✴ رهــينــة حـب ...💚(كرونيك باللهجة التونسية )

✴🍁الحلقة السادسة🍁 ✴

         🍀⛅⛅⛅🍀

قبل مايوصل للباب بخطوات جاه صوت يعرفو مليح ،دارلو
"نادر شنوة تعمل هوني"

"لازمني نحكي معاك "

"توا..."

"ايه توا توا ...نستنى فيك عندي ساعة ...نهاد قتلي مانلقاكش بسهولة "

"قتلي نهاد ....اه سي بون انجم نفهم علاش جيتني " زم شفايفو وهو يرشق فيه عينيه" تفضل سي نادر نسمع فيك"
"شوف باش نحكو رجال صافي ...ما تعتبرنيش خو نهاد...عبارة مانعرفهاش...قلي شنوة مقلقك من العرس...علاش كل مرة توخر...في الخطبة هكا صار ...كل ماتعملو دات يتأجل...والعرس زادا... ياخا خايف من العرس لها الدرجة "

ضحك يامن ع الفكرة " خايف !؟ ومن العرس....نادر شتحب تقول "
"بالكي عندك حاجات تخصك...و خايف تحكي عليهم لنهاد...حاجات انتيم "

"حاجات انتيم...مثلا...سامحني انا مانيش قاعد نفهم فيك مليح "

"مثلا ...خايف لا ماتتعداش ليلة عرسك كيف ما تحب والا ماتنجمش ...يعني هكا فازات"

"جاي لهوني باش تسألني اسكو أنا انجم ندخل بأختك والا لا ، فحل والا لا ...هكا قصدك"

"ماحبيتش نوصلو نحكاو في حاجات هكا اما ..."

"أما شنوة نادر...شنوة...ها الشي يخصني انا ونهاد اكاهاو... لا انت ولا غيرك يعنيه ...خليك بعيد ...ماتدخلش روحك "
دار داخل ،شدو نادر بقوة " فمة عايلات فيها الحكاية ...ماهيش لعبة اختي فهمت"

قرب وجهو من وجه نادر لين ولى لاصق فيه" قتلك ماتدخلش روحك...بيني وبين اختك...فمة بارشا حاجات لازم نفظوها قبل ما نصحح صداقي على اختك " دزو بعدو عليه ودخل خلاه محروق في بلاصتو ، يامن كي البحر ، تراه تقول مااحلاه اما اذا هبت عاصفة موجو يغرق الناس الكل، هاكي علاه في السنين حاول يكون بعيد عليه ومايتدخلش ولولا امو وبوه ايلي قنعوه يحكي معاه ويستفسر ع المشكلة بين اختو ونسيبو وحالة اختو ايلي غايضتو ، جاماي يخمم يحكي بها اللهجة معاه.

                🌿☀🌿

مشاات خطوات وحلت الباب ، لفحها هواء بارد ، اما موش هذا ايلي خلى بدنها لكل يرڨل ، الوجه ايلي مقابلها ، عرفتو ديراكت ، توا سنين ومارتهوش اما مستحيل تنساه
"انت !؟ "

"عسلامة ميسون. .مليح كي تفكرتني قلت هاذي مستحيل تعرفني"

"وشكون ينجم ينساك يا نهاد "

حاولت تخلق ضحكة صفراء رغم انو كلمات ميسون مفهومين و فهموها ايلي تعرف بارشا حاجات

"أنا جيت ايامات للحومة هوني وقلت نعمل طلة عليكم وعلى مريومة "

ضيقت عينها و قربت منها لين سدت عليها الباب ايلي مازالت واقفة في العتبة متاعو " قتلي ...مريومة. ..تتربج بيها تقول صاحبتك"