قصص حكايتنا

القصة الاولى بعنوان مطلقة ولكن

الفصل الاول

#مطلقة_ولكن

الفصل الاول

انا .. تعرفي نحس في روحي تاعبة نين فايت التعب
سارة .. به شنو بديري لما نقولولك ناقشيه تقولي الموضوع حساس وواعر
انا بتنهيدة .. صعبة يا سرو تقولي لراجلك عاين طول الوقت راه واعرة بالذات المشكلة عنده مش عندي
سارة .. لو كان عندك المشكلة راه طول الوقت من دكتور لدكتور
انا.. ياريت طلعت العلة فيا
سارة .. الحمدلله مافيك
انا.. لكن امبارح سمعته يحكي مع صاحبه خذا منه اسم الدكتور اللي تعالج عنده نسيبه ان شاءالله هالمرة يسعى صح
سارة .. انا انقول هالمرة اكيد حيعاين لان خلاص حوش وتما عندكم وسيارة كويسة عندكم وماليكم شئ كيف مروحين من تركيا بعد اسبوع دهواري
انا .. اي والله مع انهن ماجنش بالساهل لكن الحمدلله عوض علينا تعبنا
سارة .. عليك تواضع اللي عندك قولي تعبك انتي هو بشنو تعب ترا قوليلي بانه ياخذ في راتبه ويعطي فيه ليك والله بانه يساعد فيك في ضمان الحوش في الوقت اللي انتي من مجموعة لمجموعة تقري وهو واخذ مجموعة بس لانه شنو يعطي في محاضرتين يوميا لا والله تعب والله يوصل فيك للزبونات بيش اديري البروتين ليهم لا يا شوشو كان في حد تعب بيش وصلتو للي انتو فيه هو انتي صدقيني مافي واحد تعب قدك يا قلبي
انا .. عادي ومايفرقش من فينا تعب اكثر يكفي انه في الليل نلقى في حضنه محتويني بضيقي وتعبي حتى مشاكلي مع خواتي كان هو اللي يهون هو وخوي محمد ومرته ربي يحفظهم
سارة .. فعلا خواتك ربي يهديهن
انا.. ومع ذلك مسامحتهن
سارة بعيطة .. شنو شنو مسامحتيهن من جدك انتي لا اكيد في عقلك حاجة لما اختك تجيب وماتكلمكش عشان خايفة تحسديها لانها جابت توم وانتي ماعندكش عيال ولما ادير لمة وتقولك تعالي بروحك خاطي اللمة عشان لبسك يحشم قدام عربها مع انك قمة البساطة والاناقة لما تلبسي وتقوليلي مسامحتهن
ولما اختك الثانية ادير اعياد ميلاد لعيالها وتعزم خواتك كلهن وانتي لا وتقولك نسيت والله وتقولي مسامحتهن
والله الاخرى اللي ماخلت بكل مع انها خير من الاخرات لانها قالتها في وجهك لما قالتلك انا مانقدرش نجيك عشان مانبيش راجلي يشوف اختها عايشة في حوش ايجار وبسيط
وتقولي مسامحتهن لا اكيد فعلا لعقلك صارت حاجة خواتك دارن عكس المفروض اديره اي اخت

بدل ما اختك لما جابت تتصل وتبلغك عشان تفرحي معاها وتقولك والله دعيتلك وانا نولد ربي يرزقك الذرية والله اللي ماتعزمش فيك في اعياد ميلاد عيالها كانت تعزمك عشان مع العيال تحولي شوقك منهم والله اللي قالتلك مانقدرش نجيك لانها متحشمة في حوشك الايجار بدل ماتصبي معاك وتساعدك وانتي تكافحي انك تبني حوشك وتقوليلي مسامحتهن
حوشك خذا منك ثلاثة سنين تعب وشقى بيش بنيتيه وحدة فيهن ساعدتك حتى بخمسين جنيه والله خوتك الشباب ولا واحد باسثناء محمد اربع شباب ماسمعتكش ذكرتي واحد فيهم ساعدك بالله فكيني من طيبة قلبك
انا بتنهيدة وجع حسيتها .. عادي ماتنسيش انهم ماكانش حد فيهم موافق على عادل كلهم كانو مايبوشي
سارة .. واسبابهم تافه زيهم شنو لانه ماديا مش زيكم ولانك انتي من عيلة شيوخ وهو من عيلة عادية تي اي تخلف هذا اللي هما فيه تي باتك شيخ قبيلته ماكانش معترض بالعكس كان معاك لكن تعرفي (بتنهيدة ) ربي يعطيك على قد نيتك وكيف انتي ادوري في مبررات لخوتك صحة ليك ولقلبك
انا.. هذوم هلي ماعندي ما اندير
سارة .. هيا ماتبيش اديرلنا قهيوة من بدري قاعدين على العصير
انا بضحكة .. سامحيني همي نساني والله هيا بنصبي تو