✴ رهــينــة حـب ...💚(كرونيك باللهجة التونسية )

🐋✴الحلــــقــة الاخــيــرة ✴🐋

       ✴✴💠💠✴✴

ضربت الباب وهي تصيح باش يحلولها ، تحل الباب وظهرت الخديمة وجها شاحب اصفر ، كي راتها مريم اكاكا زاد خوفها ورهبتها "ماما وين...تكلم شنوة صار ابراهيم وينو "

حبست كرهبة يامن و هبط منها هو وحمزة وميسون يتجراو ،لسعد مااستناش ودخل طول قلبو مقبوض وخايف مرتو تعمل حاجة ، وقت دخلو شافو ايلي صاير ، ابراهيم واقف على بعد زوز اربعة ميترو من آمنة ايلي حاطة السكينة على رقبتها ، اي حركة تغرسها وتموت طول،راجلها وقت شافها ماصدقش

"آمنة شنوة تعمل ....نحي من ايدك "

صاحت ميسون من وراه "مااما ...لا "

جات باش تمشيلها شدها حمزة و ما خلاهاش رغم انو قعدت تفرفط تحب تقرب ، مريم من البهتة و الصدمة تمسمرت في بلاصتها ودمعتها هبطت بسكات ، يامن ساندها بذراعو ايلي معديه على اكتافها و عينو طول على آمنة ايلي هي زادا خزرتلو وقعدت تثبت فيه من بعد تحركت ووخرت خطوتين اخرين

"رد بالك تقرب...حد مايقرب "

ابراهيم الانسان الكالم ايلي دمو بارد و مايحكي كلمة الا مايحسبلها الف حساب وقتها ولى عبد اخر ، العرق يصب عليه و ووجهو احمر وعروقو ولو ظاهرين صوتو مخنوق و فيه بارشا خوف

"آمنة ...رد بالك تعملها....آمنة طيش السكينة...آمنة اسمعني "

"حبيت تدمر عايلتي ...خطفت بنتي و خليت ناس اخرين يخلصو ايلي عملتو انت...ونكرت ....بموتي تو يتحل كل شي "

"مايتحل شي...يهديك...ماتعملهاش ...نوعدك نخرج من حياتك جملة...معادش ترى وجهي...ماتعملهاش يعيشك آمنة ...طيش السكينة "

"لا ...لازمك تتحمل مسؤوليتك فيلي عملتو وتسلم روحك وتخرج من حياتنا "

"،باهي....نسلم روحي ونعترف بكل شي...يا للا انا وراء خطف بنتك و ايلي صار لميسون و كل شي....طيش السكينة "

ميسون "ماما...طيشها "

خزرت بعين دامعة لراجلها ايلي استعطفها بعينيع ، و مريم المنهارة و ماتحكي كان بدموعها وميسون ايلي تفرفط بين يدين حمزة ،ترخفت يدها و بعدتها على رقبتها ، غمض ابراهيم عينو تقول حمل الدنيا تنحى من على اكتافو ،قربت منو وواجهتو

"انت مازلت عند وعدك"

حل عينو وهو موش مصدق ايلي مازالت حية قدام عينو ، نقطة ضعفو و هي عرفت منين تشدو

"وراك زوز ضباط قرر لشكون باش تسلم روحك "

بلع ريقو و بعين مكسورة "رد بالك تعمل هكا....مرة اخرى"