سامحوني وخياتي مانقدرش انزل اكثر من فصل في اليوم لانها مش واجد فصولها
#مطلقة_ولكن
الفصل الثالث
لما تحس روحك كنت طاير في السما وان الدنيا بدت تزهى لك وان كل التعب بتحصد ثماره
فجأة تحس الدنيا ظلمت والثمار فسدت قبل حتى تحصدها
حاسة بروحي مخنوقة موجوعة مطعونة اي وصف ينطبق عليا تايهة مغدور بيا
نضت من نومي بعيطة ونا متمنية ان اللي قاله ليا محمد حلم لكن للاسف عارفة انه مش حلم
صبيت مالقيتش عادل احذاي وحمدت ربي وطلعت للكوجينة بنشرب مية وندير فنجان قهوة بنعدل راسي شفته مسيب ورقة على باب الثلاجة هك متعودين
(حبيبتي معليش طلعت بدري وماحبيتش نزعجك عندي شوي شغل في الجامعة وممكن نعطل شوي ما اديريش غذاء او كلمي سارة تجي تونسك وسامحيني لاني عارف طيارتك بكرة والمفروض اليوم هذا نقضيه معاك
تحياتي زوجك الغالي )
وهنا حسيت كأن الفرج جاء ليا وانطلقن دموعي بلا رادة ومهما حاوالت نمسحهن ينزلن بقوة وماصار شئ شربت مية وخشيت لدار كنت مجهزتها لعيالنا وعلا صوت بكاي نين صدري ضاق وخلاص بنموت نحس في روحي هو اليوم والمفروض بكرة طيارتي بنسافر زي مافاهم مش قادر يقعده معاي لكن اكيد يجهز في حوشه اللي بيسكن فيه
ومسحت دموعي وصبيت غسلت وجهي واستغفرت وصليت صلاتي ودرت قهوتي ورغم ان الدموع يخونو فيا وينزلو لكن شئ في قلبي حاسة بيه مرتاح ومافهمتش ليش ممكن من القرار اللي قررته مش عارفة فيا حاجة جديدة لكن ماعرفتش شنو هيا
غيرت دبشي وقعدت نجهز في شنطتي او بالاصح دبشي كله نرتب فيه في شناطي ونرد فيهن للدولاب على اتصال محمد
محمد.. كيف حالك يا خيتي
انا.. الحمدلله من ربي بخير
محمد.. ماقلتيش ليه
انا.. لا
محمد.. شنو اديري تو
انا.. نجهز في شنطتي وبنقوله اول مايجي ان الطيارة بتعتنا الفجر واني بنبات عندك ومافيه ماتعب الفجر يمشي للمطار وبيرد بروحه وهك حيقتنع
محمد.. تمام وبعدين
انا.. عرفت السبب اللي قاله لفرج بيش يتزوج عليا
محمد.. سامي قالي ماسئلش لكن تو يقصقص ويرد عليا
انا.. تمام حاول اليوم تعرف ولما يجيبني عادل ليكم تو نحكيلك شنو بندير وياريتك ياخوي تدعمني في قراري
محمد.. عارفتيني معاك ومهما اللي بديريه نا جنبك ومعاك ديمة
انا.. ربي يخليك لي يارب
وكملت ضم شنطتي واتصلت بسارة ووقضتها راه تتصل بعادل وتزلق بالذات اني من الفجر بنقفل فوني وانها تتواصل معاي عالنت بس وقالت باه وانها بتجيني عند محمد بتفهم ليش ورغم اني عارفة انها حست بجوي مش تمام لكن اجلت السؤال لشوفتي
وجاء عادل في الليل بعد المغرب وهو جوه مش عادي بكل وفطنت بيه وهو يحاول يدرق فرحته وسعادته عليا
قديش حسيته خاين وغدار على حساب وجعي وقهري هو فرحان بس لو نعرف ليش شنو اللي قصرت فيه معاه
أنت تقرأ
قصص حكايتنا
Historia Cortaهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
