#مطلقة_ولكن
الفصل الثاني
انا بصدمة .. شنوووو
محمد.. اهدي بس
انا ودمعة نزلت .. احكيلي كيف عرفت وما ادس عليا شئ
محمد .. شكله يسحابك بتمشي الاسبوع الجاي لان اتفق معاهم ان الفاتحة يقروها الاسبوع الجاي واللي بعده بيكون الفرح ولانها بنت بنوت بدير هيا فرح وهو يجي ياخذها وبس
انا ودموع مبوش يوقفو .. كيف وليش ليش يدير فيا هك ليش يرضى فيا هك ليش
محمد وخذاني لحضنه .. اهدي يا وخيتي ليش دار هك والله ماني عارف وهو الوحيد يقدر يجاوبك وانتي اهدي بس
انا بدموع .. واعرة يا خوي الخونة واعرة لو قالي لو علمت منه اهون لكن هو بيتزوج بدون مانعلم ليش يا خوي ليش
محمد وباعدني عن حضنه شوي .. اهدي يا وخيتي تو يجي وافهمي منه
انا ومسحت دموعي .. لا مانبيشي يعلم اني علمت لا
محمد باستغراب .. كيف
انا.. قولي محمد كيف علمت
محمد .. سامي رفيقي نسيبه فرج راجل سمية اخته جاي ويبيه يسئل عليه لانه جاي لاخته
انا.. قصدك اخت فرج هي اللي بيتزوجها
محمد.. اه تعرفيهن انتي
انا.. ماهو ماعنداش غير اخت وحدة بس قاعدة بنت والباقي متزوجات كلهن
محمد.. المهم لما جاء سامي وحكالي وقالي انه قال لفرج انه متزوجك لكن شكل البنت تبيه وموافقة
انا ودموعي يصبن تقول شلال .. اه مايفرقش يامحمد من بيتزوج المهم فكر انه يضحك عليا لو جاء راه قلت ليه تزوج ورديت حوش هلي لكن هو يعتبر خاني يا خوي
محمد.. شنو بديري تو
انا.. انت معاي صح
محمد.. نا ديمة معاك
انا.. استنى شوي بنعطيك شنطة خليها عندك ورد بالك تزلق قدام عادل وتقوله ان سفرتنا بعد اسبوعين خليه فاهم اني الاسبوع الجاي ماشية
محمد.. تمام بس الشنطة شنو فيها
انا.. اوراق خاصة بيا واوراق الحوش ناسي انه مسجل باسمنا الاثنين
محمد.. به بس ممكن تقوليلي شنو بديري
انا.. تو تعرف صدقني تو تعرف
محمد.. اللي يريحك
انا .. وخيي عندي طلب
محمد .. ادللي
انا .. نبيك تسئل سامي شنو السبب اللي قاله عادل لفرج عشان يتزوج عليا
محمد .. هذي ساهلة
وعطيته الشنطة ورغم انه طلع لكن عارفاته خوي قلبه مش حيرتاح عليا وبمجرد ماسكرت الباب بكيت بعبرتي وبصوتي طلعت قهري في دموعي
سنين ونا نستنى صبرت معاه على كل شئ كنت معاه في المرة قبل الحلوة وهك يجازيني ليش شنو اللي درته ليش يغدر بيا هكي
وبعدها حاوالت نهدي روحي على قد مانقدر وخشيت دوشت بيش يخف انتفاخ عيوني بسبب البكا وجهزت العشاء وخش للحوش ونا قاعدة نجهز وقديش في هذيك اللحظة حسيت بوجع قلبي وكيف كنت نضغط على روحي بيش نكون عادية
حاسة بنار قوية كابرة جواي نار غدر خيانة اهانة وجع
كان نلقى نبرك فوق منه ونطلع غلي كله والله نجيب موس ونذبحه والله نطعنه بيش يحس بشنو دار فيا لكن استغفرت ربي
عادل .. كنك يا شوشو جوك مش تمام
انا.. لا عادي مافي شئ
عادل .. شنو وحدة من خواتك مكلماتك والله صبايا خوتك
انا.. لا ما كلمني حد وبعدين هنا في مكة فاضيات غير بيا لكن غير بالك فكري مشغول شوي بالعمرة
عادل .. ان شاءالله تمشي وتجي طيبة
انا .. ان شاءالله .. تعرف انعزمت على فرح وكان قديش خاطري نحضره لكن خسارة بنكون في العمرة
عادل باستغراب .. فرح من
انا ببرود اثقنت تمثيله .. عارف سامي
عادل.. اه عارفه
انا.. تقعد صبية اخته
عادل وغص في لقمته .. منو عزمك
انا ونعطي فيه امية ونخبط على ظهره .. من يعني سمية غير خسارة اعتذرت منها قبل مانقصقص على العريس بالذات ان مودة عندها صفات خاصة للراجل
عادل بتوتر .. عادي هذا اكيد لا اول ولا اخر عرس ماتحضريشي والعمرة اهم
انا.. غير قبل بنلبس القفطان الجديد اللي خذيته من تركيا بالذات ان خواتي او حد من هلي مش حيضرو
عادل .. الافراح جاية واجد اكيد
انا.. اكيد
أنت تقرأ
قصص حكايتنا
Historia Cortaهي عبارة عن مجموعة قصص قصيرة مش مرتبطة ببعض يعني كل قصة بروحها وحتنزل جميع القصص في هذا الكتاب القصة الاولى بعنوان... مطلقة ولكن (مكتملة) القصة الثانية بعنوان...انا وسلفتي وضرتي (مكتملة) القصة الثالثة بعنوان...قلبي معي (مكتملة)
