قصص حكايتنا

الفصل الحادي عشر

#قلبي_معي

الفصل الحادي عشر

سافرنا نا واحمد بعد يومين ومشينا لدول واجد وكانن احلى ايام نا بطبعي الهادي وهو بطبعه الناري كان مش عادي وماتقدرش تقول ان هذا عمره ثلاثة  وثلاثين سنة ومدير مدرسة ليه هيبة الابلات كلهن يخافن منه
احمد كان شعلة طاقة وطاقة ايجابية تخلي كل واحد يضحك وسعيد زيه وروحنا وبدت المدرسة او التجهيز للمدرسة ونحن كل يوم احسن من يوم لكن طلع فيه طبع زي علاء مايحبنيش نبات عند هلي نمشي من الصبح لليل لكن نبات لا والسواقة اول ماهداني السيارة قالي انه مش حيكون راضي لو نسرف بيها في كل مكان رديت عليه وقلت له نا عمري مانطلع بدون شيرة الحكاية مش ناقصها ملائكة تلعن وكان حتى ماتبينيش نسوق عادي وحسيت ان ردي عجبه واجد وفعلا لان الولية لما تطلع بدون علم راجلها تلعنها الملائكة اربعين يوم والواحد يدور في الاجر بالسراج والفتيلة 

ومشن الايام على خير لكن الحق اهو هذي جيزتي الثانية وقريب نسكر الشهر الثالث ومافيش حمل لكن مابطلتش دعاء عشان مرة باتي قالي ان ربي يحب العبد اللحوح عليه في طلبه

وبدت المدرسة يمشي كل واحد فينا بسيارته عشان نا نعطي الحصص ونروح بدري بينما احمد يقعد لنهاية الدوام وكان روح بدري بيمر على المعرض
وفرشت دار المعيشة اللي تبع جناح دار النوم بطريقة حلوة فراشات رقاق وعراض شوي سادة وعليهن مخاد موردات ومخاد كاروهات مربعات كبار للتقمعيز ومرات ياخذني احمد عليهن لدنيتنا الحلوة ولانها كبيرة درت فيها مكتبة وعبيتها كتب واحمد ديمة يشري في الكتب وديمة نقعدو نقرو لبعض دايرينها بالدور ويوم عندي حصص الاولى لكن ماكملت نين خلاص نحس في روحي مش تمام نزلت لاحمد في المكتب

انا بصوت يرعش .. احمد الحقني
احمد صبا بسرعة من كرسيه وجاء مسكني سندني عالكرسي وبلهفة وخوف  .. كنك  في شنو تحسي
انا ودموع ينزلن .. راسي دايخ وجسمي يرعش

جابلي امية وطلع جابلي عصير عنب من الكافتيريا وسندني بعد ماكلم عبدالله انه يمسك بداله ويسكر المدرسة لان النائبة واخذة اجازة ووقض عبدالله مايقولش لزينة بالذات انها في فترات حملها الاخيرة
واحمد ساندني وبنطلعو حسيت الدنيا ظلمت في عيني ومعاش نندري على شئ

انا ونفتح في عيوني بالغصب .. احمد
احمد مسك ايدي .. يا عيونه وروحه نعم
انا.. شنو صار
احمد.. ماصار شئ يا قلبي هبوط في الضغط مركبيلك تغذية وانتي حامل ياعمري
انا نهضت روحي بقوة .. شنو
احمد بفرحة .. حامل يا ولاء
انا ودموع نزلو .. الحمدلله يارب الحمدلله يارب
احمد وهو يرد فيا نرقد ويمسح في دموعي .. ليش بس هذين
انا.. فرحة والله لان كان موضوع  شاغلني
احمد.. ربي يحفظك والحمدلله ربي استجاب لدعائك

وبعدها طلعني احمد ورفعني للشقة وبلغ هله وجو كلهم يباركو ونا اتصلت بهلي اللي فرحو ليا وقالولي اني نرتاح اليوم وبكرة يجوني وبعد ما نزلو هله خشيت للدار نغير في دبشي وبندير دوش نحس في روحي ريحتي مستشفى