❄💠💠💠❄
وقفو قدام الصال د سبور ، عقدت حواجبها "بربي شاد صحيح باش نتقابلو باش تجيبني هوني "
"عزيزتي وسع بالك هيا ندخلو نلعبو شوية بوكس...توحشت جو الصال "
سلمت وتبعتو هي زادا ترتاح فيها يمكن خاطر معاه هو ، خلاها تدخل للفستيار باش تبدل حوايجها ويستناها في بلاصة العادة ، لقات لبسة جديدة تستنى فيها ،المرة هاذي في الڨري وفيها ضربات بالروز و الصبادري روز زادا والڨون نفس اللون ، لقات سلمى فم سلمت عليها و سألتها على حالها وعاونتها باش تلبس ، لقات الڨون ، لبستها رغم انو سلمى قالتلها لا لازم تلبسها مع يامن ،مشاتلو وهي تبمبي عليه
"هوكا المرة هاذي لبستها وحدي ، تهبطلي كومبا يا شسمك"عقد حواجبو " لبستها نرمال "
"ايه نرمال "
"مالقيت شي "
"لا مالقيت شي"
ضرب راسو بايدو "وين لبستها بالضبط "
"في الفستيار "
"ايجا معايا "
"وعلاه ماشية معاك "
"امشي واسكت"
عرضتو سلمى، وشاورتلو بخاتم "قعدت نلوج عليه لين لقيتو "
تنفس براحة "اوووو....سلموش المنقذ "
مريم وهي موش فاهمة "خاتم شنوة هذا "
دارلها "ماو تضربت على راسي وقلت برا نتعلم فازات و نهديلها ڨون وفيها الخاتم ونعمللها دوموند مارياج ما تتنساش اما عزيزتي انت ماكش متاع رومنسية "
"ياااااا الخاتم هذا ليا انا ...يهبل ..تره نقيس"
بعدو عليها "انت بالرسمي ماكش متاع رومنسية وفازات ، يا بنتي راني ليل كامل نحفظ في كلمتين باش نقولهملك وتوا تقلي هات نقيسو ...موش للقياس هذا ...لازمو مايتنحاش جملة من يدك "
عينيها ولت قلوب وداخلة بعضها، ساقيها معادش حاملتها
"مريومة ....احلى طفلة راتها عيني...احن قلب ...المرا ايلي باش تكون شريكة حياتي وام صغاري ...نحبك حتى كان انت ماتحبش تقولها ...كل مايتعدى يوم نزيد نعشقك اكثر."
خذى يدها و قبل مايحط الخاتم قربهولها
"هوكا اسامينا الزوز ...قول يامن موش رومنسي" حطو في صبعها الرقيق الصغرون وقرب يدها من فمو وباسها
"حبيبي💙"
اول مرة تسمعها منو وقداش تمنات تسمعها...اخيرا نطق واعترفلها بحبو
"مريومة بنت لسعد ...هل تقبلين بي زوجا "
"ههههن لا خايبة بالفصحى"
"توخذيني "
شاورتلو براسها اي وعنقتو ،تعنكشت فيه وهو جبدها ليه بقوة لين قريب يكسرلها عظامها
"روح قلبي "
وشوشتلو في وذنو "نحبك "
بعدها عليه وحس السخانة طلعتلو و سخن و العرق بدا يصب عليه ، الحاصل ولى في حالة اخرى ، لاحظت حالتو ايلي ماتصورتهاش تولي هكا
"يامن"
"قتلك الف مرة اسمي هكا يقتلني معادش تعيطلي ....برجولية خلينا نعرسو على موت على حياة....قبل ما يخطفونا والا يضربونا بكرهبة "
زايد مايتبدلش ، كل ما يضعف باش يغطي ضعفو يدورها تنكيت وضحك ، اما الضعف هذا اول ما حسو كان معاها ...
❄💠💠💠❄
أنت تقرأ
✴ رهــينــة حـب ...💚(كرونيك باللهجة التونسية )
Acción★الاسم "رهينة حب " ★ النوع " رومنسي ، اكشن ،غموض ،تشويق, اجتماعي ،عائلي ،بحث ..." ★الكاتبة "ň🅾d🅰 ★عدد الفصول " 33" سنة الانتاج "2018_2019" ★القصة " قضية اختفاء لبنية في ظروف غامضة ...تكشف بارشا مستور وبارشا حكايات مخبية 🔱 ...حب ....كره...غيرة...
