهوة مطعمها ياسر عجبو " هايلة والله يعطيك الصحة "
"قالو نساء قالو وذني "
ضحك عليه رغم ماعينو في ضحك ...بوها خس بيه يحب يجبد موضوع ومالقاش منين يبدا" فمة حاجة يامن....ايلي قالتهولي ميسون ...بعد عام تروح...شنوة صار خلاك تجي قبل بخمسة شهور "
"قاعد اتبع في قضية إبراهيم ماو "
"اي...طبيعي ....و هي توا بين يدين المحكمة "
"ابراهيم تسيب ....امس العشية ...المحامي ما كلمكش"
"آمس تسيب ؟!...لا ماكلمنيش...مازالت جلسة جاية ...وكيفاش يسيبوه ...شنوة صار بالضبط...."
"إبراهيم نكر ....و الصحبي اعترف ايلي هو خطط لكل شي ...قال حب مريم لدرجة انو خطفها...و رجع في كلامو "
"رجع في كلامو!؟ شنوة ايلي قاعد يصير .... انا وين من هذا الكل "
"إبراهيم باش يتحاكم في حالة سراح ...والجلسة الجاية ينطقو بالحكم ...بما أنو اعترف الصحبي و تحمل الحكاية الكل ...معناها ....إبراهيم يمكن ياسر يعاود يرجع يضركم "
"بربي كيفاش يسيبوه...كيفاش ...هو ايلي خطط و دفع الفلوس و جاب المخدرات لبنتي وخلاها تتعاطى و زيد...موش هو ايلي كلم الصحبي من الفيلا متاعو و هكاكا طيحطوه "
"النومرو طلع لواحد من الخدامة متاعو ....و هو زادا نكر ايلي إبراهيم عندو دخل "
"ولد الحرام....لعبها مليح"
"سي لسعد....المرة هاذي إبراهيم اقوى.....واحد داهية....ينجم يعمل اي حاجة و عندو شكون يهز عليه ....انت وعايلتك في خطر مرة اخرى"
أنت تقرأ
✴ رهــينــة حـب ...💚(كرونيك باللهجة التونسية )
Action★الاسم "رهينة حب " ★ النوع " رومنسي ، اكشن ،غموض ،تشويق, اجتماعي ،عائلي ،بحث ..." ★الكاتبة "ň🅾d🅰 ★عدد الفصول " 33" سنة الانتاج "2018_2019" ★القصة " قضية اختفاء لبنية في ظروف غامضة ...تكشف بارشا مستور وبارشا حكايات مخبية 🔱 ...حب ....كره...غيرة...
