قصص حكايتنا

الفصل الرابع

#انا_وسلفتي_وضرتي

الفصل الرابع

محمد.. شهودة تو بعد ما نروحو تركبي لشقتكم وتلمي دبشك تعرفي بروحك والله نجي نلم معاك
شهد.. نعرف ياعمو ماما معلمتني حاجات واجد وديمة تقولي الواحد مايندريش شنو يصير معاه فنعرف نغير دبشي بروحي ونغسل غيارتي الداخلية ونعرف نغسل حتى العوايز راه
محمد حضن شهد ودمعة رقرت في عينه .. نجيها الفالحة حبيبة عمها انتي عارفة قديش نحبك شهودة صح
شهد وفتحت ايديها الاثنين بوسع .. اه واجد قد هك
محمد بضحكة .. ونا نحبك (ودار نفس حركتها )
شهد.. انت ايديك كبار هذا ليش انت اكثر مني لكن لما نكبر حتى نا ايديا تو يبدن زي ايديك بيش ماتطلعش تحبني اكبر مني بس عمو ماقلتش ليا وين بنمشي رد بالك بتشيلني لخوالي
محمد باستغراب .. لا مش خوالك بس كنهم خوالك
شهد .. مايحبونيش حني دلال عمرها ماحبتني وديمة تهزب فيا وادلل في عيال خوالي اما نحن وعيال خالاتي ديمة تهزب وتعارك حتى مادرنا شئ عكس حنينة غالية
محمد.. اه مش لخوالك بنرفعك بنمشو لبابا وماما رايفو عليك واجد
شهد بفرحة وحضنت عمها .. نحبك يا عمو والله نا رايفت عليهم واجد واجد هيا امنا نروحو بيش نوتي دبشي
محمد.. لا ياشهد مش تو اليوم بندهورك واجد تو بعد ما تكملي لعب هنا بنمشو لمطعم سمح نتعشو فيه وبعدها بنعدو لعمك مصطفى مرايف عليه وحتى تلعبي مع سهيلة بنت خوه مش تحبيها انتي
شهد بفرحة .. هييي اه نحبها

وقعدت تلعب شهد ومحمد يراقب فيها وباته اتصل بيه

عبدالله .. مازالت مانكش مروح
محمد.. لا يا باتي مانيش مروح نين يفضى الحوش لاني عارفه تو مليان العيلة كلها جاية بتواسي
عبدالله.. بس امك تبي شهد
محمد .. يا باتي بالله فكني تو يبدن يحضنن فيها ويتباكن يتعبن البنت نفسيتها خليها معاي واصلا نا بكرة الظهر طالع بيها لباتها وامها
عبدالله .. كيف
محمد.. اه خالد يبي بنته وتم اجراءات سفرها من قبل مانجي واصلا هذا السبب الاول لجيتي غير اني نخبركم
عبدالله .. حتى نحن بنمشو
محمد.. كمل اجراتكم بالشوي عليكم ولحقو وشهد ما ادورهاش تو تلعب في الجنينة وبعدها بنتعشى نا وياها في المطعم وبعدين بناخذها معاي لمصطفى تلعب مع بنت خوه بيش مانروح بيها تكون طايبة للنوم
عبدالله .. اللي يريحك مانكش شايف مرتك
محمد.. لا كان لقيت وقت بكرة تو نكلمها
عبدالله .. ربي يهديك ويصلح حالك يا ولدي
محمد.. امين يارب

ولعبت شهد وعدو تعشو ومشى لحوش صاحبه وهدرز هو وياه نصيب نين حس فعلا شهد تبي ترقد فروح للحوش واول مارقدها في دار حنها جاته وتغمارته وقعدت تبكي وقعد يهدي فيها وفونه يرن وبس وماباش يهدى الاتصال سكت امه وركب لشقته بعد ماعرف من اللي يرن

محمد منغير نية .. ايوة شنو تبي
اريام بعصبية .. سمحة هذي شن نبي ولية تتصل براجلها يعني شنو نبي
محمد ببرود.. اكيد مش حتسئلي على حالي او على صحة خالد او شنو مرضه طلع لا اكيد بتهزبي وتعاركي كيف نروح ومانجيش لسيادتك انتي الاولى ونروح بيك حافظك اريام هاتي الجديد
اريام .. وبه ليش ماجيتيش
محمد.. لاني مش جاي على شانك نا جاي على خاطر شهد وهلي بس سمعتي كويس لاني لو جاي على خاطرك حوش هلك يبعد على حوشنا ثلاث شوراع واكيد واحد من خوتك هو اللي قالك انه شافني اللي مافيهم عبر هلي لاسئلو ولانشدو على خوي تي ازح نا نسيبهم لكن عادي اذا اختهم ماتسئلش بنلوم عليهم
اريام سكتت معاش عرفت شنو تقول لان محمد ماعطاش فرصة
محمد .. ها مازال في عقلك حكي لاني تاعب وبنرقد
اريام .. بتجيني بكرة تروح بيا والله نكلم واحد من خوتي يجيبني
محمد.. ما تعبيش روحك لان الظهر مسافر نا وشهد لمصر
اريام بصوت عالي .. شنو بترد اخرى
محمد.. اه في اعتراض
اريام .. اه نا مرتك يا محمد نا الاولى نا في الترتيب الاول نجي مش خوك وبنته ومرته
محمد .. تجي في الترتيب الاول لو خوي مسافر يدهور لكن خوي بين الحياة والموت سمعتي ولو صار لخوي حاجة لقدر الله مش حتكوني الترتيب الاول لان حتكون شهد هيا اللي قبلك
اريام بصدمة وماتوقعتش رده .. شنو
محمد .. اه عندك من هنا لعند مانروح يا بخوي طيب ومعافى يا نروح بيه جثمان لقدر الله ففكري في كلامي كويس وعليه قرري تكملي معاي او لا اما نا فدت كبدي ديمة نقول راعي وتفهم لان اكيد قصة الامومة مسببه ليها مشاكل والشعور بالنقص مع انه لاذنبك ولاذنبي هذا من ربي لكن انتي من يوم جت شهد وانتي تغيرتي وتميتي مليانة حسد وغيرة وحقد وانانية وانا هذا كله وساكت لكن شهادة لله بعد وصلت انانيتك ماسئلتيش ولامرة على خالد وشنو صاير فيه يبقى معاش تلزميني وان شاءالله نروح بخوي طيب لكن كان ربي رفع امانته وقررتي تكملي معاي يبقى ديري في حسابك ان شهد تجي قبل كل شئ حتى انتي