❄🌅🌅❄
شافتو عاطيها بالظهر ، لابس بوناي في النوار وبومبارس نفس اللون ، مشات بخطوات مضطربة لين وصلتلو
"السلام "
"اهلا بيك "
هبطت باستو و جبدت كرسي وقعدت "نحيت الغرز "
"نهيرين اخرين "
"توحشتك يامن ...توحشت وجهك و شوفتك " حاول يبدل الموضوع" انا طلبت نقابلك اليوم بخصوص موضوع مهم "
بدات ترتاح شوية....باز بخصوص العرس...عرف روحو غالط و مادام تواضع وكلمها معناها عرف روحو غالط "الساعة انا نحب نقول كلمتين قبل ....ميسالش"
"لا ...انا جبتك وانا ايلي شنحكي " تبدلت لهجتو و رجعت خايفة لا يقلها بطل العرس " ت...تفضل "
"فمة بعثة وانا قررت نمشي فيها ، وشنقعد عام ع الاقل ، حبيت نحط في بالك"
"و عرسنا ....عرسنا باس توخرو مرة اخرى ...لا عاااد ...موش لها الدرجة ...شنوة الانانية هاذي الكل...واعي فاش تقول "
"واعي ...انا بيدي نحب نرتح مخي"
"منااااش...قلي مناش ...مني...فاش متعبتك انا ...متحملة كل شي ...مسؤوليات العرس الكل عليا و فمي ما حليتوش في الاخير نسمع باش نوخر ...اكاهاو ...وخر وخر وخر شعندك تعمل والا شعندك تقرر غير وخر"
"نقص صياحك...واحكي معايا مليح "
"والا شنوة شتعمل ...شتبطل موش هكا....قعدت تهدد فيا بيها....انت ماحسبت حتى حساب لحد ...حتى امي وبابا و خويا "
"انا اصلا معاك ولتوا مابطلت منك خاطر عايلتك...وعلى خاطر سمعتهم ..."
"امان امان....خاطرهم هوما....بالسيف معرس بيا....انا وليت مانعنيلك شي....انا وخمسة سنين معديتهم من عمري وراك وتقلي في الاخير قاعد معايا خاطر سمعة عايلتي "
"مانيش باش نكذب عليك......هاذي الحقيقة ...."
"على خاطر مريم هذا الكل...ملي دخلت حياتنا وكل شي تدمر....و انت بردت معايا "
"لا ....ملي عرفت حقيقتك "
مشى الوان وجاء الوان ، الريق شاح و القلب طاح من بلاصتو " حقي...قتي "
"ماتمثلش يعيشك ...نعرف كل شي ...من الاول للاخير...عملت عملة مسخت بيها روحك و مسختني معاها ....دمرت حياة مريم و ماتلفتش وراك...شكون قال ...بالكي كيما غدرت بانتيمتك واختك ...تغدر بيا انا " مازالت مصدومة من حديثو " قلي يا نهاد انا ...بوهالي ترى فيا !؟ ...."
"من ...من وقتاش وانت تعرف "
"عندي بارشا...موش نهار وموش جمعة وموش شهر ...كل مانراك تقول تو تعرف غلطتها و تطلب السماح...انت تخزر في عيني وتكذب...قتلت كل حاجة حلوة تنجم تكون بيناتنا ...تعرف...قلت نعطيها وقت تخمم بينها وبين روحها ربما يهديها ربي و تحكيلي...مستحيل تكون مرتي وهي مخبية ها الشي...لو حكيتلي ...كنت نقبل عذرك...نقول حبتني الله غالب ...حاجة اقوى منها...اما انت كذبت شهر وشهرين ...عام وعامين...كذبت عليا خمسة سنين كاملين...ومريم ...مريم البنية الحشامة العاقلة...ايلي معتبرتك اخت اكثر من صاحبة...ماخسرتش عليها كلمة تطيب خاطرها...كانت مستعدة تسامحك لو ...لو قلت ايلي انت تحبني...اما انت قلتلها تاقف معاها و تقربنا من بعضنا....وبكل عين صحيحة تقلي بردت معايا....يزي امان ...ماتلزليش اكثر من هكا....انا شنبعد باش نعرف شنوة حاجتي و شنوة نحب...خليني نفهم روحي ...خليلي الوقت نبعد وننسى ...ماتلزليش ...سمعتني ..."
أنت تقرأ
✴ رهــينــة حـب ...💚(كرونيك باللهجة التونسية )
Acción★الاسم "رهينة حب " ★ النوع " رومنسي ، اكشن ،غموض ،تشويق, اجتماعي ،عائلي ،بحث ..." ★الكاتبة "ň🅾d🅰 ★عدد الفصول " 33" سنة الانتاج "2018_2019" ★القصة " قضية اختفاء لبنية في ظروف غامضة ...تكشف بارشا مستور وبارشا حكايات مخبية 🔱 ...حب ....كره...غيرة...
