✴ رهــينــة حـب ...💚(كرونيك باللهجة التونسية )

💜✴الحلقة الخامسة ✴💜

🌹☔☔☔🌹

دق الباب ودخل حمزة معاه أوراق في يدو ، حطهم ع البيرو وقعد
"الصحبي بن شوشان ، عندو سوابق في العنف والبراكاجات و ترويج واستهلاك المخدرات "

شد الورقة بين يديه يقرى في المعطيات ، كمل حمزة كلامو " لقيناه حاكي مع مريم برشا مرات ، في المكالمات كان حديث عادي ، مافيه حتى شبهة ، المساجات مشفرين ومالقينا شي انجمو نشدوه عليه"

"أما انا ريتو ومعاه مريم وهذا في حد ذاتو دليل قوي "
"أنا عطيت تصاورو و أي معلومة عليه توصلني باش ناخذوها بعين الاعتبار ،هو توا متخبي و ايلي يعرفوه عندهم قريب الشهر ماشافوهوش"

"بالضبط ملي ضاعت مريم "

"ع الاقل هكا نكونو متأكدين ايلي ماانتحرتش والا هربت ، فمة شكون خطفها "

"الخطف يا اما باش ياخذو فلوس فدية واما انتقام ، وبما انو تعدى شهر و ما طلبو حتى فرنك ، يعني الحكاية حكاية ثار ، يا اما باش ينتقمو من مريم والا من بوها وامها "

"بالنسبة لمريم  كيما شفت التقرير و ايلي حكاووه اصحابها في الفاك ، الكل قالو بنية ما عندهاش مشاكل ، لذا الاكثرية الام والبو وممكن الاخت زادا "

"ميسون كيف مريم ، تبان كاسحة اما في داخلها بعيد ع الشر "
"موش باللازمة تكون شرانية باش يكوز عندها عدو "

"أنا لازمني نحكي مع امها وبوها مرة اخرى ، لازم نعرف منهم بارشا حاجات "

"فمة حاجة اخرى ...انا ماحبيتش نجبدها اما لازمني نحكيها "
"وايلي هي"

"اصحابها في الفاك الكل قالو ايلي مريم و ....يعني"

"ونهاد اصحاب ...وتنجم نهاد ايلي هي خطيبتي تكون عندها معلومة تفيدنا "

ظهر على وجه حمزة حمورية متاع حشمة خاصة ايلي هو جبد خطيبتو قدامو و دخلها في القضية " أنا زادا خممت في الموضوع ، وعرفت بارشا حاجات على نهاد و مريم ، اما المعلومات ايلي عرفتها ماتنفعش فيلي احنا فيه "

"سامحني ،يظهرلي تجاوزت حدي كي حكيت على خطيبتك "

تبسم يامن فوق من قلبو " فماش علاش ، هاذي خدمتك ، لا انا ولا انت ولا خطيبتي فوق القانون ، اذا لزم حقق معاها اما انا نأكدلك نهاد من خمسة سنين ماقابلتش مريم "

🌺✴🌺✴🌺

وهو طالع  لدارو ، كل خطوة في الدروج ثقيلة عليه ،رغم انهم موش بارشا درجات اما حسهم كيلومترات ، ماذبيه ماروحش وكمل الخدمة ، كان لزم يخرج للشارع ويلوج عليها في كل زنقة وفي كل حي ، أول ماراها واقفة قدام الباب ،حبس طول ، قعد يخزرلها مطول بارشا، دوب ماراتو هبطتلو تجري "ياخا انت نرمال ، تاليفون ماتهزش، في الخدمة مايخلونيش نقابلك ويقولولي لاهي ، قداه من نهار وانا نجري وراك، ياولدي رانا باش نعرسو أيامت اخرين مازلت تتفكر راهو "