✴ رهــينــة حـب ...💚(كرونيك باللهجة التونسية )

💚الحلقة الخامسة عشر 💚

❄🐳🐳❄

اول مابعدو شوية ع الدار ومعادش تبانلهم ، تنفست براحة و بدات تلوج بعينيها تلوج
مريم " فهمتش علاش كبشت نخرجو وحدنا ...ميسون لا يكون الحكاية فيها طفل "
خزرت ع الاجناب " ايه فيها طفل"
مريم " كان تسمع امك تجزرك..هي وشكون ع الاقل نعرف روحي اش من عملة مشاركة فيها"
تبسمت بقمة الخبث "اهوا جاء "
تلفتت  لوين  ميسون تخزر ،شهقت وهي ترى فيه يهبط من الكرهبة ، بومبارس ڥار غااامقة و معاها دجين ازرق غامق و تامبرلاند في ساقو على لون الكبوط و فوق شعرو حاط بوناي, الحق ياخو العقل بهاك الوهرة ، حست ب روحها تتضرب فيه من اول وجديد، قرب منهم وهو راسم ضحكة وعينيه لمعت كي شاف مريم موش فاهمة شي "ميسون تستحق وسام شرف ع العملة هاذي "
شدتها من ذراعها ودزتها ناحيتو " هاي السلعة متاعك "
جبدلها طبلية شكلاطة " هاو حقك "
عملتلو تحية  ومشات ومريم موش فاهمة " ميسون وين ماشية..ايجا لهوني ...ميسوووون "
وقف قدامها " عيط ياااامن ع الاقل ...انت توا معايا ...و بعد باش نرجعك لميسون "
مريم " يامن "
ذبل عينيه " الله الله ع الاسم ....مااحلاها كلمة في فمممي ...عاود قول يامن "
مريم" انتوما متفاهمين عليا ...و لعبتو اللعبة من ورايا والله لاكم نرمال "
يامن " أيا للكرهبة وتو نحكاو ...ديجا نسالك قهوة وانت تتهرب منها وعدتني باش تخلص عليا اما انت ياسر مجحاحة لدرجة انو عملت روحك مافيبالكش وطفيت الضو ...اما انا نعرف كيفاش نوصل ليلي نحب عليه "
مريم وعي تخزر للكرهبة " نطلع معاك في الكرهبة ...لا لا مستحيل "

❄💙💙❄

بعد ماطلعت بحذاه ، وهو ساعة ساعة يخزرلها و شاد روحوع الضحك ، مصرورة كي الصغار ،خايفة وهي متكنورة في الكرسي
"ارخف روحك ...شبيك مريومة ...باش نشربو قهوة صغيرونة و نروحو"
مريم " وين ماشين مالازمناش نبعدو "
"حااااضر يا للا مانبعدوش"
قلبها وقتها ماتسألش عليه في التسعين تحس فيه يفرفط في صدرها، موش منجمة تخزر لوجهو ماتنجمش تخزرلو لانو عينيها تفضحها احساسها وقلبها يفضحوها ، يامن مازال لتوا حب حياتها وها الاحساس هو سبب من الاسباب ايلي تخليها موش على راحتها ، يامن خاطب و قعدتو معاها ماهيش فازة بالاخير لو كانت في بلاصة نهاد ماكانتش ترضاها .
يامن وهو يسكت في الموتور" ايواااا وصلنا "
خزرت على اجنابها مافماش قهوة وقفو قدام بنية كبيرة مكتوب عليها "صال د سبور " وساعت عينها وهي تتلفتلو " شنوة نعملو هوني"
يامن "باش نشربو قهوة عزيزتي "
عقدت حواجبها بالرسمي معاد فاهمة شي ، هبط حللها الباب وجبدها من ذراعها طاوعتو، و بقات اتبع فيه و هو مكبش على صوابعها الصغار ، هاو طلع هاو دار هاو كلم هذا هاو مشى في كلوار لين اخيرا وصل لوين حاجتو " هوني شتدخل تبدل حوايجك وانا شنبدل في الفستيار لاخر "
"شنبدل ...يامن شنوة شنبدل ماجبت شي معايا  "
قرب منها ووشوشلها " اسمع الكلمة وادخل " بعد عليها وهو يوخر بالشوية لين وصل لباب الفستيار المقابل،غمزها وشاورلها تدخل ، قعدت مترددة وهي تحل الباب وتدخل ، لقات بنية شادة شعرها  كعكة "مريومة موش هكا "
شاورتلها براسها اي ،شافتها اطبس و تمدلها باكو ازرق مڨربط بالاحمر "هذوما ليك...انا هوني باش نعاونك وتلبسهم "
"يامن قالك "
"ايه" .
عاونتها تلبس كالسون نوار ، ومعاه تريكو نوار فيه خيوط بالفلوريسون الاخضر على لون الصبادري ، شدتلها شعرها كيفها ودورتها للمراية " بان وجها المزيان الشاحب ستيلها المنحوت "ياسر مااحلاك واتتك ع الاخير تقول سبسيال ليك انت " كلام الطفلة فرحها ع الاخير ...يكفي فكرة انها مااحلاها باش تظهر قدام يامن باش تكون  فرحانة بما فيه الكفاية .