✴ رهــينــة حـب ...💚(كرونيك باللهجة التونسية )

🌺✴الحلقة التاسعة ✴🌺

☀💙💙💙☀

استوتلو وراء راسو المخدة "هكا صفا ، موش متقلق مع الجرح"

"صفا ...صفا"

قعدت على الاطرف وهي تخزرلو "تفجعت عليك بارشا، قريب نموت وانا نستنى وقتاش نراك "

"علاش كلمت أمي ، تعرفها مريضة وماتتحملش "

"تحبني نخبي عليها حاجة كي هكا "

"ايه...حاجة كي هكا بالذات لازم تتخبى ، لانو امي مريضة لا قلبهت يتحمل ولا بدنها الكل"

"يعني انا كي كلمتها قلتلها علي صارك وليت انا الغالطة موش هكا ...بالطبيعة مايعجبك شي ..بايلي انا نعمل لازم تكون فيها حاجة ماتعجبكش...والله لا عاد فاهمة ...نوليش نشاورك و نبعث مطلب في كل حاحة لازم نعملها...هكا تولي راضي...قريب تموت جراير ها الخدمة ...وباقي مبجلة عليا...وتوا مالقيت فاش تحكي ولا باش تتسبب عمتلي سبة علاش قلت لامي ...باهي واذا ماقلتلهاش وهي عرفت من غيري ...واذا صارتلك حاجة ماهيش باش تسمع... اما لا انت لازم ترد نهاد هي الغالطة بالسيف  "

تلمس الفاصمة ايلي لافة راسو وتفقد يديه ع الدم"
نهاد....أنا راسي خليقة يسطر ماتزيدش عليا يعيشك "

"عندك حق...مانزيدش عليك ...باهي توا نخليك...وميسالش وقت سيادتك تتواضع وتلقى لوقت لخطيبتك تو نحكاو"

ماكانش لازم يحكي حتى كلمة هاكي علاه سكت و خلاها تخرج وهي تنطر و عارف ايلي غشها باش تسيبو على اي حد يعرضها

🍀✴

وهي هابطة وماشية ناخية البيفات عرضها حمزة "يظهرلي سبقتك "

"ايه...انا بيدي خممت ناخولهم حاجة ياكلوها والا يشربوها "

"هاو سي بون ...خذيت للناس الكل "

هزت حاجبها " يعطيك الصحة والله ....هات نعاونك " مدت يدها تاخو عليه في السندويتشات و دبابز الماء ، جات مع هبوط نهاد ، استغرب وهي ترى في حمزة وميسون  ، من وقتاش هاذم يعرفو بعضهم !؟
"دموازال نهاد.. لاباس"

دارت ميسون و العين محلولة بدهشة ، من بعد تفكرت خطيبتو طبيعي تطل عليه

"حمزة....من وقتاش وانت تعرف ميسون "

"وشنوة مشكلتك انت اذا عرفني حمزة ....الوصية عليه "
حس بالضو يضرب بينات البنات ايلي قدامو ، عدوانية ميسون و خزرة نهاد ما تقول خير ، لذا حاول يتدخل" ميسون طلع هاذم للجماعة وتو انا نجي بعد شوية "

كانت تغلي و تمنات تشدها تكركرها من شعرها وتعفسها بساقيها لين ترتاح ، اما الله غالب، نطرت الساشي من عند حمزة و طلعت بعد ما دزتها بكتفها كلوف فماش ماتكلمها